Mumbai Airport (Photo Credit: PTI)

छत्रपती शिवाजी महाराज आंतरराष्ट्रीय विमानतळाच्या (Mumbai International Airport) टर्मिनल 1 आणि 2 वर 1 जून 2025 पासून प्रीपेड ऑटो-रिक्षा (Prepaid Auto-Rickshaw) सेवा सुरू होईल. शिंदे सेनेचे ज्येष्ठ नेते आणि माजी खासदार गजानन कीर्तिकर यांनी राज्याचे परिवहन मंत्री प्रताप सरनाईक यांच्यासोबत मंत्रालयात बैठक घेऊन याबाबत निर्णय घेतला. या टर्मिनल्सवरून अनेक आंतरराष्ट्रीय आणि देशांतर्गत विमान कंपन्या काम करत असल्याने, प्रवाशांची संख्या दररोज वाढत आहे. सध्या या टर्मिनल्सवर फक्त प्रीपेड टॅक्सी सेवा उपलब्ध आहे. या ठिकाणी टॅक्सी चालकांना अनेकदा बराच काळ वाट पाहावी लागते आणि जेव्हा त्यांना विलेपार्ले, अंधेरी आणि सांताक्रूझ सारख्या भागात कमी अंतराचे भाडे मिळते तेव्हा त्यांना आर्थिक नुकसान सहन करावे लागते.

अनेक प्रवासी कमी अंतरासाठी रिक्षा पसंत करतात, परंतु याचा फायदा घेत विमानतळाबाहेर अनधिकृत रिक्षाचालक प्रवाशांकडून जास्त पैसे घेतात. प्रीपेड टॅक्सींप्रमाणेच प्रीपेड ऑटो-रिक्षा सेवा सुरू करण्यासाठी कीर्तिकर प्रादेशिक परिवहन कार्यालय, अदानी विमानतळ आणि मुंबई आंतरराष्ट्रीय विमानतळ प्राधिकरणाच्या अधिकाऱ्यांकडे सातत्याने पाठपुरावा करत होते. सर्व विभागांकडून सकारात्मक अहवाल असूनही, विमानतळ प्राधिकरण अंमलबजावणी करण्यास विलंब करत असल्याचा आरोप त्यांनी केला.

परिवहन मंत्री प्रताप सरनाईक यांनी मंत्रालयात सर्व संबंधित अधिकाऱ्यांसोबत बैठक घेतली, जिथे सविस्तर चर्चेनंतर त्यांनी आश्वासन दिले की प्रीपेड ऑटो-रिक्षा सेवा 1 जून 2025 रोजी सुरू होईल. परिवहन मंत्री सरनाईक यांनी सांगितले की, छत्रपती शिवाजी महाराज आंतरराष्ट्रीय विमानतळाचे  व्यवस्थापन अदानी समूहाकडे असून अदानी समूह व परिवहन विभागाच्या समन्वयातून येत्या दोन महिन्यांत  प्रिप्रेड रिक्षा सेवा सुरू करण्यासाठी सर्व आवश्यक पायाभूत सुविधा निर्माण कराव्यात. (हेही वाचा: Gautam Adani यांनी दिली Navi Mumbai Airport ला भेट; विमानतळ जून 2025 पर्यंत उद्घाटनासाठी होणार सज्ज)

आजच्या बैठकीत नाशिक, सिंधुदुर्ग जिल्ह्यातील बसस्थानकांच्या कामकाजाचा आढावाही परिवहन मंत्री प्रताप सरनाईक यांनी घेतला. सिंधुदुर्ग जिल्ह्यातील एसटी महामंडळाच्या प्रलंबित प्रश्नांबाबत मत्स्यव्यवसाय मंत्री राणे म्हणाले की, सिंधुदुर्ग डोंगराळ, दुर्गम जिल्हा असून वाहतुकीसाठी एस टी बस हा एकमेव आधार आहे. त्यामुळे बस सेवा सुरळीतपणे चालू रहावी व प्रवाशांची गैरसोय टाळून त्यांना एसटी बसची सेवा मिळावी, यासाठी भविष्यात सिंधुदुर्ग जिल्ह्यासाठी मिनी बसेस उपलब्ध करून देण्यात याव्यात.