High-Risk Warning For Apple Users: तुम्हीही ॲपलची उत्पादने वापरत असाल तर व्हा सावध! केंद्राने iPhone, iPad आणि MacBook वापरकर्त्यांसाठी जारी केली 'हाय रिस्क वॉर्निंग'

Apple (Apple / Twitter)

High-Risk Warning For Apple Users: जर तुम्हीही आयफोन (Apple iPhone), आयपॅड (Apple iPad) किंवा मॅकबुक (MacBook) सारखी ॲपल उत्पादने वापरत असाल तर सावध व्हा. ॲपल कंपनीने आपली उत्पादने जगातील सर्वात सुरक्षित असल्याचा दावा केला असला तरी, पंतप्रधान नरेंद्र मोदी यांच्या नेतृत्वाखालील भारत सरकारने या उत्पादनांच्या भारतीय वापरकर्त्यांसाठी गंभीर इशारा जारी केला आहे.

केंद्र सरकारच्या सुरक्षा सल्लागार इंडियन कॉम्प्युटर इमर्जन्सी रिस्पॉन्स टीम (CERT-In) ने आयफोन, आयपॅड किंवा मॅकबुक आणि व्हिजन प्रो (Vision Pro) हेडसेट सारख्या उत्पादनांमध्ये गंभीर सुरक्षा त्रुटींचा इशारा दिला आहे. CERT-In ने ॲपल उत्पादने वापरणाऱ्यांसाठी 'हाय रिस्क' चेतावणी जारी केली आहे.

या ॲडव्हायझरीमध्ये असे सांगण्यात आले आहे की, ॲपलच्या विविध उत्पादनांमध्ये एक गंभीर लूप होल समोर आला आहे, ज्यामुळे तुमच्या फोनचा डेटा लीक होऊ शकतो आणि फोन हॅक देखील होऊ शकतो. फोनची सुरक्षा धोक्यात आणणाऱ्या या लूप होलला 'रिमोट कोड एक्झिक्यूशन' असे नाव देण्यात आले आहे. रिमोट कोडच्या अंमलबजावणीमुळे सर्व प्रकारचे ॲपल सॉफ्टवेअर आणि हार्डवेअर प्रभावित झाले आहेत.

यामुळे अशा प्रभावित झालेल्या कोणत्याही प्रणालीमध्ये, कोणताही हॅकर सहजपणे तिची सुरक्षा दूरस्थपणे नष्ट करू शकतो आणि त्यात इच्छित कोड कार्यान्वित करू शकतो. CERT-In नुसार, रिमोट कोड एक्झिक्यूशनमुळे WebRTC आणि CoreMedia मध्ये लिहिण्याच्या समस्या निर्माण होतात, ज्यामुळे हॅकर तुमच्या डिव्हाइसला अगदी रिमोट ठिकाणाहूनही सहजपणे लक्ष्य करू शकतो.

CERT-In ने ॲपल वापरकर्त्यांना त्यांचे डिव्हाइस हॅकर्सचे लक्ष्य बनू नये म्हणून काही विशेष पावले उचलण्याचा सल्ला दिला आहे. (हेही वाचा: Cybersecurity Risks: भारतातील केवळ 4 टक्के कंपन्या सायबर सुरक्षा धोक्यांचा सामना करण्यासाठी सज्ज- Cisco)

• तुमचे Apple iOS, iPadOS, macOS आणि VisionOS ताबडतोब नवीन व्हर्जनसह अपडेट करा.
• तुमच्या डिव्हाइसमध्ये अनधिकृत प्रवेशाचा धोका कमी करण्यासाठी तुमचे डिव्हाइस कोणत्याही असुरक्षित किंवा सार्वजनिक वाय-फाय नेटवर्कशी कनेक्ट करू नका.
• तुमचे महत्त्वाचे पासवर्ड चोरीला जाण्यापासून वाचवण्यासाठी, टू-फॅक्टर ऑथेंटिकेशन (2FA) चा अतिरिक्त सुरक्षा स्तर चालू करा.
• मालवेअरचा धोका कमी करण्यासाठी फक्त ॲपल ॲप स्टोअर सारख्या विश्वसनीय स्त्रोतांकडून ॲप्स आणि सॉफ्टवेअर डाउनलोड करा.
• तुमच्या डिव्हाइसच्या सुरक्षिततेच्या भंग किंवा सिस्टममध्ये बिघाड झाल्यास, डेटा गायब होऊ शकतो. अशा परिस्थितीत नियमित डेटा बॅकअप घेत राहा.