Zomato Hikes Platform Fee: आता झोमॅटोवरून खाद्यपदार्थ ऑर्डर करणे झाले महाग; प्लॅटफॉर्म फी 25 टक्क्यांनी वाढली
फूड डिलिव्हरी कंपनीने प्लॅटफॉर्म फीमध्ये आणखी वाढ केली आहे. प्लॅटफॉर्म फीमध्ये 25 टक्के वाढ करून ती आता प्रति ऑर्डर 5 रुपये करण्यात आली आहे. याचा अर्थ आता तुम्हाला झोमॅटोकडून फूड डिलिव्हरीसाठी प्रति ऑर्डर 5 रुपये खर्च करावे लागतील.
Zomato Hikes Platform Fee: ऑनलाइन फूड डिलिव्हरी प्लॅटफॉर्म झोमॅटो (Zomato) वरून अन्न ऑर्डर करणे आता थोडे महाग होणार आहे, कारण फूड डिलिव्हरी कंपनीने प्लॅटफॉर्म फीमध्ये आणखी वाढ केली आहे. प्लॅटफॉर्म फीमध्ये 25 टक्के वाढ करून ती आता प्रति ऑर्डर 5 रुपये करण्यात आली आहे. याचा अर्थ आता तुम्हाला झोमॅटोकडून फूड डिलिव्हरीसाठी प्रति ऑर्डर 5 रुपये खर्च करावे लागतील. यासह कंपनीने आपली इंटरसिटी फूड डिलिव्हरी सेवा 'लिजेंड्स' देखील सध्यासाठी बंद केली आहे.
काही काळापासून झोमॅटोने प्लॅटफॉर्म फी मध्ये अनेक वेळा वाढ केली आहे. ऑगस्ट 2023 मध्ये लॉन्च झाल्यापासून, प्लॅटफॉर्म फी अनेक वेळा बदलली गेली आणि वाढवली गेली. ती 2 रुपयांपासून सुरू झाली, नंतर ती 3 रुपये करण्यात आली. त्यानंतर जानेवारीत ती चार रुपये करण्यात आली होती आणि आता प्लॅटफॉर्म शुल्क 4 रुपयांवरून 5 रुपये करण्यात आले आहे.
झोमॅटो कार्यरत असलेल्या सर्व शहरांमध्ये शुल्क वाढवण्यात आले आहे की नाही हे अद्याप स्पष्ट झालेले नाही. झोमॅटो गोल्डसह सर्व ग्राहकांवर नवीन प्लॅटफॉर्म शुल्क लागू करण्यात आले आहे. याआधी झोमॅटोने मोठी ऑर्डर फ्लीट लॉन्च केला आहे. या फ्लीटद्वारे, ग्राहक आता थेट झोमॅटोवरून एकावेळी 50 लोकांसाठी जेवण ऑर्डर करू शकतात. या सेवेच्या माध्यमातून पार्ट्या, वाढदिवस आणि इतर छोट्या कार्यक्रमांच्या ऑर्डर्स मिळवून आपला बाजारातील हिस्सा वाढवण्याचा कंपनीचा प्रयत्न आहे.
झोमॅटोचे मुख्य कार्यकारी अधिकारी (CEO) दीपंदर गोयल यांनी सोशल मीडिया प्लॅटफॉर्म 'X' वर त्यांच्या अनेक पोस्टमध्ये ही माहिती दिली. गोयल म्हणाले, 'भारताची पहिली मोठी ऑर्डर फ्लीट सादर करताना आम्हाला आनंद होत आहे. हे पथक तुमच्या सर्व मोठ्या ऑर्डर्स जसे की मोठी पार्टी, बर्थडे आणि कार्यक्रम सहजपणे हाताळण्यास सक्षम असेल. संपूर्णपणे इलेक्ट्रिक वाहनांवर आधारित हे पथक 50 लोकांपर्यंत ऑर्डर देण्यासाठी डिझाइन केलेले आहे.' (हेही वाचा: Child Dies Due to Eating Expired Chocolate: कालबाह्यता तारीख उलटलेले चॉकलेट खाल्ल्याने लुधियाना येथील दीड वर्षाच्या मुलीचा मृत्यू)
दरम्यान, नुकतेच ऑनलाइन फूड डिलिव्हरी प्लॅटफॉर्म झोमॅटोला जीएसटी प्राधिकरणाकडून 11.82 कोटी रुपयांची कर मागणी आणि दंड भरण्याचा आदेश प्राप्त झाला आहे. ही सूचना (GST सूचना) कंपनीने जुलै 2017 ते मार्च 2021 दरम्यान भारताबाहेरील तिच्या उपकंपनींना पुरवलेल्या निर्यात सेवांच्या संदर्भात प्राप्त झाली आहे.
(The above story first appeared on LatestLY on Apr 22, 2024 06:15 PM IST. For more news and updates on politics, world, sports, entertainment and lifestyle, log on to our website latestly.com).
