RSS Workers as PA to BJP Ministers: महाराष्ट्रासाठी भाजपचा मोठा निर्णय; आपल्या मंत्र्यांचे स्वीय सहायक म्हणून करणार आरएसएस कार्यकर्त्यांची नियुक्ती

भारतीय जनता पक्ष (BJP) आणि त्याचा वैचारिक मार्गदर्शक संघटन, राष्ट्रीय स्वयंसेवक संघ (RSS), यांनी महाराष्ट्रातील सरकारची धोरणे आणि निर्णय प्रक्रियेत पक्षाची विचारधारा सुनिश्चित करण्यासाठी एक महत्त्वाचा निर्णय घेतला आहे. धोरण आणि निर्णय घेण्यावर आपली पकड मजबूत करण्यासाठी भाजप मंत्र्यांच्या नेतृत्वाखालील सरकारी विभागांमध्ये स्वीय सहायक (PA) नियुक्त करण्याचा निर्णय घेतला आहे. या स्वीय सहाय्यकांना आरएसएस आणि त्याच्या सहकार्य करणाऱ्या संघटनांमधून निवडले जाईल व त्यांची मुख्य जबाबदारी पक्ष आणि सरकार यांच्यातील समन्वय सुधारण्याची असेल.

गेल्या आठवड्यात महाराष्ट्रातील भाजप मंत्र्यांच्या आणि आरएसएसच्या प्रतिनिधींमधील बैठकांत हा निर्णय घेतला गेला. राज्य भाजपचे अध्यक्ष चंद्रशेखर बावनकुळे यांनी याबद्दल माहिती दिली. पक्षाने सुधीर देऊळगावकर यांची सरकार आणि पक्ष यांच्यातील मुख्य समन्वयक म्हणून नियुक्ती केली आहे. देऊळगावकर हे केंद्रीय वाहतूक मंत्री नितीन गडकरी यांच्या मंत्रालयात विशेष कर्तव्य अधिकारी म्हणून कार्यरत आहेत आणि मागील वर्षी लोकसभा व विधानसभा निवडणुकीत भाजपचे निवडणूक समन्वयक होते. (हेही वाचा: Ladki Bahin Yojana: 'लाडकी बहीण योजना', सरकारविरोधात सामान्य जनतेमध्ये संताप)

भाजपने सरकारमध्ये आरएसएस कार्यकर्त्यांची नेमणूक करण्याची परंपरा कायम ठेवली आहे, पण ही पहिलीच वेळ आहे जेव्हा भाजप-नेतृत्वाच्या राज्य सरकारने या प्रणालीला संस्थात्मक स्वरूप दिले आहे. राज्य सरकारने गेल्या आठवड्यात मंत्र्यांच्या कार्यालयात असणाऱ्या गैर-सरकारी कर्मचार्यांच्या नियुक्तीचे नियम सुधारले, ज्यात या नियुक्त्यांची संख्या दोनहून वाढवून चार करण्यात आली. यानंतर, मुख्यमंत्री देवेंद्र फडणवीस यांनी मंत्र्यांना नियुक्त केलेल्या पीए आणि विशेष कर्तव्य अधिकाऱ्यांची यादी मंजूर केली. या यादीमध्ये विविध सरकारी विभागांतील आरएसएस कार्यकर्त्यांचा समावेश होता.

सुधीर देऊळगावकर यांनी सांगितले, हा निर्णय मुख्यतः सरकार आणि पक्षामध्ये चांगला समन्वय साधण्यासाठी आहे, तसेच हे आपले सरकार असल्याचे जनतेला दाखवून देणे आणि याबाबत कार्यकर्त्यांमध्ये विश्वास निर्माण करणे, हाही याचा हेतू आहे. यासह मंत्रालयात सहज प्रवेश नसलेल्या कार्यकर्त्यांना भेटण्यासाठी भाजपचे मंत्री आठवड्यातून किंवा पंधरा दिवसांनी पक्ष कार्यालयात जनता दरबार आयोजित करणार आहेत. चंद्रशेखर बावनकुळे यांनी पक्षाच्या कार्यकर्त्यांना नवीन नियुक्त केलेल्या पीएसोबत संपर्क साधण्याचे आवाहन केले आहे.

(The above story first appeared on LatestLY on Jan 23, 2025 10:41 AM IST. For more news and updates on politics, world, sports, entertainment and lifestyle, log on to our website latestly.com).