Sushant Singh Rajput Death Case: सुशांत सिंह राजपूत याच्या मृत्यूप्रकरणी खोटी बातमी पसरवणाऱ्या एका व्यक्तीला मुंबईतून अटक
Representational Image (Photo Credits: Facebook)

दिवंगत अभिनेता सुशांत सिंह राजपूत (Sushant Singh Rajput) याने केलेल्या आत्महत्येनंतर आता कसून चौकशी केली जात आहे. तर दररोज नव्याने खुलासे होत असल्याने सर्वांच्या नजरा आता मुख्य आरोपी कोण असणार किंवा या प्रकरणाचे काय होणार याकडे लागून राहिले आहे. तर नुकत्याच एनसीबीकडून (NCB) तीनहून अधिक जणांना ताब्यात घेण्यात आले आहे. या सर्वांचा संबंध ड्रग्जसोबत आल्याने पुराव्यानिशी त्यांना अटक करण्यात आली आहे. याच दरम्यान आता मुंबईतून एका व्यक्तीला सुशांत याच्या मृत्यू प्रकरणी खोट्या बातम्या पसरवण्याचा कारणास्तव अटक करण्यात आली आहे.

पोलीस अधिकाऱ्यांनी असे म्हटले आहे की, आरोपीने युट्यूबरुन काही व्हिडिओ अपलोड केले आहेत. या व्हिडिओंच्या माध्यमातून शहरातील पोलीस आणि महाराष्ट्र सरकारची प्रतिमा मलील करण्याचा प्रयत्न करण्यात आला आहे.(Sushant Singh Rajput: अमेरिकेत सुशांत याच्या समर्थकांनी काढली कारची रॅली, बहिणेने शेअर केला व्हिडिओ)

दरम्यान, सुशांत याच्या मृत्यूप्रकरणी एनसीबी यांच्याकडून शौविक चक्रवर्ती,सॅम्युअल मिरांडासह कैझद याला अटक करण्यात आली आहे. तर काल एनसीबीने सुशांत याचा नोकर दीपक सावंत याला ताब्यात घेतले असून त्याचा ड्रग्जशी संबंध आल्याचे ही स्पष्ट करण्यात आले आहे. दुसऱ्या बाजूला आज रिया चक्रवर्ती सुद्धा सकाळी सीबीआयच्या कार्यालयात पोहचल्याचे दिसून आले. त्यानंतर आता सुशांत याची बहिण मितू सिंह सुद्धा डीआरडीओ येथे पोहचली आहे.

नारकोटिक्स कंट्रोल ब्यूरो यांनी असा दावा केला आहे की, मुख्य आरोपी शौविक चक्रवर्ती याने अशा काही नावांचा खुलासा केला असून जेणेकरुन आता बॉलिवूड आणि मुंबईतील ड्रग्जचे गुढ उकलण्यासह ते संपवण्यापर्यंत मदत करु शकतो. एनसीबीने शनिवारी रिमांड याचिकेत ही गोष्ट स्पष्ट केली आहे. सुशांत याची प्रेयसी रिया चक्रवर्ती हिच्या संभाव्य अटकेकडे इशारा करत एनसीबीने रिमांड याचिका दाखल केली होती. यामध्ये एनसीबीने चौकशीसाठी शौविक याला पाच दिवसांसाठी ताब्यात घेण्याची मागणी केली होती.