विराट कोहली (Photo Credit: PTI)

IND vs SA 3rd Test 2022: दक्षिण आफ्रिकेच्या (South Africa) भूमीवर प्रथमच कसोटी मालिका जिंकण्याचे विराट कोहलीच्या (Virat Kohli) नेतृत्वातील भारतीय संघाचे (Indian Team) स्वप्न पुन्हा एकदा भंगले आहे. केपटाऊन कसोटीच्या चौथ्या दिवशी दक्षिण आफ्रिकेने 7 विकेट्स राखून 212 धावांचे आव्हान पार केले. युवा फलंदाज कीगन पीटरसन (Keegan Pietersen) भारतीय संघाच्या विजयात अडथळा ठरला. गोलंदाजांना मदत करणाऱ्या खेळपट्टीवर त्याने दोन्ही डावात अर्धशतके झळकावली आणि दोन्ही डावांत यजमानांकडून सर्वाधिक धावा करणारा तो फलंदाज ठरला. भारतीय संघ यावेळी मालिका जिंकण्याचा प्रबळ दावेदार मानला जात होता पण तसे होऊ शकले नाही. कोहलीने या पराभवासाठी फलंदाजांच्या अपयशाला जबाबदार धरले. या परिस्थितीत भारतीय खेळाडू चांगली फलंदाजी करू शकत नसल्याची कबुली कोहलीने दिली. (ICC WTC Points Table 2021-23: केपटाऊन कसोटी विजयासह दक्षिण आफ्रिकेची पॉईंट टेबलमध्ये झेप, टीम इंडियाला बसला धक्का)

पराभवानंतर विराट कोहली म्हणाला, “कसोटी क्रिकेटच्या दृष्टीने ही एक उत्तम मालिका होती. या मालिकेत दोन्ही संघांमध्ये चुरशीची स्पर्धा पाहायला मिळाली. पहिल्या सामन्यात आम्ही चांगली कामगिरी केली पण दुसऱ्या आणि तिसऱ्या सामन्यात दक्षिण आफ्रिकेने चांगले पुनरागमन केले. त्याने जिंकलेल्या दोन कसोटी सामन्यांमध्ये त्याने शानदार गोलंदाजी केली. अनेक महत्त्वाच्या प्रसंगी आम्ही विचलित झालो आणि भरकटलो पण दक्षिण आफ्रिकेने त्या संधींचा पुरेपूर वापर घेतला. मालिका जिंकण्यासाठी तो निश्चितच पात्र होता.” विराट पुढे म्हणाला की, “परदेश दौऱ्यांवर आपल्यासमोर आलेल्या संधींचा फायदा उठवायचा आणि गती कायम ठेवायची आहे. आम्ही ते करू शकलो तेव्हा परदेशी कसोटी मालिका आमच्या नावावर झाली. जेव्हा-जेव्हा आम्ही असे करण्यात अपयशी ठरलो तेव्हा आमचे मोठे नुकसान झाले. आम्ही सलग अनेक वेळा विकेट गमावल्या, त्यामुळे महत्त्वाच्या संधी आणि कसोटी सामने आमच्या हातातून निसटले.”

संघाच्या मालिकेत पराभवाचे महत्त्वाचे कारण विचारले असता विराटने याचे खापर फलंदाजांवर फोडले. विराट म्हणाला, “संपूर्ण मालिकेत फलंदाजी निराशाजनक झाली आहे. दक्षिण आफ्रिकेत लोक नेहमी वेग आणि बाऊन्सबद्दल बोलतात. यजमान गोलंदाजांनी त्यांच्या उच्च उंचीचा फायदा घेतला आणि आमच्या गोलंदाजांपेक्षा जास्त विकेट घेण्यात यश मिळवले. तिन्ही कसोटीत त्यांना विकेटची मदत घेता आली आहे. मला वाटते की त्याला त्याची घरची परिस्थिती अधिक चांगली समजते. आमची फलंदाजी खराब होती यासाठी आम्ही कोणतीही सबब सांगू शकत नाही. संघ पुन्हा पुन्हा स्वस्तात बाद होणे ही चांगली गोष्ट नाही. या कामगिरीने मी निराश झालो आहे.”