Photo Credit - ANI

दिल्लीतील जहांगीरपुरी (Jahangirpuri Violence Case) येथे हनुमान जयंतीनिमित्त झालेल्या हिंसाचारप्रकरणी पोलिसांनी मोठी कारवाई केली आहे. जहांगीरपुरी हिंसाचारप्रकरणी अटक करण्यात आलेल्या पाच आरोपींवर दिल्ली पोलिसांनी (Delhi Police) कठोर राष्ट्रीय सुरक्षा कायदा (NSA) लागू केला आहे. जहांगीरपुरी येथे शनिवारी मिरवणुकीदरम्यान दोन समुदायांमध्ये हाणामारी झाली, ज्यामध्ये आठ पोलिस आणि एक स्थानिक रहिवासी जखमी झाले. पोलिसांनी दिलेल्या माहितीनुसार, चकमकीदरम्यान दगडफेक आणि जाळपोळ झाली आणि काही वाहनेही जाळण्यात आली. वृत्तसंस्था पीटीआयच्या म्हणण्यानुसार, दिल्ली पोलिसांनी सांगितले की, ज्यांच्यावर कठोर कायद्यांतर्गत गुन्हा दाखल करण्यात आला आहे त्यात हिंसाचाराचे कथित 'मुख्य सूत्रधार' अन्सार आणि सोनू यांचा समावेश आहे, जे शनिवारी हिंसाचाराच्या वेळी एका व्हिडिओमध्ये गोळीबार करताना दिसले होते. याशिवाय सलीम, दिलशाद आणि अहिर यांच्यावरही NSA लावण्यात आल्याचे त्यांनी सांगितले.

झालेल्या हिंसाचाराप्रकरणी 25 जणांना अटक

पुलिस यांनी मंगळवारी सांगितले की, जहांगीरपुरी हिंसाचार प्रकरणातील आरोपीला पिस्तूल पुरवल्याप्रकरणी गुल्ली नावाच्या व्यक्तीला अटक करण्यात आली आहे. त्याने सांगितले की, गल्ली व्यतिरिक्त दिलशादलाही अटक करण्यात आली असून ते दोघेही जहांगीरपुरीचे रहिवासी आहेत. पोलिसांनी दिलेल्या माहितीनुसार, हनुमान जयंतीनिमित्त काढण्यात आलेल्या मिरवणुकीत झालेल्या हाणामारीत आतापर्यंत 25 जणांना अटक करण्यात आली आहे, तर दोन अल्पवयीन मुलांना अटक करण्यात आली आहे.

हिंसाचारग्रस्त भागात प्रचंड सुरक्षा दल तैनात

दरम्यान, पोलिसांनी सांगितले की जहांगीरपुरीतील परिस्थिती पूर्वपदावर येत असून हिंसाचारग्रस्त भागात प्रचंड सुरक्षा दल तैनात करण्यात आले आहे. पोलिसांनी सांगितले की काही दुकाने रस्त्यावर उघडी आहेत, त्यापैकी बहुतेक किराणा दुकाने आहेत आणि लोकांची वर्दळ देखील सामान्य होत आहे. या परिसरात 500 हून अधिक पोलीस कर्मचारी आणि अतिरिक्त फौजांच्या सहा कंपन्या चोवीस तास तैनात करण्यात आल्या आहेत. अश्रुधुराच्या नळकांड्या आणि पाण्याच्या तोफांसह सशस्त्र एकूण 80 पथके तैनात करण्यात आली आहेत, असे पोलिसांनी सांगितले. संवेदनशील भागातील छतावर लक्ष ठेवण्यासाठी ड्रोनचाही वापर केला जात आहे. (हे देखील वाचा: जहांगीरपुरीमध्ये बुलडोझरच्या कारवाईवर सर्वोच्च न्यायालयाने घातली बंदी, आता उद्या होणार सुनावणी)

पोलिस आधिकाऱ्यांनकडून तपास सुरु

आरोपींपैकी कोणाचा पॉप्युलर फ्रंट ऑफ इंडियाशी संबंध आहे का, असे विचारले असता एका वरिष्ठ पोलीस अधिकाऱ्याने सांगितले की, तपास अद्याप प्राथमिक अवस्थेत असून सर्व बाजूंनी तपास सुरू आहे. जहांगीरपुरीतील संघर्षाच्या 'मास्टरमाइंड'च्या राजकीय संलग्नतेवरून आम आदमी पार्टी (AAP) आणि भारतीय जनता पक्ष (BJP) यांच्यातील संघर्ष मंगळवारी तीव्र झाला. दिल्लीतील सत्ताधारी पक्षाने आरोपीचे वर्णन भाजप नेते असे केले आहे.