रविवारी पूरग्रस्त राज्य सिक्कीममधील अधिकाऱ्यांनी एकूण 77 मृत्यूची पुष्टी केली. राज्याचे मदत आयुक्त अनिलराज राय यांनी सांगितले की, सिक्कीमच्या विविध भागांतून आतापर्यंत एकूण 29 मृतदेह बाहेर काढण्यात आले असून, बचावकार्य सुरू आहे. राज्यात 3 ऑक्टोबर रोजी उच्च उंचीचे हिमनदी तलाव फुटले, ज्यामुळे अचानक पूर आला. पूर आल्यानंतर चार दिवसांनी तिस्ता नदीकाठच्या पाण्याची पातळी सामान्य झाली असली तरी, सिक्कीमच्या बहुतांश भागात रस्ते, पूल आणि दळणवळण नेटवर्कचे मोठ्या प्रमाणात नुकसान झाले असून अनेक लोक अडकले आहेत. (हेही वाचा - Sikkim Flash Floods: लाचेन, लाचुंगमध्ये 3,000 हून अधिक पर्यटक अडकले)

राज्याच्या आपत्ती नियंत्रण कक्षाने आतापर्यंत पुरात अडकलेल्या 2,500 हून अधिक लोकांना वाचवले असल्याची माहिती दिली आहे. राज्याच्या उत्तरेकडील भागातील सुमारे 3,000 लोक मदत शिबिरांमध्ये अजूनही सुरक्षिततेकडे परत येण्याच्या प्रतीक्षेत आहेत, प्रतिकूल हवामानामुळे एअरलिफ्ट बचावला विलंब झाला आहे. दरम्यान, रविवारी उत्तर सिक्कीममधील चुंगथांग येथे इंडो-तिबेटन बॉर्डर पोलिस (ITBP) च्या बचाव पथकाने बनवलेल्या रोपवेद्वारे 52 पुरुष आणि 4 महिलांसह 56 नागरिकांची यशस्वीरित्या सुटका करण्यात आली.

केंद्रीय गृहराज्यमंत्री (MoS), अजय कुमार मिश्रा यांनी रविवारी मुख्यमंत्री प्रेमसिंग तमांग यांच्या गंगटोक येथील निवासस्थानी अचानक आलेल्या पुराबाबत बैठक घेतली. बैठकीनंतर माध्यमांशी बोलताना सीएम तमांग म्हणाले की, पूरग्रस्त राज्यात पूर्वस्थिती पूर्ववत करण्यासाठी राज्य आणि केंद्र सरकार सहकार्य करत आहेत. "आम्ही नुकतेच राज्याचे गृहराज्यमंत्री अजय कुमार यांच्याशी राज्यातील अचानक आलेल्या पुराबाबत बैठक घेतली. पंतप्रधान मोदी, केंद्रीय गृहमंत्री अमित शहा आणि संपूर्ण केंद्र सरकार सिक्कीमच्या लोकांच्या पाठीशी उभे आहे. लोकांना वाचवण्यासाठी एनडीआरएफची टीम पाठवण्यात आली आहे, सीएम तमांग म्हणाले.