Sri Lanka: श्रीलंकेत सर्वात वाईट आर्थिक संकटाचा सामना, एप्रिलपर्यंत संपणार पेट्रोल-डिझेल!
प्रतिकात्मक फोटो (Photo Credits: PTI)

श्रीलंकेत (Sri Lanka) आर्थिक संकट असताना परिस्थिती इतकी बिकट झाली आहे की इतर देशांची मदतही कमी पडताना दिसत आहे. या महिन्याच्या अखेरीस श्रीलंकेत डिझेलचा तुटवडा निर्माण होऊ शकतो, असे वृत्त आहे. यासोबतच भारताने इंधन खरेदीसाठी पाठवलेली $500 दशलक्ष क्रेडिट लाइनही संपण्याच्या मार्गावर आहे. भारताने फेब्रुवारीमध्ये इंधन खरेदीसाठी श्रीलंकेला $500 दशलक्ष क्रेडिट लाइन दिली होती. 1948 मध्ये ब्रिटनपासून स्वातंत्र्य मिळाल्यानंतर श्रीलंका सर्वात वाईट आर्थिक संकटाचा सामना करत आहे. गॅस, खाद्यपदार्थ आणि जीवनावश्यक वस्तू मिळत नसल्याने नागरिक तीव्र आंदोलन करत आहेत.

अधिकाऱ्यांच्या म्हणण्यानुसार, परिस्थिती पाहता श्रीलंकेत इंधनाची शिपमेंट 1 एप्रिलऐवजी मार्चच्या अखेरीस येऊ लागली. याशिवाय 15, 18 आणि 23 एप्रिल रोजी आणखी तीन भारतीय शिपमेंट शिल्लक आहेत आणि तोपर्यंत श्रीलंका सरकारने मदतीसाठी मुदतवाढ मागितली नाही, तर इंधन पूर्णपणे संपेल.

दररोज सुमारे 10 तास वीजपुरवठा खंडित 

श्रीलंकेत, डिझेलचा सर्वाधिक वापर सार्वजनिक वाहतूक आणि वीज निर्मितीसाठी केला जातो. देशात डिझेलच्या तुटवड्यामुळे काही औष्णिक वीज प्रकल्प आधीच बंद आहेत, त्यामुळे दररोज सुमारे 10 तास वीजपुरवठा खंडित होत आहे. येथे, देशातील एकमेव रिफायनरी आयातीसाठी पैसे न दिल्यामुळे नोव्हेंबर 2021 मध्ये दोनदा बंद झाली आहे. (हे देखील वाचा: Sri Lanka President Gotabaya Rajapaksa यांनी केली राष्ट्रीय आणीबाणी मागे घेतल्याची घोषणा)

संकट वाढत आहे

सरकारच्या अपयशामुळे संतप्त झालेले नागरिक आता रस्त्यावर उतरले असून त्यांच्या राजीनाम्याची मागणी करत आहेत. त्याच वेळी, श्रीलंका मेडिकल असोसिएशन (SLMA) ने देखील अध्यक्ष गोटाबाया राजपक्षे यांना आवश्यक औषधांच्या तुटवड्याबद्दल चेतावणी दिली आहे. एसएलएमएचे म्हणणे आहे की औषधे आणि उपकरणांच्या पुरवठ्यात कमतरता आहे. प्रकृती एवढी बिकट झाली आहे की, कठीण स्थितीसाठी त्यांनी नियमित शस्त्रक्रिया करणे बंद केले आहे.