Navi Mumbai: नवी मुंबईतील बिल्डरला सायबर गुन्हेगाराकडून 60 लाखांचा गंडा; गुन्हा दाखल
Cyber Crime (फोटो सौजन्य - Pixabay)

Navi Mumbai: नवी मुंबईतील (Navi Mumbai) एका बांधकाम व्यावसायिकाला (Builder) सायबर गुन्हेगाराने (Cyber Criminals) 60 लाखांचा चुना लावला आहे. यासंदर्भात पोलिसांनी माहिती दिली आहे. बिल्डरने तक्रार दाखल केल्यानंतर ही घटना उघडकीस आली. त्यानंतर भारतीय दंड संहिता आणि माहिती तंत्रज्ञान कायद्याच्या विविध कलमांतर्गत गुन्हा दाखल करण्यात आला आहे. बिल्डरच्या कार्यालयाला 6 मार्च रोजी फोन आला. ज्यामध्ये कॉलरने स्वतः बिल्डर असल्याची बतावणी केली. त्यानंतर भामट्याने अकाउंटंटचा फोन नंबर मिळवून व्हॉट्सॲपवर मेसेज केला.

बिल्डर असल्याचे भासवून फसवणूक करणाऱ्याने अकाउंटंटला बँकेचे तपशील दिले आणि रक्कम हस्तांतरित करण्याची सूचना केली. बिल्डरकडे असलेल्या सूचनांची शहानिशा न करताच लेखापालाने पैसे ट्रान्सफर केले. सायबर पोलीस सध्या या प्रकरणाचा तपास करत आहेत, मात्र अद्याप कोणालाही अटक करण्यात आलेली नाही. (हेही वाचा -Cyber Crime News Pune: पुण्यात बोकाळले सायबर भामटे, आठ महिन्यांत 20 कोटींहून अधिक रकमेवर डल्ला)

दरम्यान, शनिवारी मुंबईतील नागरी रुग्णालयातील एका 27 वर्षीय डॉक्टरला मुंबई पोलिस असल्याचं भासवून सायबर भामट्याने 7.33 लाख रुपयांची फसवणूक केल्याची धक्कादायक माहिती समोर आली आहे. भारतीय दंड संहितेच्या कलम 419 (व्यक्तीद्वारे फसवणूक), 420 (फसवणूक) आणि 465 (बनावट) आणि माहिती तंत्रज्ञान कायद्याच्या संबंधित तरतुदींनुसार अज्ञात आरोपीविरुद्ध गुन्हा दाखल करण्यात आला आहे.  (हेही वाचा - Cyber Crime: क्रिकेटपटू पूनम राऊत हिच्या आईची सायबर गुन्हेगाराकडून फसवणूक, लाखो रुपयांचा लावला गंडा)

तक्रारदार, केईएम रुग्णालयातील वरिष्ठ डॉक्टर, डॉ. ब्लेसी एस्थर यांनी आरोप केला की त्यांना 29 फेब्रुवारी रोजी एका अनोळखी नंबरवरून फोन आला. कॉलरने स्वतःची ओळख कुरिअर कंपनीची कर्मचारी असल्याचे सांगितले. कॉलरने महिलेला सांगितले की, मुंबई विमानतळावरील अधिकाऱ्यांनी तिच्या नावावर पाच पासपोर्ट, तीन क्रेडिट कार्ड, 140 ग्रॅम मेफेड्रोन गोळ्या, कपडे आणि एक लॅपटॉप असलेले पार्सल सापडले आहे.