LoP Post In Maharashtra Assembly: महाराष्ट्र विधानसभेतील विरोधी पक्षनेतेपदावर शिवसेना (UBT) चा दावा; दिली आमदार भास्कर जाधव यांना उमेदवारी
शिवसेना (यूबीटी) प्रमुख ठाकरे म्हणाले, शिवसेनेने विरोधी पक्षनेतेपदावर दावा केला आहे. या संदर्भात आम्ही विधानसभा अध्यक्षांना पत्र दिले आहे. आम्हाला खात्री आहे की लोकशाही मूल्ये लक्षात घेऊन निर्णय घेतला जाईल. 26 मार्च रोजी अर्थसंकल्पीय अधिवेशन संपण्यापूर्वी यावर निर्णय घ्यावा, असेही त्यांनी आवर्जून सांगितले.
महाराष्ट्र विधानसभेत (State Assembly) विरोधी पक्षनेते कोण असतील, हे जवळजवळ स्पष्ट झाले आहे. महाराष्ट्र विधानसभेत विरोधी पक्षनेतेपदासाठी शिवसेनेने (UBT) आपला दावा मांडला आहे. पक्षाने या कॅबिनेट स्तरावरील पदासाठी ज्येष्ठ नेते आमदार भास्कर जाधव यांना उमेदवारी दिली आहे. पक्षप्रमुख उद्धव ठाकरे यांनी स्वतः ही माहिती दिली. त्यांनी सांगितले की, यासंदर्भातील पत्र विधानसभा अध्यक्ष राहुल नार्वेकर यांना सादर करण्यात आले आहे. शिवसेना यूबीटीमध्ये या पदासाठी तीन नावे पुढे आली होती. यामध्ये उद्धव ठाकरे यांचे पुत्र आदित्य ठाकरे, सुनील प्रभू आणि भास्कर जाधव यांची नावे होती.
शिवसेना (यूबीटी) प्रमुख ठाकरे म्हणाले, शिवसेनेने विरोधी पक्षनेतेपदावर दावा केला आहे. या संदर्भात आम्ही विधानसभा अध्यक्षांना पत्र दिले आहे. आम्हाला खात्री आहे की लोकशाही मूल्ये लक्षात घेऊन निर्णय घेतला जाईल. 26 मार्च रोजी अर्थसंकल्पीय अधिवेशन संपण्यापूर्वी यावर निर्णय घ्यावा, असेही त्यांनी आवर्जून सांगितले. विरोधी पक्षनेतेपदावर कोणतेही 'रोटेशन' होणार नसून, आपला पक्ष हे पद कायम ठेवणार असल्याचे ठाकरे यांनी स्पष्ट केले.
विरोधी पक्षांमध्ये शिवसेनेचे (UBT) सर्वाधिक 20 आमदार आहेत. विरोधी पक्षनेत्याला कॅबिनेट मंत्र्याच्या पातळीवर सुविधा दिल्या जातात. सोमवारी, राष्ट्रवादी काँग्रेसने (एसपी) विरोधी पक्षनेतेपद विरोधी महाविकास आघाडीच्या (एमव्हीए) तीन घटकांमध्ये रोटेशनद्वारे वाटून घेण्याची मागणी केली होती. नार्वेकर यांना भेटण्यापूर्वी ठाकरे यांनी महाविकास आघाडी नेत्यांची बैठक घेतली. त्यांनी राष्ट्रवादी काँग्रेसचे राज्यप्रमुख जयंत पाटील आणि पक्षाचे गटनेते जितेंद्र आव्हाड यांच्याशी चर्चा केली, यावेळी काँग्रेसचा कोणताही नेता उपस्थित नव्हता. (हेही वाचा: Bhaskar Jadhav Leader of Opposition: भास्कर जाधव यांचे नाव निश्चित, पण विरोधी पक्षनेतेपदासाठी फॉर्म्युला काय? उद्धव ठाकरे यांनी स्पष्टच सांगितले, घ्या जाणून)
विरोधी पक्षनेत्याच्या मुद्द्यावर शिवसेना-यूबीटी आमदार आदित्य ठाकरे म्हणाले होते की, हा पदाचा मुद्दा किंवा आमच्यातील वादाचा विषय नाही. आम्ही अर्थसंकल्पीय अधिवेशनात सार्वजनिक मुद्दे उपस्थित करणार आहोत. दरम्यान, रत्नागिरी जिल्ह्यातील गुहागरचे आमदार जाधव हे 1990 च्या दशकात संयुक्त शिवसेनेत होते. त्यानंतर ते अविभाजित राष्ट्रवादी काँग्रेसमध्ये गेले आणि 2019 मध्ये पुन्हा शिवसेनेत दाखल झाले. त्यांच्या प्रदीर्घ राजकीय कारकिर्दीमुळे त्यांचे सर्व पक्षांमध्ये संपर्क आहेत. उद्धव ठाकरे यांनी त्यांच्या अनुभवाचा विचार करून भास्कर जाधव यांचे नाव पुढे केले.
(The above story first appeared on LatestLY on Mar 05, 2025 09:27 AM IST. For more news and updates on politics, world, sports, entertainment and lifestyle, log on to our website latestly.com).
