Assam Flood: आसाममध्ये मुसळधार पावसाने केला कहर, पुरामुळे लाखो लोक बेघर, भीषण दृश्याचा व्हिडिओ समोर आला

Assam Flood: आसाममध्ये अतिवृष्टीमुळे आलेल्या पुरामुळे लाखो लोक बेघर झाले आहेत. राज्यातील सुमारे 12 जिल्ह्यांमध्ये परिस्थिती बिकट झाली आहे. सोमवारी मोरीगाव येथे ब्रह्मपुत्रा नदीचे पाणी शिरल्याने नागरिकांना घरे सोडावी लागली. नदीतील पाणी सातत्याने वाढत असल्याचे ग्रामस्थांचे म्हणणे आहे. त्यामुळे सर्वत्र पूरस्थिती निर्माण झाली आहे. नद्यांच्या काठावर वसलेल्या बहुतांश गावांचे रस्ते व घरे पाण्याखाली गेली आहेत. प्रत्येकाला अनेक अडचणींचा सामना करावा लागत आहे. येथे दरवर्षी पूर येतो, मात्र प्रशासनाकडून योग्य ती पावले उचलली जात नाहीत. पुरामुळे काझीरंगा राष्ट्रीय उद्यान आणि व्याघ्र प्रकल्पाचा मोठा भाग पाण्याखाली गेला आहे. येथील एकूण 61 वन छावण्या पाण्याखाली गेल्या आहेत. बुडलेल्या वन छावण्यांमध्ये आगोरटोली रेंजमधील 22 छावण्या, काझीरंगातील 10, बागोरीतील 8, बुधापहारमधील 5 आणि बोकाखात 6 छावण्यांचा समावेश आहे.

#WATCH | Morigaon, Assam: The flood situation deteriorated on Monday after the waters of the Brahmaputra River spread to villages pic.twitter.com/qxNT1jgt1q

— ANI (@ANI) July 2, 2024

आसाममधील पुराचा सामना करण्यासाठी एनडीआरएफ पूर्णपणे सज्जः मुख्यमंत्री हिमंता विश्व शर्मा आसामचे मुख्यमंत्री हिमंता विश्व शर्मा यांनी सोमवारी सांगितले की, अरुणाचल प्रदेशात अतिवृष्टीनंतर आसाममधील पूरस्थिती गंभीर बनली आहे. ब्रह्मपुत्रा आणि तिच्या सर्व उपनद्या धोक्याच्या चिन्हावरुन वाहत आहेत. भारतीय हवामान विभागाने (IMD) पुढील दोन ते तीन दिवस मुसळधार पावसाचा इशारा दिला आहे. पंतप्रधान नरेंद्र मोदी आणि केंद्रीय गृहमंत्री अमित शहा यांनी मला फोन करून परिस्थिती हाताळण्यासाठी सर्वतोपरी मदत करण्याचे आश्वासन दिले आहे. राष्ट्रीय आपत्ती प्रतिसाद दल (NDRF) आणि लष्कर कोणत्याही आपत्कालीन परिस्थितीला तोंड देण्यासाठी पूर्णपणे सज्ज असेल. सर्व मंत्री, आमदार आणि अधिकाऱ्यांना परिस्थितीवर बारकाईने लक्ष ठेवण्यास सांगण्यात आले आहे. ब्रह्मपुत्रा आणि बराक खोऱ्यांसह 14 जिल्ह्यांमध्ये एकूण 2,70,628 लोक पूरस्थितीला सामोरे जात आहेत.