• 09 Aug, 18:48

    पुणे, कोल्हापूर, सातारा आणि सांगली येथे आतापर्यंत 29 जणांचा मृत्यू

    -महाराष्ट्रातील पुणे, कोल्हापूर, सातारा, सोलापूर आणि सांगली येथे  निर्माण झालेल्या पुरस्थितीत 29 जणांचा आतापर्यंत मृत्यू झाला  आहे.
    - पुराच्या पाण्यात अद्याप  6 जण  बेपत्ता असून त्यांचे शोधकार्य सुरु आहे.
    -आतापर्यंत 2.85 लाख  नागरिकांना पुण्यातील सुखरुप ठिकाणी पोहचवण्यात आले आहे. 

  • 09 Aug, 16:38

    महाराष्ट्रात पूर संकटामुळे MPSC ची परीक्षा दोन आठवडे पुढे ढकलली, परीक्षार्थींना दिलासा

    महाराष्ट्र लोकसेवा आयोगामार्फत घेण्यात येणाऱ्या MPSC  (STI main paper) 2019 चा मुख्य पेपर क्रमांक 2 राज्यातील पुरपरिस्थितीमुळे पुढे ढकलण्यात आला आहे. त्यामुळे, रविवारी 11 ऑगस्ट रोजी नियोजित परीक्षा रद्द करून आता 24 ऑगस्ट ला घेण्यात येणार आहे.  याबाबत आयोगाने परिपत्रक जारी करुन माहिती दिली. कोल्हापूर, सांगली सातारा आणि राज्यातील इतर जिल्ह्यात पूर परिस्थिती निर्माण झाल्यामुळे अनेक विद्यार्थ्यांनी याबाबत आयोगाकडे मागणी केली होती. लवकरच सुधारित हॉलतिकीट आयोगाच्या वेबसाईटवर उपलब्ध होईल.

    Maharashtra Public Service Commission Exam (Photo Credits: Twitter)

  • 09 Aug, 15:44

    कोल्हापूर, सांगली पुरग्रस्तांच्या मदतीला उतरली भारतीय सेना, मुंबईतील 10 टीम बचावकार्यात सहभागी

    कोल्हापूर, सांगली, रायगड परिसरात पावसामुळे पूरजन्य परिस्थिती निर्माण झाली असून पुरात अडकलेल्या नागरिकांना सोडवण्यासाठी युद्धपातळीवर बचावकार्य सुरु आहे. या कार्यात आता मुंबईतील सैन्याच्या 10 टीमही सहभागी झाल्या आहेत. रस्त्यावर साचलेल्या पाण्यात बोटीतून मार्ग काढत नागरिकांना सुरक्षित स्थानी हलविण्याचे काम अद्याप सुरु आहे.

    ANI ट्विट 

  • 09 Aug, 15:07

    महाराष्ट्र्र सरकारचे अजब परिपत्रक, दोन दिवस पूरात बुडाल्यासच मिळणार मदतीचा हात

    महाराष्ट्राला पावसाने झोडपलं असताना, अनेकांचे जीव धोक्यात असताना नागरिक ज्या सरकारकडे अपेक्षेने पाहतात त्यांनी आता एक नवा जीआर काढून नागरिकांची जणू थट्टा केली आहे.या जीआर मधील प्रमुख अटीनुसार एखादा परिसर दोन दिवसांहून अधिक काळ पाण्याखाली असेल तरच तेथील नागरिकांना मोफत अन्नधान्य देण्यात येईल, असे समजत आहे.

    Maharashtra Government GR (Photo Credits: Twitter)

    पहा हे परिपत्रक

  • 09 Aug, 13:02

    महाराष्ट्रात पुराने एका आठवड्यात घेतले ३० बळी, २ लाखाहून अधिक नागरिकांचे स्थलांतर

    महाराष्ट्रात मागील आठवड्यात पुणे, नाशिक, सांगली, सातारा, कोल्हापूर व अन्य अनेक ठिकाणी पुरामुळे झालेल्या दुर्दशेची आकडेवारी मांडणारा एक अहवाल आज, 9 ऑगस्ट रोजी मांडण्यात आला. ज्यानुसार, अवघ्या सात दिवसात महाराष्ट्रात पुरामुळे ठिकठिकाणी 30 जणांचा बळी गेला आहे. तर सुमारे दोन लाखाहून अधिक नागरिकांची स्थलांतर करण्यात आले आहे. 

  • 09 Aug, 12:33

    मुख्यमंत्री देवेंद्र फडणवीस यांची आलमट्टी धरणातून पाण्याचा विसर्ग करण्याची विनंती कर्नाटक सरकारने फेटाळली, कोल्हापूर वरील संकट कायम

    कोल्हापूर मधील पूरजन्य परिस्थीतीवर दिलासा मिळावा या हेतूने मुख्यमंत्री देवेंद्र फडणवीस यांनी कर्नाटक सरकारकडे आलमट्टी धरणातून 5 लाख क्युसेक्स पाणी सोडण्याची विनंती केली होती. मात्र सद्य परिस्थितीत दोन्ही राज्यातील अवस्था पाहता कर्नाटक सरकारने ही मागणी फेटाळुन लावली आहे. त्यामुळे आलमट्टी धरणातून अपेक्षित विसर्ग होणार नसल्याचे समजत आहे. 

