Mumbai Local Train Update: मुसळधार पावसातही मुंबई लोकल सुरळीत, अधिकाऱ्यांची माहिती
Representational Image (Photo Credits: IANS)

मुंबई आणि उपनगरात मुसळधार पाऊस (Rain) सुरूच असून जनजीवन विस्कळीत झाले आहे. मुंबई शहरात गेल्या 24 तासात 50 मिमीपेक्षा जास्त पावसाची नोंद झाली आहे, तर सांताक्रूझमध्ये 62 मिमी पाऊस झाला आहे. बृहन्मुंबई महानगरपालिका (BMC) ने म्हटले आहे की बुधवारी मुंबई आणि त्याच्या उपनगरात मध्यम ते मुसळधार पाऊस पडण्याची शक्यता असून काही ठिकाणी मुसळधार ते अति मुसळधार पाऊस पडण्याची शक्यता आहे. अधूनमधून वादळी वारे 45-55 किमी प्रतितास वेगाने वाहण्याची शक्यता आहे, बीएमसीने सांगितले. मध्य रेल्वे आणि पश्चिम रेल्वे कॉरिडॉरवर लोकल ट्रेन सेवा सुरळीत सुरू असल्याचे एका नागरी अधिकाऱ्याने सांगितले.

मात्र, मुंबईची जीवनवाहिनी समजल्या जाणाऱ्या लोकल गाड्या पाच ते दहा मिनिटे उशिराने धावत असल्याचा दावा काही प्रवाशांनी केला. पश्चिम रेल्वेने एक व्हिडिओ शेअर करत ट्विट केले की, मुसळधार पाऊस असूनही पश्चिम रेल्वेच्या मुंबई उपनगरीय लोकल सेवा सुरूच आहेत. दरम्यान ठाणे स्थानकात लोकल बंद पडली आहे. त्यामुळे   मध्यची रेल्वे ठप्प झाली आहे. लोकलमध्ये तांत्रिक बिघाड असल्याने लोकल बंद पडल्याचे अधिकाऱ्यांनी सांगितले आहे. कळवा, मुंब्रा स्थानकात स्लो लोकल उभ्या आहेत.

मध्य रेल्वेने ट्विट केले की लोकल ट्रेन CSMT-कल्याण/कर्जत/कसारा/खोपोली, CSMT/पनवेल/गोरेगाव/ठाणे ते वासी आणि बेलापूर/नेरुळ-खारकोपर लाईन दरम्यान सामान्यपणे धावत आहेत.