1st Case of HMPV in India: चीनमध्ये कहर करणाऱ्या एचएमपीव्ही नावाच्या व्हायरसचा भारतात प्रवेश; बंगळुरू येथील 8 महिन्यांच्या बाळाला झाली लागण

जगाला हादरवून सोडणाऱ्या कोविड-19 महामारीनंतर चीनमध्ये (China) एचएमपीव्ही (HMPV) नावाच्या विषाणूने दार ठोठावले. आता भारतात त्याचे पहिले प्रकरण समोर आले आहे. बंगळुरू येथील रुग्णालयात आठ महिन्यांच्या मुलामध्ये या विषाणूची पुष्टी झाली आहे. या विषाणूबाबत लॅबमध्ये याची चाचणी केली नसल्याचे आरोग्य विभागाचे म्हणणे आहे. या प्रकरणाचा अहवाल एका खासगी रुग्णालयात आला आहे. आश्चर्याची गोष्ट म्हणजे या बाळाचा कोणताही प्रवासाचा इतिहास नाही, म्हणजेच हे बाळ चीन किंवा इतर कोठेही गेले नाही.

एचएमपीव्ही मुख्यतः मुले आणि वृद्धांना लक्ष्य करतो. चीनमध्ये हा विषाणू प्रामुख्याने मुलांमध्ये आढळून आला आहे. त्याची लक्षणे कोरोना सारखीच आहेत. यामध्ये सर्दी-खोकला यांचाही समावेश आहे.

काय आहे हा व्हायरस?

एचएमपीव्ही म्हणजेच ह्युमन मेटाप्युमोव्हायरस हा आरएनए विषाणू आहे. एक प्रकारे तो कोरोनासारखाच आहे. ह्युमन मेटाप्युमोव्हायरस हा एक सामान्य श्वसन विषाणू आहे. हा विषाणू एक प्रकारे हंगामी आहे, ज्याचा प्रभाव सहसा हिवाळा आणि वसंत ऋतूमध्ये दिसून येतो. तो अगदी फ्लूसारखा आहे.

चीनमध्ये कहर-

नुकताच चीनमध्ये हा विषाणू आढळून आला असून, हळूहळू तो आता धोकादायक रूप धारण करत आहे. लाखो लोक त्याला बळी पडले आहेत. रुग्णालयांमध्ये गर्दी वाढली आहे. मात्र, चीन अजूनही आपला विध्वंस नाकारत आहे. हा विषाणू 1958 पासून पृथ्वीवर आहे. पण शास्त्रज्ञांनी 2001 मध्ये पहिल्यांदा याचा शोध लावला. आतापर्यंत त्याची लस तयार झालेली नाही.

लक्षणे-

हा विषाणू मुख्यतः लहान मुले आणि वृद्धांवर हल्ला करतो.

यामध्ये श्वसन आणि फुफ्फुसाच्या नळ्यांमध्ये संसर्ग होतो.

यामुळे खोकला आणि श्वास घेण्यास त्रास होतो.

घसा खवखवणे, डोकेदुखी आणि थकवा.

खोकला, ताप, सर्दी आणि वाहणारे नाक.

दरम्यान, जर तुम्ही व्हायरसने संक्रमित व्यक्तीच्या संपर्कात आलात तर तुम्हालाही या विषाणूची लागण होऊ शकते. या व्हायरसमुळे भारत सरकारदेखील अलर्ट मोडवर आहे. महाराष्ट्राचा आरोग्य विभाग सतर्क आहे. महाराष्ट्र सरकारच्या आरोग्य विभागाने नागरिकांना घाबरू नका, तर सावध राहण्याचा सल्ला दिला आहे. सर्दी-खोकल्याच्या रुग्णांचे नियमित सर्वेक्षण करण्याचे आदेश अधिकाऱ्यांना देण्यात आले. स्वच्छतेच्या नियमांचे पालन करण्याचे आदेशही देण्यात आले.

(The above story first appeared on LatestLY on Jan 06, 2025 10:33 AM IST. For more news and updates on politics, world, sports, entertainment and lifestyle, log on to our website latestly.com).