Team India (Photo Credit - X)

अहमदाबादच्या नरेंद्र मोदी स्टेडियमवर रविवारी पार पडलेल्या सुपर-८ च्या पहिल्या सामन्यात दक्षिण आफ्रिकेने भारताचा ७६ धावांनी धुव्वा उडवला. या पराभवामुळे गतविजेत्या भारताचा टी-२० विश्वचषकातील १२ सामन्यांचा विजयी रथ रोखला गेला आहे. दक्षिण आफ्रिकेने दिलेल्या १८८ धावांच्या आव्हानाचा पाठलाग करताना भारतीय फलंदाजी पूर्णपणे कोलमडली आणि संपूर्ण संघ १११ धावांवर गारद झाला. या मोठ्या पराभवाचा परिणाम भारताच्या नेट रन रेटवर (NRR) झाला असून, आता उपांत्य फेरीत पोहचण्यासाठी सूर्यकुमार यादवच्या नेतृत्वाखालील संघाला 'करा किंवा मरा' अशा स्थितीत लढावे लागणार आहे.

गुणतालिकेतील सध्याची स्थिती

सुपर-८ च्या 'ग्रुप १' मध्ये सध्या वेस्ट इंडिज अव्वल स्थानी आहे, तर दक्षिण आफ्रिका दुसऱ्या क्रमांकावर आहे. भारताची स्थिती खालीलप्रमाणे आहे:

वेस्ट इंडिज: १ सामना, १ विजय, २ गुण (NRR +५.३५०)

दक्षिण आफ्रिका: १ सामना, १ विजय, २ गुण (NRR +३.८००)

भारत: १ सामना, १ पराभव, ० गुण (NRR -३.८००)

झिम्बाब्वे: १ सामना, १ पराभव, ० गुण (NRR -५.३५०)

भारतासाठी पात्रता मिळवण्याचे दोन मुख्य पर्याय

१. दोन्ही सामने मोठ्या फरकाने जिंकणे:

भारताला आता झिम्बाब्वे (२६ फेब्रुवारी, चेन्नई) आणि वेस्ट इंडिज (१ मार्च, कोलकाता) यांच्याविरुद्धचे दोन्ही सामने जिंकावेच लागतील. केवळ विजय मिळवून चालणार नाही, तर तो विजय मोठ्या फरकाने असणे गरजेचे आहे. जर दक्षिण आफ्रिका, भारत आणि वेस्ट इंडिज या तिन्ही संघांचे प्रत्येकी ४ गुण झाले, तर ज्याचा नेट रन रेट सर्वोत्तम असेल, तोच संघ उपांत्य फेरीत प्रवेश करेल.

दक्षिण आफ्रिकेच्या विजयाची प्रार्थना:

जर दक्षिण आफ्रिकेने त्यांचे उर्वरित दोन्ही सामने (वेस्ट इंडिज आणि झिम्बाब्वे विरुद्ध) जिंकले, तर ते ६ गुणांसह थेट पात्र ठरतील. अशा परिस्थितीत, जर भारताने आपले दोन्ही सामने जिंकले, तर भारत ४ गुणांसह दुसऱ्या क्रमांकाचा संघ म्हणून सहज पात्र ठरू शकेल.

अभिषेक शर्मा आणि इशान किशन यांसारख्या खेळाडूंचे लवकर बाद होणे भारतासाठी डोकेदुखी ठरत आहे. दक्षिण आफ्रिकेविरुद्ध भारताने पॉवरप्लेमध्येच महत्त्वाच्या विकेट्स गमावल्या. त्यामुळे चेन्नईतील आगामी सामन्यात संघात बदल होण्याची शक्यता आहे. संजू सॅमसन किंवा अक्षर पटेल यांना संधी देऊन संघ समतोल राखण्याचा प्रयत्न मुख्य प्रशिक्षक गौतम गंभीर करू शकतात.

भारताचा पुढचा सामना २६ फेब्रुवारी रोजी चेन्नईच्या चेपॉक स्टेडियमवर झिम्बाब्वेविरुद्ध होणार आहे. इथली खेळपट्टी फिरकीला पोषक असल्याने वरुण चक्रवर्ती आणि कुलदीप यादव यांच्या कामगिरीवर सर्वांच्या नजरा असतील.