Pune Metro Update: पुणेकरांना दिलासा! आज रात्री 11 वाजेपर्यंत धावणार मेट्रो; दोन गाड्यांमधील वेळही होणार कमी

नवीन वर्षाच्या पूर्वसंध्येला घराबाहेर पडणाऱ्या पुणेकरांसाठी (Pune) एक दिलासादायक बाब आहे. पुणे मेट्रोने (Pune Metro) आज, 31 डिसेंबर 2024 रोजी आपल्या कामकाजाचे तास अतिरिक्त तासाने वाढवण्याचा निर्णय घेतला आहे. पुणे मेट्रो आता आज नेहमीच्या रात्री 10 ऐवजी रात्री 11 वाजेपर्यंत धावणार आहे. फ्री प्रेस जर्नलशी बोलताना, पुणे मेट्रोचे कार्यकारी संचालक (प्रशासन आणि जनसंपर्क) हेमंत सोनवणे म्हणाले, नवीन वर्षाच्या निमित्ताने आम्ही मेट्रोची वेळ एक तासाने वाढवली आहे. साधारणपणे, मेट्रो सकाळी 6 वाजल्यापासून आणि रात्री 10 वाजेपर्यंत चालते, परंतु आज ती रात्री 11 वाजेपर्यंत धावणार आहे. ते पुढे म्हणाले, याशिवाय, गाड्यांमधील मध्यांतर एक मिनिटाने कमी होईल. सात मिनिटांऐवजी आता गाड्या सहा मिनिटांच्या अंतराने धावतील.

दुसरीकडे, महा-मेट्रोचे एमडी श्रावण हर्डीकर यांनी पुष्टी केली आहे की, स्वारगेट ते कात्रज पर्यंत पुणे मेट्रो लाईन 1 च्या विस्तारासाठी निविदा प्रक्रिया अंतिम टप्प्यात आहे, लवकरच कंत्राटदाराची नियुक्ती होण्याची अपेक्षा आहे. याशिवाय प्रस्तावित मुक्ताई चौक ते वाकड ते नाशिक फाटा ते चाकण या मार्गाचा सविस्तर प्रकल्प अहवाल (डीपीआर) तयार करण्याचे कामही महा-मेट्रोने सुरू केल्याचे हर्डीकर यांनी सांगितले.

दरम्यान, पुण्यात 31 डिसेंबर आणि 1 जानेवारी 2025 या दिवसांसाठी, सार्वजनिक सुरक्षा आणि नववर्षाचे स्वागत सुरळीत पार पडावे यासाठी, सुमारे 3,000 पोलीस कर्मचारी तैनात करण्यात आले आहेत. रिस्क झोन म्हणून ओळखल्या जाणाऱ्या अनेक ठिकाणी 700 वाहतूक पोलीस कर्मचारी कार्यरत असतील. रॅश ड्रायव्हिंग, ट्रिपल सीट किंवा चुकीच्या बाजूने ड्रायव्हिंग इत्यादी सारख्या वाहतुकीचे उल्लंघन करणाऱ्यांवर कारवाई केली जाईल. (हेही वाचा: New Year Special Mumbai Local Train Update: नववर्ष स्वागताच्या निमित्ताने मध्य रेल्वे चालवणार विशेष उपनगरीय सेवा; इथे पहा मध्य, हार्बर, पश्चिम रेल्वेच्या वेळा)

एकूण 40 ठिकाणी उत्सवासाठी परवानगी देण्यात आली आहे. अंदाजे 23 ठिकाणे ही ड्रंक ड्रायव्हिंग झोन म्हणून ओळखले गेले आहेत. एक समर्पित टीम त्यांच्यावर लक्ष ठेवेल. पब, रेस्टॉरंट, हॉटेल्स आणि परवानाधारकांना नियमांचे पालन करण्याच्या सूचना दिल्या आहेत. नियमांचे उल्लंघन करणाऱ्या ग्राहकांवर कठोर कारवाई केली जाईल. पब आणि बारमध्ये, जर कोणी अल्पवयीन मद्य सेवन करताना आढळले तर मालकाला त्यांचा परवाना रद्द करावा लागेल.

(The above story first appeared on LatestLY on Dec 31, 2024 03:58 PM IST. For more news and updates on politics, world, sports, entertainment and lifestyle, log on to our website latestly.com).