Gyanvapi Masjid Survey Updates: ज्ञानवापी मशिदीच्या सर्वेक्षणात सापडल्या स्वस्तिक आणि ओमच्या खुणा

Gyanvapi Masjid Survey: वाराणसीच्या ज्ञानवापी मशिदीत (Gyanvapi Masjid Survey) आज तिसऱ्या दिवशीही पहाटे 8 वाजल्यापासून कडेकोट सुरक्षा व्यवस्थेत सर्वेक्षणाचे काम सुरू आहे. सूत्रांनी दिलेल्या माहितीनुसार, सर्वेक्षणाच्यावेळी स्वस्तिक आणि ओमच्या खुणा आणि एक मोठी टाकी सापडली आहे. मात्र, तलाव सापडला नाही. यासोबतच भिंतींवरील आकृत्या दिसू नयेत यासाठी त्या रंगवल्या होत्या. याशिवाय एक तळघरही सापडले असून ते कचऱ्याने झाकण्याचा प्रयत्न करण्यात आला आहे. रविवारी महामंडळाचे कर्मचारी तेथे कामासाठी आत गेले होते. परंतु, उष्णतेमुळे ते तेथून लवकर परतले.

सर्वेक्षण पथकाने रविवारपर्यंत सुमारे 65 टक्के काम पूर्ण केले होते. ज्ञानवापी सर्वेक्षणाच्या दुसऱ्या दिवशी छत आणि घुमटाचे व्हिडिओ काढण्यात आले. 5 पैकी 4 तळघरांचे सर्वेक्षण करण्यात आले आहे. आता फक्त 1 तळघर शिल्लक आहे. 17 मेपर्यंत सर्वेक्षणाचे काम पूर्ण करून अहवाल न्यायालयात सादर करायचा आहे. मात्र, यादरम्यान रविवारी मशिदीतील वाजुखानाजवळील तलावावरून वाद झाला. (हेही वाचा - Gyanvapi Mosque Case: ज्ञानवापी मशीद प्रकरण पोहोचले सर्वोच्च न्यायालयात; सर्व्हेवर स्थगिती देण्यास न्यायालयाने दिला स्पष्ट नकार)

मस्जिद समितीच्या आक्षेपानंतर गेल्या आठवड्यात सर्वेक्षण थांबवण्यात आले होते. सर्वेक्षणासाठी न्यायालयाने नियुक्त केलेल्या वकिल आयुक्तांना आवारात व्हिडिओग्राफी करण्याचा अधिकार नसल्याचा दावा समितीने केला होता. ज्ञानवापी मशीद संकुलाच्या दुसऱ्या दिवसाचे सर्वेक्षण-व्हिडीओग्राफीचे काम पूर्ण झाले असून सोमवारीही ते सुरू राहणार असल्याचे पाहणी पथकाने सांगितले.

न्यायालयाच्या आदेशानुसार सकाळी 8 ते दुपारी 12 या वेळेत सर्वेक्षणाचे काम करावयाचे आहे. रविवारी पहाटे दीड वाजण्याच्या सुमारास पाहणी पथक बाहेर आले. न्यायालयाच्या आदेशानुसार 12 वाजता सर्वेक्षणाचे काम संपले असून उर्वरित वेळ कामाचे संकलन आणि कागदपत्रे तयार करण्यात खर्च झाल्याचे पथकातील सदस्यांनी सांगितले. विशेष वकील आयुक्त विशाल सिंह म्हणाले, “न्यायालयाच्या आदेशानुसार सर्वेक्षणाची कार्यवाही शांततेत पार पडली. सर्वेक्षणात कोणतेही अडथळे आले नाहीत. सर्वेक्षण अहवाल गोपनीय असून तो सध्या सार्वजनिक करता येणार नाही.

ज्ञानवापीवरील वादग्रस्त वक्तव्यांदरम्यान केंद्रीय मंत्री गिरीराज सिंह यांनी आजच्या परिस्थितीबाबत माजी पंतप्रधान नेहरूंवर निशाणा साधला. गिरीराज सिंह म्हणाले की, तुष्टीकरणाच्या राजकारणासाठी नेहरूंनी काशी, मथुरा आणि अयोध्या वादग्रस्त केले होते. दुसरीकडे, या सर्वेक्षणाबाबत संघाचे ज्येष्ठ नेते इंद्रेश कुमार म्हणाले की, आज सत्य बाहेर आलेच पाहिजे. लोकांना ताजमहाल, ज्ञानवापी मशीद, कृष्णजन्मभूमीचे सत्य जाणून घ्यायचे आहे. न्यायालयाने सत्य शोधण्यास मदत करावी.

(The above story first appeared on LatestLY on May 16, 2022 11:29 AM IST. For more news and updates on politics, world, sports, entertainment and lifestyle, log on to our website latestly.com).