Baba Siddique | (Photo Credit -Facebook)

महाराष्ट्राचे माजी मंत्री बाबा सिद्दीकी (Baba Siddique) यांच्या हत्या प्रकरणातील एका महत्त्वपूर्ण घडामोडीत, अटक करण्यात आलेल्या दोन संशयितांनी कुख्यात लॉरेन्स बिश्नोई टोळीशी (Lawrence Bishnoi Gang) संबंधित असल्याचा दावा केला आहे, असे सूत्रांनी सांगितले. मुंबई पोलिसांनी (Mumbai Police) अद्याप या दाव्याची पडताळणी केली नसली तरी या टोळीने अधिकृतपणे हत्येची जबाबदारी घेतलेली नाही. महाराष्ट्र विधानसभा निवडणूक तोंडावर असताना एका आजी आमदाराच्या वडीलांची हत्या झाली आहे. जे माजी आमदार आणि मंत्रीही राहिले आहेत. या प्रकरणामुळे सुरक्षा व कायदाव्यवस्थेचा प्रश्न उपस्थित झाला आहे.

झिशान सिद्दीकी यांच्या कार्यालयासमोर हल्ला

राष्ट्रवादी काँग्रेसच्या अजित पवार गटाचे नेते आणि वांद्रे पूर्वचे तीन वेळा आमदार राहिलेले बाबा सिद्दीकी (66) यांची काल (12 ऑक्टोबर) रात्री वांद्रे येथे गोळ्या घालून हत्या करण्यात आली. हा हल्ला त्यांच्या मुलाच्या म्हणजेच झिशान सिद्दीकी यांच्या कार्यालयाजवळ झाला, जिथे त्यांच्यावर सहा गोळ्या झाडण्यात आल्या, त्यापैकी चार गोळ्या त्यांच्या छातीला लागल्या. (हेही वाचा, Baba Siddique Murder: बाबा सिद्दिकींच्या हत्येनंतर सलमान खानने बिग बॉसचे शुटींग थांबवले)

बाबा सिद्दीकी यांच्या घरावर पाळत

पोलिसांनी हरियाणातील करनैल सिंग आणि उत्तर प्रदेशातील धरमराज कश्यप या दोन संशयितांना अटक केली आहे, तर तिसरा हल्लेखोर फरार आहे. पोलिसांना ही कंत्राटी हत्या असल्याचा संशय आहे. या प्रकरणाच्या तपासासाठी चार विशेष पथके तयार केली आहेत. मुंबई पोलिसांच्या गुन्हे शाखेच्या चौकशीदरम्यान, अटक केलेल्या संशयितांनी सांगितले की ते गोळीबार होण्यापूर्वी सुमारे एक महिना या भागावर पाळत ठेवत होते, असे सूत्रांनी सांगितले. एनडीटीव्हीने याबाबत वृत्त दिले आहे. (हेही वाचा, Sharad Pawar on Baba Siddique Murder: बाबा सिद्दीकींची गोळ्या झाडून हत्या; शरद पवारांनी केली देवेंद्र फडणवीसांच्या राजीनाम्याची मागणी)

हल्लेखोर ऑटो रिक्षातून आले आणि हल्ला करण्यासाठी योग्य क्षणाची वाट पाहत होते. सिद्दीकीच्या हालचालींची माहिती त्यांना कोणी दिली का याचा तपास पोलीस करत आहेत.

लॉरेन्स बिश्नोई गँग अँगल

सन 1998 च्या काळवीट शिकार प्रकरणामुळे बिश्नोईचे लक्ष्य ठरलेल्या बॉलीवूड स्टार सलमान खानशी सिद्दीकीचा जवळचा संबंध असल्याने लॉरेन्स बिश्नोई टोळीचा संभाव्य सहभाग तपासाखाली आहे. या घटनेच्या 15 दिवस आधी त्याला जीवे मारण्याच्या धमक्या आल्या होत्या आणि त्याला वाय श्रेणीची सुरक्षा देण्यात आली होती, असे सिद्दीकीच्या जवळच्या सूत्रांनी उघड केले. तथापि, सिद्दीकीने अधिकाऱ्यांना बिश्नोई टोळीकडून कोणत्याही थेट धमक्यांची माहिती दिली नाही.

बड्या व्यावसायिकांना खंडणी आणि खंडणीचे कॉल यासह गुन्हेगारी कृत्यांसाठी बिश्नोई टोळीने कुप्रसिद्धी मिळवली आहे. रॅपर सिद्धू मूसेवाला आणि दिल्लीतील अफगाण वंशाच्या व्यायामशाळेच्या मालकाच्या हत्येसह अलीकडील हाय-प्रोफाइल हत्यांशीही या टोळीचा संबंध जोडला गेला आहे.