पासपोर्ट (Image Credits: PTI)

मुंबईच्या (Mumbai) छत्रपती शिवाजी महाराज आंतरराष्ट्रीय विमानतळावर (Chhatrapati Shivaji Maharaj International Airport) नुकतीच एक धक्कादायक घटना घडली आहे. या ठिकाणी पुण्यातील (Pune) एका 51 वर्षीय व्यक्तीला इमिग्रेशन अधिकाऱ्यांनी ताब्यात घेतले. पासपोर्टची पाने फाडल्याच्या आरोपाखाली इमिग्रेशन अधिकाऱ्यांनी या व्यक्तीला अटक केली. या व्यक्तीच्या पासपोर्टमधील काही पाने गायब असल्याचे आढळल्यानंतर ही कारवाई करण्यात आली. या व्यक्तीने आपल्या कुटुंबापासून बँकॉकमधील मागील प्रवास लपवण्यासाठी जवळपास एक वर्षापूर्वी ही पाने जाणीवपूर्वक फाडली होती, असा आरोप आहे. आता मुंबई पोलिसांनी इमिग्रेशन अधिकाऱ्यांची फसवणूक केल्याबद्दल या व्यक्तीवर गुन्हा दाखल केला आहे.

तक्रार दाखल करणारे इमिग्रेशन अधिकारी राजीव रंजन कुमार यांच्या म्हणण्यानुसार, सोमवारी पहाटे प्रवासी इमिग्रेशन काउंटरवर आला तेव्हा त्यांना ही अनियमितता लक्षात आली. त्याचा पासपोर्ट आणि बोर्डिंग पास सादर केल्यावर असे लक्षात आले की तो प्रवासी इंडोनेशियाहून व्हिएतनाममार्गे आला होता. अधिक तपासणी केल्यावर, अधिकाऱ्याला आढळले की त्याच्या पासपोर्टवरील अनेक पाने गहाळ आहेत. त्यानंतर अधिकाऱ्याने प्रवाशाला अधिक चौकशीसाठी नेले. एफआयआरनुसार, प्रवाशाने कबूल केले आहे की, त्याने त्याच्या कुटुंबापासून बँकॉकच्या भेटी लपवण्यासाठी जवळजवळ एक वर्षापूर्वी ती पाने फाडली होती.

या बँकॉक प्रवासामागील नेमके कारण स्पष्ट नाही, पण त्याला आपली ही भेट गुप्त ठेवायची होती. या कबुलीनंतर, इमिग्रेशन अधिकाऱ्यांनी त्याला सहार पोलीस स्टेशनच्या ताब्यात दिले, आणि त्याच्याविरुद्ध कायदेशीर कारवाई सुरू केली. पासपोर्ट हा भारत सरकारने जारी केलेला एक अधिकृत दस्तऐवज आहे, आणि त्याच्याशी छेडछाड करणे हा गंभीर गुन्हा मानला जातो. या प्रकरणात, पुण्यातील या व्यक्तीविरुद्ध पासपोर्ट कायदा, 1967 च्या कलम 12 अंतर्गत सरकारी दस्तऐवजाला हानी पोहोचवल्याचा आणि भारतीय न्याय संहिता (BNS) च्या कलम 318(4) अंतर्गत फसवणुकीचा गुन्हा दाखल करण्यात आला आहे. (हेही वाचा: 'Idli Guru' Hotel Owner Arrested: फ्रॅन्चायजी डीलच्या नावाखाली स्थानिक व्यावसायिकाची फसवणूक केल्याप्रकरणी कार्तिक बाबू शेट्टी ला अटक)

पासपोर्ट कायद्यांतर्गत, अशा गुन्ह्याला किमान एक वर्षाची तुरुंगवासाची शिक्षा आणि 10,000 ते 50,000 रुपयांपर्यंत दंड होऊ शकतो. या व्यक्तीच्या बाबतीत, अद्याप कोणतीही सुनावणी किंवा जमानत मंजूर झाल्याची माहिती उपलब्ध नाही. पण या घटनेने विमानतळावरील इमिग्रेशन प्रक्रियेची काटेकोरता आणि पासपोर्टच्या सुरक्षिततेचे महत्त्व अधोरेखित केले आहे. याआधी 2022 मध्येही पुण्यातील एका व्यक्तीने थायलंडमधील आपला प्रवास लपवण्यासाठी पासपोर्टची पाने फाडली होती, आणि त्याला अटक झाली होती.