  • 09 Aug, 11:44

    कोल्हापूर पुरग्रस्तांच्या भेटीला गेलेल्या गिरीश महाजन यांचा हसत सेल्फी काढतानाचा व्हिडीओ व्हायरल

    कोल्हापूर पूर ग्रस्तांच्या भेटीला गेलेले जलसंपदा मंत्री गिरीश महाजन यांचा एक व्हिडीओ सध्या सोशल मीडियावर पाहायला मिळत आहे. एका बोट मध्ये बसून पोलीस व अन्य अधिकाऱ्यांसह पूर पाहणी करताना महाजन यांना सेल्फी काढण्याचा मोह न आवरला नाही. त्यामुळे अशा आपत्कालीन परिस्थितीत हजारो लोक अडकले असताना महाजन मात्र या व्हिडिओमध्ये हसत सेल्फी काढण्यात मग्न असलेले पाहायला मिळत आहेत. 

    गिरीश महाजन व्हिडीओ 

  • 09 Aug, 11:14

    कोल्हापूर मधील किनी गावच्या पुरात 500 जण अडकले, वाहतूक ठप्प

    कोल्हापूर मधील पावसाचा जोर अद्याप कायम असून छोटयाछोट्या खेड्यांमध्ये पूरजन्य परिस्थिती निर्माण झाली आहे. हवामान खात्याच्या अंदाजानुसार येत्या 48 तासातही कोल्हापूर सह सांगली सातारा रेड अलर्ट वर असणार आहे. अशातच किनी गावात 500 जण अडकल्याची माहिती समोर येत आहे.  या नागरिकांच्या सुटकेसाठी मदतकार्य सुरु असून अनेक सामाजिक संस्थांकडून त्यांना अन्न पुरवण्यात येत आहे. दरम्यान पुरामुळे आसपासच्या रास्त वाहतुकीवर देखील परिणाम झाला आहे.

    ANI ट्विट 

     

  • 09 Aug, 09:54

    मिरज- कराड दरम्यान विशेष रेल्वेची सोय, रेल्वेमंत्री पियुष गोयल यांची माहिती

    महाराष्ट्राला मागील काही दिवसात पावसाने अक्षरशः झोडपून काढले आहे. यामुळे वाहतूक व्यवस्थेला सर्वात मोठा फटका बसला असून जनजीवन विस्कळीत झाले आहे. जागोजागी पाण्यात गेलेले रस्ते आणि वाहतुकीची कोलमडलेली वेळापत्रके पाहता नागरिकांच्या मदतीसाठी मिरज- कराड दरम्यान विशेष रेल्वेची सोय करण्यात आल्याची माहिती रेल्वे मंत्री पियुष गोयल यांनी दिली आहे.

    पहा ट्विट 

  • 09 Aug, 09:44

    कोल्हापूर मधील पूरग्रस्त खिद्रापूर गाव अजूनही मदतीच्या प्रतीक्षेत, 2000 जण अडकले

    कोल्हापूर मध्ये पावसाच्या तडाख्यानानंतर खिद्रापूर या गावाला चारही बाजूनी पाण्याने वेढले आहे, पुराच्या पाण्यात तब्बल 2000 जण अडकल्याची शक्यता वर्तवली जात आहे, मात्र अद्याप याठिकाणी प्रशासनाची मदत पोहचलेली नाही. अशावेळी निदान महिला व बालकांना तरी गावाबाहेर काढण्यासाठी तात्काळ मदत मिळावी अशी ग्रामस्थांनी विनंती केली आहे. 

Load More

मागील काही दिवसात कोल्हापूर (Kolhapur) , सांगली (Sangali) , सातारा (Satara) सह राज्यात अनेक ठिकाणी पावसाने अक्षरशः थैमान घातले आहे. सततच्या पावसामुळे हे परिसर पूर्णतः जलमय झाले आहेत. या ठिकाणची अनेक दृश्य वारंवार समोर येत असून लहानांपासून ते वयोवृद्धांपर्यंत सर्वांनाच या पुराचा जबर फटका बसल्याचे समजत आहे. यामुळे आतापर्यंत पश्चिम महाराष्ट्रात 28 जणांचे बळी गेले असून 239 गावांमधून 1 लाख 11 हजार 365 लोकांचे स्थलांतर करण्यात आले आहे. या ठिकाणच्या नागरिकांच्या बचावकार्यासाठी लष्कर, नौसेना, एनडीआरएफ युद्धपातळीवर कार्यरत आहे, मात्र अद्याप परिस्थिती आटोक्यात आणण्यात यश आलेले नाही.

अशातच , कोल्हापूर मध्ये पंचगंगा नदीच्या पाण्याची पातळी वाढली आहे. त्यातच राधानगरी धरणाचे चार स्वयंचलित दरवाजे उघडल्याने येथील नागरिकांमध्ये पुन्हा भीतीचे वातावरण निर्माण झाले आहे.

दरम्यान, Skymet तर्फे वर्तवण्यात आलेल्या शक्यतेनुसार आज आणि उद्या म्हणजे 9  व 10 ऑगस्ट ला मुंबई सह कोकणात मुसळधार पाऊस होणार आहे. तसेच येत्या दोन ते चार तासात मुख्यतः उत्तर मुंबईत सह उपनगरात जोरदार पाऊस कोसळणार असल्याची शक्यता आहे.