QuickLY
Socially
Pune Rains Update: जोरदार वाऱ्यासह मंगळवार संध्याकाळी झालेल्या मुसळधार पावसामुळे पुणे येथे शहराच्या वेगवेगळ्या भागात दोन मोठे होर्डिंग कोसळले (Hoarding Collapse Pune) आणि अनेक वाहनांचे नुकसान झाले. सुदैवाने, दोन्ही घटनांमध्ये कोणतीही जीवितहानी झाली नाही, असे पुणे पोलिसांनी सांगितले. पुणे-अहिल्यानगर रस्त्यावरील सणसवाडी चौकात दुपारी 3.30 वाजता एक होर्डिंग कोसळले, ज्यामुळे किमान पाच वाहनांचे नुकसान झाले. दुसऱ्या एका घटनेत, धानोरी परिसरात एक होर्डिंग कोसळल्याने स्थानिकांमध्ये भीतीचे वातावरण निर्माण झाले परंतु कोणतीही जीवितहानी झाली नाही.
पाणी साचल्याने सामान्य जनजीवन विस्कळीत
पुण्यातील अनेक भागात मुसळधार पाऊस आणि पाणी साचल्याने सामान्य जनजीवन विस्कळीत झाले. शहरातील अग्निशमन विभागाने येरवडा, धानोरी, कोरेगाव पार्क, टिंगरे नगर, एरंडवणे, हडपसर आणि फातिमा नगर यासारख्या भागात झाडे पडण्याच्या किमान 15 घटनांची नोंद केली आहे. (हेही वाचा, Maharashtra Weather Forecast: महाराष्ट्रात 25 मे पर्यंत मुसळधार पाऊस; विविध जिल्ह्यांमध्ये वादळी वारे आणि विजांचा गडगडाट, जाणून घ्या हवामान अंदाज)
होर्डिंग्ज कोसळल्याने परिसरात घबराट
Pune, Maharashtra: Heavy rains caused a hoarding to collapse near Sansavadi on the Pune–Ahilyanagar road at Wagholi, trapping 7–8 two-wheelers underneath. No injuries were reported pic.twitter.com/oEWNJx6bI2
— IANS (@ians_india) May 20, 2025
या वर्षी मराठवाड्यात पावसामुळे 27 मृत्यू
पीटीआयने आपल्या वृत्तात दिलेल्या अधिकृत आकडेवारीनुसार, 2025 मध्ये आतापर्यंत महाराष्ट्रातील मराठवाडा प्रदेशात पावसामुळे होणाऱ्या विविध घटनांमध्ये 27 जणांना आपला जीव गमवावा लागला आहे. या घटनांमध्ये वीज कोसळणे, अचानक पूर येणे आणि वादळामुळे होणाऱ्या अपघातांचा समावेश आहे. (हेही वाचा, Maharashtra Weather Update: मुंबईसह कोकणात पुढील चार दिवस यलो अलर्ट; वादळी वाऱ्यासह मुसळधार पावसाचा इशारा)
विभागीय आयुक्त कार्यालयाने दिलेल्या माहितीनुसार, 20 मे पर्यंत मराठवाड्यातील आठही जिल्ह्यांमध्ये अवकाळी पाऊस पडला आणि या महिन्यात या प्रदेशात सरासरीपेक्षा 116% जास्त पाऊस पडला.
मानवी जीवितहानी आणि पशुंचाही मृत्यू
मानवी जीवितहानी व्यतिरिक्त, 391 जनावरे देखील मृत्युमुखी पडली आहेत. अवकाळी पावसामुळे 4,218.54 हेक्टर शेतजमिनीवरील पिकांवर परिणाम झाला आहे, ज्यामुळे एकूण 597 गावे प्रभावित झाली आहेत. त्यापैकी जालना जिल्ह्यात सर्वाधिक1,925.76 हेक्टर क्षेत्रावर पीक नुकसान झाले आहे. भारतीय हवामान विभागाने 21-24 मे दरम्यान महाराष्ट्रासाठी पावसाचा इशारा जारी केला आहे.
भारतीय हवामान विभागाने (IMD) महाराष्ट्रात आणखी पावसाचा अंदाज वर्तवला आहे, कर्नाटक किनाऱ्याजवळ पूर्व-मध्य अरबी समुद्रावर चक्रीवादळ निर्माण झाल्यामुळे 21मे ते 24 मे दरम्यान मेघगर्जनेसह आणि सोसाट्याच्या वाऱ्यांसह मुसळधार पाऊस पडण्याचा इशारा दिला आहे. दरम्यान, 22 मे च्या सुमारास याच प्रदेशात कमी दाबाचे क्षेत्र तयार होण्याची शक्यता आहे, जे तीव्र होऊन उत्तरेकडे सरकू शकते, ज्यामुळे संपूर्ण राज्यात पावसाळी घटना वाढण्याची शक्यता आहे.
