QuickLY
Socially
India National Cricket Team vs England Cricket Team, 2nd T20I 2025 Match: भारतीय राष्ट्रीय क्रिकेट संघ आणि इंग्लंड क्रिकेट संघ (IND vs ENG) यांच्यातील पाच सामन्यांच्या टी-20 मालिकेतील दुसरा सामना शनिवारी म्हणजेच 25 जानेवारी रोजी चेन्नईतील एमए चिदंबरम स्टेडियमवर खेळवण्यात आला. दुसऱ्या टी-20 आंतरराष्ट्रीय सामन्यात टीम इंडियाने इंग्लंडचा दोन विकेट्सने पराभव केला आहे. यासह टीम इंडियाने मालिकेत 2-0 अशी आघाडी घेतली आहे. या मालिकेत इंग्लंडची कमान जोस बटलरच्या खांद्यावर आहे. तर, टीम इंडियाचे नेतृत्व सूर्यकुमार यादव करत आहे. 22 वर्षीय तिलक वर्माच्या शानदार कामगिरीने इंग्लंडविरुद्धच्या मालिकेत भारताला 2-0 अशी आघाडी मिळवून देण्यात महत्त्वाची भूमिका बजावली आहे. तो एका टोकाला एकटा उभा राहिला आणि टीम इंडियाला 2 विकेटने विजय मिळवून देण्यास मदत केली. भारतीय क्रिकेट संघाचा स्टार फलंदाज तिलक वर्माने टी-20 क्रिकेटमध्ये ऐतिहासिक कामगिरी केली आहे.
तिलक वर्माने विराट कोहलीचा मोठा विक्रम मोडला
टीम इंडियाचा युवा फलंदाज तिलक वर्माने विराट कोहलीचा एक मोठा विक्रम मोडला आहे. दुसऱ्या टी-20 सामन्यात तिलक वर्माने 55 चेंडूत नाबाद 72 धावा केल्या. तिलक वर्माच्या या शानदार कामगिरीमुळे टीम इंडियाने 4 चेंडू शिल्लक असताना इंग्लंडचा 2 विकेट्सने पराभव केला आणि 5 सामन्यांच्या मालिकेत 2-0 अशी आघाडी घेतली. अशा परिस्थितीत, आपण तिलक वर्मांच्या रेकाॅर्डवर एक नजर टाकूया. (हे देखील वाचा: Most Runs Against India In T20 International: टी-20 आंतरराष्ट्रीय क्रिकेटमध्ये टीम इंडियाविरुद्ध 'या' फलंदाजांनी केल्या आहेत सर्वाधिक धावा; पाहा कोण आहे टाॅपवर)
या स्टार फलंदाजांनाही मागे टाकले
तिलक वर्माने सलग 4 टी-20 आंतरराष्ट्रीय डावांमध्ये सर्वाधिक धावा (258) करण्याचा विराट कोहलीचा विक्रमही मागे टाकला आहे. तिलक वर्माने आतापर्यंत त्याच्या शेवटच्या 4 टी-20 डावांमध्ये 318 धावा केल्या आहेत. तिलकने या बाबतीत संजू सॅमसन (257 धावा), रोहित शर्मा (253 धावा) आणि शिखर धवन (252 धावा) यांसारख्या स्टार फलंदाजांनाही मागे टाकले आहे. तिलकने दक्षिण आफ्रिकेविरुद्ध सलग दोन शतके झळकावली होती.
अशी होती तिलक वर्मांची खेळी
दुसऱ्या टी-20 सामन्यात तिलक वर्माने 55 चेंडूंचा सामना केला आणि 72 धावा केल्या. तिलक वर्माने 4 चौकार आणि 5 षटकार मारले. तिलक वर्माचा स्ट्राईक रेट 130.91 होता. तिलक वर्माचे हे त्याच्या टी२० आंतरराष्ट्रीय कारकिर्दीतील तिसरे अर्धशतक होते. या खेळाडूने इंग्लंडविरुद्ध पहिले अर्धशतक झळकावले. एकेकाळी असे वाटत होते की भारतीय संघ हा सामना हरेल, पण तिलक वर्माने एकट्याने सामना शेवटपर्यंत नेला आणि संघाला विजय मिळवून दिला.
तिलक वर्माची टी-20 आंतरराष्ट्रीय कारकिर्दीतली कामगिरी
तिलकने 2023 मध्ये वेस्ट इंडिज क्रिकेट संघाविरुद्ध टी-20 आंतरराष्ट्रीय क्रिकेटमध्ये पदार्पण केले. आतापर्यंत तिलक वर्माने 22 सामन्यांच्या 21 डावात 58.91 च्या सरासरीने आणि 156.07 च्या स्ट्राईक रेटने 707 धावा केल्या आहेत. दरम्यान, तिलक वर्माने 2 शतके आणि 3 अर्धशतके झळकावली आहेत. तिलक वर्माची टी-20 आंतरराष्ट्रीय क्रिकेटमधील सर्वोत्तम कामगिरी 120 धावांची नाबाद आहे. तिलक वर्मानेही 2 विकेट्स घेतल्या आहेत.
