लिओनेल मेस्सी (Photo Credit: Facebook)

अर्जेंटिनाने (Argentina) आपले कट्टर प्रतिस्पर्धी ब्राझीलविरुद्ध (Brazil) दक्षिण अमेरिकन विश्वचषक पात्रता सामन्यात गोलरहित ड्रॉ खेळून पुढील वर्षी कतार येथे होणाऱ्या फिफा विश्वचषक  (FIFA World Cup) स्पर्धेचे तिकीट निश्चित केले आहे. यासह लिओनेल मेस्सीला (Lionel Messi) विश्वचषक जिंकण्याची पाचवी आणि कदाचित शेवटची संधी मिळाली आहे. मेस्सीने आतापर्यंतच्या आपल्या कारकिर्दीत फिफा विश्वविजेतेपदाचा मान मिळवलेला नाही. तिसऱ्या क्रमांकावर असलेल्या इक्वेडोरने (Ecuador) चिलीवर 2-0 असा विजय मिळवल्यानंतर दुसऱ्या स्थानावर असलेल्या अर्जेंटिनाने कतारमध्ये होणाऱ्या स्पर्धेसाठी पात्रता मिळवली. अर्जेंटिनाचे आता 29 गुण आहेत आणि फक्त चार पात्रता बाकी आहेत, दोनपेक्षा जास्त संघ मेस्सीच्या नेतृत्वात संघाला मागे सोडू शकत नाहीत. याशिवाय स्पर्धेतील आघाडीवर असलेल्या ब्राझीलने कतार 2022 मध्ये दक्षिण अमेरिकेतील चार थेट प्रवेशांपैकी पहिले प्रवेश आधीच मिळवलेला आहे. तसेच पाचव्या स्थानावरील संघ कतारमधील एका स्थानासाठी आंतरखंडीय प्लेऑफमध्ये जाईल.

ब्राझीलचे 35 गुण असून अर्जेंटिनापेक्षा सहा पॉईंटने आघाडीवर आहेत. या दोन संघांनी 13 सामने खेळले आहेत जे इतर संघांपेक्षा एक कमी आहे कारण सप्टेंबरमध्ये त्यांच्यातील सामना कोविड-19 निर्बंध लागू झाल्यामुळे केवळ सात मिनिटांनंतर पुढे ढकलण्यात आला होता. जागतिक फुटबॉल संघटना फिफाने या सामन्याबाबत अद्याप निर्णय घेतलेला नाही. अर्जेंटिनाने 1978 आणि 1986 मध्ये विश्वचषक जिंकला होता, तर संघ 3 वेळा उपविजेता ठरला होता. तसेच 2014 स्पर्धेत संघ अंतिम फेरीत पराभूत झाला होता, परंतु शेवटच्या वेळी 2018 मध्ये प्री क्वार्टरमध्ये संघ बाहेर पडला होता. दरम्यान, इक्वेडोरचे 23 गुण आहेत आणि ते तिसर्‍या स्थानावर आहे. आणि मग शेवटच्या स्थानावरील व्हेनेझुएला वगळता, पात्र होण्यासाठी उमेदवारांचा भडीमार लागला आहे. कोलंबिया आणि पेरूचे 17 गुण आहेत आणि चिली 16 गुणांसह सहाव्या स्थानावर आहे, ते गोल फरकात उरुग्वेपेक्षा थोडे पुढे आहे.

बोलिव्हिया आश्चर्यकारकपणे स्पर्धात्मक आहे, 15 गुणांसह आठव्या स्थानावर आहे. 13 गुण असलेल्या पॅराग्वेची शक्यता देखील नाकारता येत नाही. बोलिव्हियाने उरुग्वेचा 3-0 आणि पेरूचा व्हेनेझुएलाविरुद्ध 2-1 असा पराभव केला, तर कोलंबिया आणि पॅराग्वे गोलरहित सामना बरोबरीत सुटला होता. दुसरीकडे, आणखी एका सामन्यात नेदरलँड्सने UEFA च्या G गटात नॉर्वेचा 2-0 असा पराभव करून विश्वचषकचे तिकीट पक्के केले. ग्रुप जी मध्ये नेदरलँड्स अव्वल स्थानावर राहून विश्वचषकासाठी पात्र ठरण्यात यशस्वी झाला.