Bahraich Wolf Attack: बहराइचमध्ये लांडग्याच्या हल्ल्यात अडीच वर्षाच्या मुलीचा मृत्यू, आतापर्यंत एकूण 10 जणांना गमवावा लागला जीव, नागरिक दहशतीत

Bahraich Wolf Attack: उत्तर प्रदेशातील बहराइचमध्ये लांडग्यांची दहशत कायम आहे. वृत्तानुसार, काल रात्री उशिरा बहराइचमधील बारबिघा हर्डी पोलीस स्टेशन परिसरात एका लांडग्याने अडीच वर्षाच्या निष्पाप मुलीला बळी बनवले. मिळालेल्या माहितीनुसार, ही मुलगी तिच्या आईसोबत घराच्या व्हरांड्यात झोपली होती, त्यावेळी लांडग्याने त्यांच्यावर हल्ला केला. या हल्ल्यात मुलगी वाचू शकली नाही, तर तिची आई गंभीर जखमी झाली आहे. लांडग्याच्या या हल्ल्यामुळे स्थानिक नागरिकांमध्ये भीतीचे वातावरण आहे. मार्च 2024 पासून बहराइचमध्ये लांडग्यांच्या हल्ल्यात 10 जणांना आपला जीव गमवावा लागला आहे. यामध्ये आठ लहान मुले आहेत. तसेच 50 हून अधिक जण जखमी झाले आहेत. हे देखील वाचा: Agra Wall Collapse: आग्रा येथील निवासी इमारतीची भिंत कोसळली, एका अल्पवयीन मुलाचा मृत्यू

त्यानंतर अवघ्या दोन तासांनी जवळच्या दरिया गावात आणखी एक हल्ला झाला. ५५ वर्षीय कुन्नू लाल यांच्यावर झोपेत असताना लांडग्याने हल्ला केला. दरम्यान, कुटुंबीयांनी त्यांना वाचवले. दोन्ही जखमींच्या मानेवर खुणा होत्या. सध्या त्यांच्यावर महसी सामुदायिक आरोग्य केंद्रात उपचार सुरू आहेत. दरम्यान, लांडग्यामुळे गावात भीती आणि दहशत निर्माण होत आहे.