PT Usha झाल्या भावूक; म्हणाल्या, खासदार झाल्यापासून त्रास दिला जातोय

PT Usha On Illegal Occupation: ज्येष्ठ खेळाडू आणि भारतीय ऑलिम्पिक संघटनेच्या (IOA) अध्यक्षा पीटी उषा (PT Usha) शनिवारी प्रसारमाध्यमांसमोर भावूक झाल्या. केरळमधील कोझिकोड जिल्ह्यात असलेल्या त्यांच्या अॅथलीट्स अॅकॅडमीच्या कॅम्पसमध्ये बेकायदा बांधकाम केले जात असल्याचा आरोप त्यांनी केला. व्यवस्थापनाने विरोध केल्यावर शिवीगाळ केल्याचेही त्यांनी सांगितले. मात्र, पोलिसांत तक्रार केल्यानंतर हे काम बंद करण्यात आल्याचे त्यांनी सांगितले. त्यांनी सांगितलं की, काही लोक उषा स्कूल ऑफ अॅथलेटिक्सच्या कंपाऊंडमध्ये घुसले आणि बांधकाम सुरू केले. व्यवस्थापनाने विरोध केल्यावर त्यांना मारहाण करण्यात आली. त्यांनी पानगड पंचायतीची परवानगी असल्याचा दावा केला. आम्ही पोलिसांकडे तक्रार केली. त्यानंतर काम थांबवण्यात आलं.

नवी दिल्लीत प्रसारमाध्यमांशी बोलताना पीटी उषा यांनी सांगितले की, उषा स्कूल ऑफ अॅथलेटिक्सच्या खेळाडूंना काही काळापासून अशा छळाचा आणि सुरक्षेचा सामना करावा लागत होता. जो राज्यसभा सदस्य झाल्यानंतर आणखी तीव्र झाला आहे. जुलै 2022 मध्ये भाजपने पीटी उषा यांना राज्यसभेवर उमेदवारी दिली. (हेही वाचा - Khelo India Youth Games Medal Tally: खेलो इंडिया यूथ गेम्समध्ये सहाव्या दिवशी महाराष्ट्र दुसऱ्या स्थानावर; 20 गोल्ड, 25 सिल्व्हर पदकासह मिळवले 64 पदक)

सीएम विजयन यांना आवाहन

कॅम्पसमधील घुसखोरीमुळे अकादमीत राहणारे लोक आणि मुलींच्या सुरक्षेबाबत पीटी उषा यांनीही चिंता व्यक्त केली. तिने केरळचे मुख्यमंत्री पिनाराई विजयन यांना या समस्येत हस्तक्षेप करण्याचे आवाहन केले आणि तेथील महिला खेळाडूंच्या सुरक्षिततेची खात्री करण्यासाठी कॅम्पसमध्ये अतिक्रमण आणि घुसखोरी थांबवावी, अशी विनंती केली.

पीटी उषा यांनी सांगितलं की, अॅकॅडमीमध्ये 25 महिला आहेत, त्यापैकी 11 उत्तर भारतातील आहेत. त्यांच्या सुरक्षिततेची जबाबदारी आमची आहे. यासंदर्भात मी मुख्यमंत्र्यांकडे लेखी तक्रार केली आहे. अंमली पदार्थांचे व्यसन करणारे जोडपे कंपाऊंडमध्ये घुसून तेथे अस्वच्छता पसरवतात, अशी तक्रारही उषा यांनी केली.

राजकारणाबाबतच्या प्रश्नाला उत्तर देताना उषा यांनी सांगितलं की, प्रत्येक राजकीय पक्ष त्यांना प्रतिस्पर्ध्याशी जोडलेला समजतो. माझ्याकडे कोणतेही राजकारण नाही आणि मी प्रत्येकाला शक्यतो मदत करते. गेल्या वर्षी नोव्हेंबरमध्ये पीटी उषा यांनी भारतीय ऑलिम्पिक संघटनेच्या अध्यक्षपदी निवड झाली होती.

(The above story first appeared on LatestLY on Feb 05, 2023 09:43 AM IST. For more news and updates on politics, world, sports, entertainment and lifestyle, log on to our website latestly.com).