अजिंक्य रहाणे आणि चेतेश्वर पुजारा (Photo Credit: Twitter/BCCI)

India Likely Playing XI for 2nd Test: अ‍ॅडिलेड ओव्हलमधील (Adelaide Oval) पहिल्या पिंक-बॉल टेस्ट (Pink-Ball Test) मॅचमधील पराभवानंतर भारतीय संघ (Indian Team) बॉक्सिंग डे मॅचसाठी (Boxing Day Test) यजमान ऑस्ट्रेलियाचा (Australia) सामना करण्यासाठी उत्सुक असेल. चार सामन्यांच्या मालिकेच्या पहिल्या कसोटी सामन्यात तीन दिवसांत भारतीय संघाला 8 विकेटने पराभव स्वीकारावा लागला. दुसऱ्या डावात भारतीय संघाने अत्यंत निराशाजनक कामगिरी केली परिणामी संपूर्ण संघाचा डाव अवघ्या 9 बाद 36 धावांवर संपुष्टात आला. त्यामुळे, आगामी दुसऱ्या बॉक्सिंग डे टेस्टसाठी भारतीय प्लेइंग इलेव्हनमध्ये बदल होण्याची शक्यता दिसत आहे. 26 डिसेंबरपासून मेलबर्न क्रिकेट ग्राउंडवर भारत आणि ऑस्ट्रेलिया यांच्यात दुसरा कसोटी सामना खेळला जाईल. टीम इंडियाचा नियमित कर्णधार कोहली पितृत्वाच्या रजेवर गेल्याने उपकर्णधार अजिंक्य रहाणे (Ajinkya Rahane) संघाच्या नेतृत्वाची जबाबदारी सांभाळेल. मोहम्मद शमीला देखील दुसऱ्या डावात फलंदाजी करताना हाताला दुखापत झाली ज्यामुळे वेगवान गोलंदाज देखील उर्वरित सामन्यांना मुकणार आहे. (IND vs AUS 2nd Test: बॉक्सिंग डे टेस्ट मॅचमधून डेविड वॉर्नर, सीन एबॉट आऊट; मेलबर्न कसोटीपूर्वी टीम इंडियासाठी दिलासा)

त्यामुळे दुसर्‍या सामन्यात संतुलित संघ राखणे हे रहाणेच्या नेतृत्वातील भारतासाठी मोठे आव्हान असणार आहे. दुसर्‍या कसोटी सामन्यात भारताची तयारी सुरू असताना आपण जाणून घेऊया त्याचा संभाव्य प्लेइंग इलेव्हन. पहिल्या सामन्यात गुलाबी बॉलविरूद्ध काहीसा लचक दाखविणारा मयंक अग्रवाल इलेव्हन खेळताना आपले स्थान कायम राखण्याच्या तयारीत आहे, तर त्याचा सलामीचा साथीदार पृथ्वी शॉ बेंचवर बसलेला दिसू शकतो. 21 वर्षीय मुंबईकरने फक्त सहा चेंडू खेळला आणि त्याच्या मध्यवर्ती कामगिरीसाठी मोठ्या टीकेला सामोरे जावे लागले. काही अहवालानुसार शुभमन गिलला दुसऱ्या सामन्यात कसोटी पदार्पणाची संधी दिली जाऊ शकते. दुसरीकडे, अ‍ॅडिलेडमध्ये भारताचा फलंदाजी क्रम कोसळला असला तरी संघ त्यांच्या सहा योग्य फलंदाजांसह खेळत राहतील. चेतेश्वर पुजारा तिसऱ्या आणि विराटच्या अनुपस्थितीत रहाणे चौथ्या स्थानावर खेळेल. तर केएल राहुल पुन्हा एकदा सफेद जर्सी परिधान केलेला दिसेल तर हनुमा विहारी पाचव्या सहाव्या स्थानावर फलंदाजी करेल.

दुसरीकडे, रिषभ पंत दुसऱ्या सामन्यात रिद्धिमान साहाच्या जागी संघात सामील होईल. पंतने ऑस्ट्रेलियन ट्रॅकमध्ये फलंदाजीचा आनंद लुटला आणि दुसर्‍या सराव सामन्यात 73 चेंडूत शतकही ठोकले. म्हणूनच, फलंदाजीला बळकट करण्यासाठी तो संघात सामील होऊ शकतो. आर अश्विन, उमेश यादव आणि जसप्रीत बुमराह यांचे प्लेइंग इलेव्हनमधील स्थान कायम राहील तर शमीच्या जागी मोहम्मद सिराज आणि नवदीप सैनीपैकी एकाला पदार्पणाची संधी मिळू शकते.

भारताचा संभाव्य प्लेइंग इलेव्हनः शुभमन गिल, मयंक अग्रवाल, चेतेश्वर पुजारा, अजिंक्य रहाणे (कॅप्टन), केएल राहुल, हनुमा विहारी, रिषभ पंत (विकेटकीपर), आर अश्विन, उमेश यादव, जसप्रीत बुमराह आणि मोहम्मद सिराज.