Virus Repetitional Photo (PC - Pixabay)

Dangerous Viruses Detected in China: संपूर्ण जगाला हादरवून टाकणाऱ्या कोरोना व्हायरसची व्युत्पत्ती चीनमधून (China) झाल्याचा दावा केला जात आहे. गेल्या पाच वर्षांमध्ये कोरोनासह इतर काही आजारही चीनमधून समोर आले होते. आता नुकत्याच झालेल्या एका संशोधन अहवालानुसार, चीनमध्ये असलेल्या फर प्राण्यांमध्ये म्हणजेच भरपूर केस असलेल्या प्राण्यांमध्ये धोकादायक विषाणू आढळून आले आहेत. संशोधनात सुमारे 125 विषाणू ओळखले गेले आहेत, त्यातील अनेक मानवजातीसाठी अत्यंत धोकादायक आहेत. यामुळे मानवी लोकसंख्येमध्ये या विषाणूंचा प्रसार होण्याच्या जोखमीबद्दल चिंता वाढली आहे.

चायनीज संशोधकांच्या नेतृत्वात आणि विषाणूशास्त्रज्ञ एडवर्ड होम्स यांच्या सह-लेखकांच्या नेतृत्वाखालील हा अभ्यास, फर फार्म्सवर चांगल्या प्रकारे लक्ष देण्याच्या गरजेवर प्रकाश टाकतो. या शोधात पूर्वी अज्ञात 36 विषाणूंचाही समावेश होता.

यामधील एकूण 39 प्रजाती ‘उच्च धोका’ म्हणून ओळखल्या गेल्या आहेत, ज्यामुळे मानवी संसर्ग होण्याची शक्यता आहे. नेचर जर्नलमध्ये प्रकाशित झालेले हे संशोधन 2021 ते 2024 दरम्यान आयोजित करण्यात आले होते आणि या आजाराने मरण पावलेल्या 461 प्राण्यांवर लक्ष केंद्रित केले होते. या अभ्यासामध्ये मिंक, कोल्हे, रॅकून कुत्रे, ससे आणि मस्कराट्स या प्राण्यांचा समावेश होतो. हे सर्व प्राणी फर फार्म्समधील आहेत. काहींचे खाद्य म्हणून तर काहींचे पारंपारिक औषधांसाठी आणि काहींचे त्यांच्या केसांच्या व्यापारासाठी पालन केले जाते. हा अभ्यास संभाव्य व्हायरस ट्रान्समिशन हब म्हणून फर फार्मची भूमिकाही अधोरेखित करतो.

या अभ्यासात सुमारे 50 वन्य प्राण्यांचाही समावेश करण्यात आला होता. या प्राण्यांमध्ये आढळलेल्या विषाणूंमध्ये हेपेटायटीस ई आणि जपानी एन्सेफलायटीस सारख्या ज्ञात रोगजनकांचा तसेच 13 नवीन विषाणूंचा समावेश आहे. टीमला या प्राण्यांमध्ये सात प्रकारचे कोरोनाव्हायरस देखील आढळले आहेत. त्यापैकी एकाचाही SARS-CoV-2, या कोविड-19 साठी जबाबदार असलेल्या विषाणूशी जवळचा संबंध नव्हता. रॅकून कुत्रे आणि मिंक यांच्यामध्ये सर्वात जास्त संभाव्य धोकादायक व्हायरस आढळले. त्यामुळे चिंतेची ही प्रमुख प्रजाती बनली आहे. (हेही वाचा: Mobile Phone and Brain Cancer: मोबाईल फोनच्या वापरामुळे होऊ शकतो मेंदूचा कर्करोग? जाणून घ्या काय म्हणतो WHO-समर्थित अभ्यास)

दरम्यान, जागतिक फर व्यापार हा अब्जावधी-डॉलरचा उद्योग आहे, ज्यामध्ये चीन हा प्रमुख खेळाडू आहे. जगातील फर उत्पादनात 80% पेक्षा जास्त वाटा चीनचा आहे. 2021 मध्ये, चीनने अंदाजे 27 दशलक्ष प्राण्यांपासून पेल्ट तयार केले, त्यापैकी बहुतेक लक्झरी कपड्यांमध्ये बदलले गेले.