Stop Rape | Representational Image (Photo Credits: File Image)

Molestation-Rape Cases In Mumbai: मुंबई पोलिसांच्या अधिकृत आकडेवारीनुसार, या वर्षी जानेवारी महिन्यात मुंबईत महिलांच्या विनयभंगाच्या (Molestation) 184 प्रकरणांची नोंद झाली असून, त्यातील 152 प्रकरणे पोलिसांनी सोडवली आहेत. म्हणजे जानेवारीमध्ये शहरात दररोज सरासरी सहा विनयभंगाचे गुन्हे दाखल झाले आहेत. मागील वर्षी म्हणजेच, 2023 मध्ये, विनयभंगाची 2,163 प्रकरणे नोंदवली गेली आणि 2054 प्रकरणांमध्ये कारवाई करण्यात आली, परिणामी 95% रिझोल्यूशन रेट झाला. त्याआधी 2022 मध्ये 2,347 प्रकरणे नोंदवली गेली, ज्यामध्ये 1,955 घटनांमध्ये कारवाई करण्यात आली आणि 83% रिझोल्यूशन रेट होता.

यासह जानेवारी 2024 मध्ये, मुंबईत 60 बलात्काराच्या (Rape) गुन्ह्यांची नोंद झाली होती, आणि पोलिसांनी 47 प्रकरणे सोडवली होती, परिणामी शोध दर 78% इतका होता. जानेवारी महिन्यात सरासरी दररोज एक बलात्काराचा गुन्हा दाखल झाला. 2023 मध्ये, मुंबईत 973 बलात्काराचे गुन्हे दाखल करण्यात आले आणि पोलिसांनी 933 प्रकरणे यशस्वीरित्या सोडवली, म्हणजेच 96% शोध दर गाठला. 2022 मध्ये, 984 बलात्कार प्रकरणे नोंदवली गेली, ज्यातील 912 प्रकरणे सोडवली गेली म्हणजेच शोध दर 93% आहे.

पती आणि सासरच्या लोकांकडून होणारा मानसिक आणि शारीरिक छळ (कलम 498-अ) या संदर्भात जानेवारीमध्ये 38 प्रकरणे नोंदवण्यात आली आणि 27 प्रकरणे सोडवण्यात आली. याचा अर्थ दिवसाला सरासरी एक केस आहे. 2023 मध्ये, अशा छळाची 173 प्रकरणे नोंदवली गेली, 164 प्रकरणांमध्ये कारवाई केली गेली. 2022 मध्ये, 34 प्रकरणे नोंदवली गेली आणि 19 घटनांमध्ये कारवाई करण्यात आली.

जानेवारी 2024 मध्ये मुंबईत दररोज अंदाजे 15 महिलांवरील गुन्ह्यांची नोंद करण्यात आली, जी एकूण 477 प्रकरणे होती. पोलिसांनी त्यापैकी 365 सोडवली. 2023 मध्ये, अशी एकूण 5,913 प्रकरणे नोंदवली गेली आणि 5,570 प्रकरणांमध्ये कारवाई करण्यात आली. 2022 मध्ये, 6,156 प्रकरणे नोंदवली गेली आणि 4,995 प्रकरणांमध्ये कारवाई करण्यात आली,

याबाबत अधिवक्ता आभा सिंह म्हणाल्या, ‘मुंबईसारख्या शहरात कायदा आणि सुव्यवस्थेची स्थिती बऱ्यापैकी आहे. कलम 498 अंतर्गत प्रकरणे येथे शून्य असणे आवश्यक आहे. मात्र, अनेक सुशिक्षित महिला पोटगीसाठी या कायद्याचा दुरुपयोग करतात. समाजाच्या काही घटकांमध्ये, विशेषत: गरीब आणि ग्रामीण भागात, या कायद्याचा वापर केला जात नाही. माझ्या अनुभवाच्या आधारे, मला विश्वास आहे की मुंबई हे सुरक्षित शहर आहे.’ (हेही वाचा: Navi Mumbai Shocker: दहावी परीक्षेच्या विद्यार्थ्याचं मित्रांकडूनच अपहरण; सिगारेटचे चटके देत मागितली 50 हजारांची खंडणी)

दुसरीकडे, फौजदारी वकील फाल्गुनी ब्रह्मभट्ट म्हणाल्या, ‘जवळपास दररोज विनयभंगाच्या गुन्ह्यांची नोंद होत आहे, परंतु सर्वच केसेस खऱ्या नाहीत. यातील 50 टक्के प्रकरणे बनावट आहेत. कामाच्या ठिकाणी, लोकल ट्रेनमध्ये आणि सार्वजनिक ठिकाणी महिलांना अशा प्रकारच्या गुन्ह्यांना सामोरे जावे लागते. मात्र, काही वेळा वैयक्तिक वैमनस्यातून काही महिला असे खटले दाखल करतात.’