Government Warning To Online Game Players: ऑनलाइन गेम खेळणाऱ्यांना सरकारचा इशारा; स्कॅम टाळण्यासाठी जारी केल्या टिप्स
Online Game Players प्रतिकात्मक प्रतिमा (Photo Credits: Pixabay)

Government Warning To Online Game Players: स्मार्टफोन आणि इंटरनेटचा वापर वाढला असून ऑनलाइन गेमिंगची (Online Game) क्रेझही झपाट्याने वाढली आहे. गेल्या काही वर्षांत ऑनलाइन गेम खेळणाऱ्यांची संख्या झपाट्याने वाढली आहे. मात्र, आता ऑनलाइन गेमिंगमध्ये मोठ्या प्रमाणावर फसवणूक आणि घोटाळे होत आहेत. अनेकवेळा गेमर घोटाळेबाजांनी दिलेल्या आमिषात अडकतात. त्यामुळे त्यांना मोठे नुकसान सोसावे लागते. जर तुम्ही तुमच्या स्मार्टफोनवर गेमिंग करत असाल तर तुम्हाला काळजी घेणे आवश्यक आहे. आता ऑनलाइन गेमिंगबाबत भारत सरकारच्या गृह मंत्रालयाकडूनही इशारा देण्यात आला आहे.

गृह मंत्रालयाच्या सायबर विंगने ऑनलाइन गेमिंग आणि गेमर्ससाठी एक चेतावणी जारी केली आहे. सायबर विंगने गेमर्सना ऑनलाइन गेमिंग करताना फसवणुकीपासून सावध राहण्याचा सल्ला दिला आहे. एवढेच नाही तर सायबर सेलने फसवणूक आणि घोटाळा टाळण्यासाठी काही टिप्सही दिल्या आहेत. (हेही वाचा - Twitter Audio Video Call Feature: प्रतिक्षा संपली! आता ट्विटरवरूनही करता येणार ऑडिओ-व्हिडिओ कॉल; 'असा' करा वापर)

गेल्या काही महिन्यांत सायबर गुन्ह्यांमध्ये झपाट्याने वाढ झाली आहे. घोटाळेबाज फसवणुकीसाठी नवनवीन पद्धती अवलंबत आहेत. आता स्कॅमर्सनी ऑनलाइन गेमिंगला फसवणुकीचे एक नवीन माध्यम बनवले आहे. स्कॅमर गेमर्सना अशा काही लिंक्स पाठवतात, त्यावर क्लिक केल्यानंतर बँक खात्याचे तपशील स्कॅमर्सकडे जातात.

स्कॅमर गेमरना रिवॉर्ड पॉइंट्स आणि विशेष ऑफर देऊन आमिष दाखवतात. या लालसेला बळी पडून गेमर्स मोठ्या फसवणुकीला बळी पडत आहेत. हे लक्षात घेऊन गृह मंत्रालयाच्या सायबर शाखेने आता काही टिप्स शेअर केल्या आहेत. (हेही वाचा - Instagram Message Feature: इन्स्टाग्रामवर 'या' फीचरमुळं चुकिचा संदेश पाठवल्याची चुक सुधारता येणार)

सरकारने गेमर्ससाठी जारी केल्या खास टिप्स -

  • ऑनलाइन गेमिंग करण्यासाठी, कोणत्याही गेमचे मूळ अॅप केवळ Google Apple Store किंवा त्या गेमच्या अधिकृत वेबसाइटवरून डाउनलोड करा.
  • ऑनलाइन गेमिंग अॅपसाठी अॅप डाउनलोड करण्यापूर्वी त्या अॅपची संपूर्ण माहिती जाणून घ्या.
  • अॅप्लिकेशनच्या इंस्टॉलेशन दरम्यान ऍप विविध प्रकारचे ऍक्सेस देखील विचारते. तुम्ही फक्त खेळासाठी आवश्यक असलेल्या गोष्टींमध्ये प्रवेश द्यावा.
  • जर कोणतेही अॅप नवीन असेल आणि त्याचा डाउनलोडिंग नंबर जास्त असेल तर ते एकदा नक्की पहा. तुम्ही त्या अॅपच्या लॉन्चिंगची तारीख देखील तपासली पाहिजे.
  • गेमर्सनी कोणतेही ऑनलाइन गेमिंग अॅप खरेदी करण्यापूर्वी त्याच्या बनावट सदस्यतांपासून सावध असले पाहिजे. अनेक वेळा घोटाळेबाज बनावट वर्गणीद्वारे मोठी फसवणूक करतात.

ऑनलाइन गेमिंग करताना तुमची वैयक्तिक माहिती कोणत्याही अज्ञात गेमरसोबत कधीही शेअर करू नका.