QuickLY
Socially
Ram Navami 2025 Wishes in Marathi: चैत्र महिन्याच्या शुक्ल पक्षाच्या नवम्या दिवशी (नवमी तिथी) राम नवमी (Ram Navami 2025) हा सण साजरा केला जातो. भगवान विष्णूंचे सातवे अवतार असलेल्या श्रीरामांच्या जन्मदिनानिमित्त या उत्सवाचे आयोजन केले जाते. यंदा, 2025 मध्ये 6 एप्रिल रोजी, रविवारी राम नवमी साजरी होणार आहे. हिंदू पंचांगानुसार, नवमी तिथी 5 एप्रिल रोजी संध्याकाळी 7.26 वाजता सुरू होईल आणि 6 एप्रिल रोजी संध्याकाळी 7.22 वाजता संपेल. हा सण चैत्र नवरात्रीचा भाग आहे आणि श्रीरामांच्या जीवनातील धर्म, सत्य आणि अधर्मावर सत्याच्या विजयाचे प्रतीक म्हणून ओळखला जातो. या दिवशी भक्त उपवास करतात, रामायणाचे पठण करतात, मंदिरांना भेट देतात आणि विशेषतः अयोध्या येथे भव्य मिरवणुका काढतात. यंदा अयोध्या येथे नव्याने बांधलेल्या राम मंदिरात दुसऱ्या राम नवमीचा उत्सव साजरा होईल.
असा विश्वास आहे की, श्रीरामांचा जन्म दुपारी झाला होता, त्यामुळे मध्याह्न मुहूर्तात, म्हणजेच दुपारी 11 ते 1 दरम्यान, श्रीरामांची पूजा करण्याची प्रथा आहे. यावेळी घरोघरी आणि मंदिरांमध्ये रामाची मूर्ती पाळण्यात ठेवून पूजा केली जाते, रामजन्माचा पाळणा म्हटला जातो. प्रसाद म्हणून फळे आणि मिठाई वाटली जाते. या दिवशी काही भक्त निर्जला उपवास करतात, म्हणजेच पाणीही घेत नाहीत, तर काही फळे आणि दूध घेऊन सात्त्विक उपवास पाळतात. संध्याकाळी पूजा आणि आरतीनंतर उपवास सोडला जातो.
या दिवसाचे औचित्य साधत खास Messages, Wishes, WhatsApp Status, HD Images द्वारे शुभेच्छा पाठवून साजरा करा राम नवमीचा सण. (हेही वाचा; Ram Navami 2025: अयोध्या राम जन्मभूमी मंदिराला राम नवमी च्या पार्श्वभूमी वर आकर्षक रोषणाई)
दरम्यान, हिंदू धर्मग्रंथानुसार, त्रेतायुगातील रावणाचे अत्याचार संपवण्यासाठी आणि धर्माची पुनर्स्थापना करण्यासाठी भगवान विष्णूने मृत्यूच्या जगात श्री राम म्हणून अवतार घेतला. राम नवमी हा फक्त धार्मिक सण नाही, तर तो प्रभू रामांच्या मर्यादा, धर्म आणि नीतिमत्तेच्या आदर्शांचा उत्सव आहे. त्यांचे जीवन आपल्याला सत्य, कर्तव्य आणि न्यायाचे महत्त्व शिकवते. महाराष्ट्रातही हा सण मोठ्या भक्तिभावाने साजरा होतो. पुणे, नाशिक आणि मुंबईसारख्या शहरांत मंदिरांमध्ये कीर्तन, भजन आणि रामायण पठणाचे कार्यक्रम होतात.
