Amruta Fadnavis | (Photo Credits: Facebook)

उपमुख्यमंत्री देवेंद्र फडणवीस यांच्या नेतृत्वाखालील गृह विभागाने मुख्यमंत्री एकनाथ शिंदे यांच्या गटाच्या (शिवसेना) सर्व 41 आमदारांना आणि लोकसभेच्या 10 खासदारांना विशेष वाय प्लस सुरक्षा पुरवण्याचा निर्णय घेतला आहे. या निर्णयातील विशेष बाब म्हणजे देवेंद्र फडणवीस यांच्या पत्नी अमृता फडणवीस (Amruta Fadnavis) यांच्या सुरक्षेतही वाढ करण्यात आली आहे. एवढेच नाही तर त्यांच्यासाठी नवीन स्कॉट व्हेईकल (Traffic Clearance Vehicle) देखील मंजूर करण्यात आले आहे.

राज्याच्या गुप्तचर विभागाच्या अहवालानंतर महाराष्ट्र सरकारने हा निर्णय घेतल्याचे सांगण्यात येत आहे. देवेंद्र फडणवीस यांच्या पत्नी अमृता फडणवीस यांना आतापर्यंत X+ सुरक्षा होती, ती Y+ सुरक्षा करण्यात आली आहे. अमृता फडणवीस जिथे जातील तिथे त्यांच्यासोबत ट्रॅफिक क्लिअरन्स वाहन देखील असेल. वाय प्लस सिक्युरिटीनुसार अमृता फडणवीस यांच्याकडे आता एक एस्कॉर्ट व्हॅन आणि पाच पोलीस कर्मचारी असतील.

अमृता फडणवीस यांच्यासोबत 24 तास पोलिस बंदोबस्त असेल, तर ट्रॅफिक क्लिअरन्स वाहन हे पायलट व्हॅनप्रमाणे काम करेल. त्यामुळे अमृता फडणवीस प्रवास करत असताना संबंधित परिसरात रस्ता मोकळा राहील याची काळजी घेतली जाईल. देवेंद्र फडणवीस यांच्या गृहमंत्रालयाने नुकताच याबाबतचा आदेश जारी केला आहे. त्यानंतर मुंबई पोलिसांच्या सुरक्षा विभागाने वाहतूक विभागाला सूचना दिल्या.

अमृता फडणवीस यांच्या वाढलेल्या सुरक्षेवर देवेंद्र फडणवीस यांनी भाष्य केले. अमृता फडणवीस यांनी वाय लेव्हल सुरक्षेची मागणी केलेली नाही, मात्र अमृता फडणवीस यांना असलेला धोका लक्षात घेऊन उच्चस्तरीय समितीने सुरक्षा वाढवण्याचा निर्णय घेतला, असे फडणवीस म्हणाले. उपमुख्यमंत्र्यांनी स्पष्ट केले की, अमृता यांच्याकडून ट्रॅफिक क्लिअरन्स वाहनाची मागणी नव्हती. अमृता फडणवीस यांनी स्वतः मुंबई पोलिसांना सांगितले होते की, त्यांना ट्रॅफिक क्लिअरन्स वाहनाची गरज नाही, मात्र त्यांच्या सुरक्षेमुळे हा निर्णय घेण्यात आला आहे.

शिंदे, फडणवीस आणि राज्यपाल बीएस कोश्यारी यांचे Z+ कव्हरही कायम ठेवण्यात आले आहे. मनसे प्रमुख राज ठाकरे, उद्धव ठाकरे यांच्या पत्नी रश्मी ठाकरे आणि मुलगा तेजस आणि शिंदे यांचा मुलगा श्रीकांत यांच्या Y+ कव्हरमध्ये कोणताही बदल झालेला नाही. (हेही वाचा: Sanjay Raut Bail Plea: संजय राऊत आत की बाहेर? न्यायालय 9 नोव्हेंबरला देणार निकाल, तूर्तास मात्र कोठडीत वाढ)

रामटेक लोकसभा सदस्य कृपाल तामाणे यांची सुरक्षा राज्याच्या गृह विभागाने वाढवली आहे. भ्रष्टाचारविरोधी लढवय्ये अण्णा हजारे यांची झेड श्रेणीची सुरक्षा कायम राहणार आहे. माजी शहर पोलीस आयुक्त परमबीर सिंग यांच्या गुन्ह्याची चौकशी करणारे न्यायमूर्ती केयू चांदीवाल यांची सुरक्षा काढून घेण्यात आली आहे. भाजपचे प्रदेशाध्यक्ष चंद्रशेखर बावनकुळे यांना एस्कॉर्टस Y+ कव्हर देण्यात आले आहे. अंबानी कुटुंबाला Z+ सुरक्षा प्रदान करण्यात आली आहे, तर अभिनेता सलमान खानला एका एस्कॉर्टसह Y+ सुरक्षा कवच देण्यात आले आहे.