Tiger Death in Nagpur: वाघ मृत्यू प्रकरणी 3 जणांना अटक; नागपूर-उमरेड वनविभागाची कारवाई

Tiger Death in Nagpur: नागपूर प्रादेशिक वनविभाग अंतर्गत येणाऱ्या मकरधोकडा उपवन परिक्षेत्रातील उदसा फॉरेस्ट बिटमध्ये वेकोलीला लागून असलेल्या नाल्यात विद्युत प्रवाह लागून वाघाचा मृत्यू (Tiger Death) झाल्याप्रकरणी उमरेड (Umred) वनविभागाने तिघांना अटक केली. रानडुकरांची शिकार करण्यासाठी वीटभट्टीशेजारील शेतात जिवंत विद्युत तारा बसविल्याचे सांगण्यात येत आहे. मृत डुक्कर खाऊन नंतर पाणी प्यायला गेलेल्या वाघाचा या तारांना स्पर्श झाल्याने त्याचा मृत्यू झाला.

प्राप्त माहितीनुसार, नागपूर प्रादेशिक वनविभागांतर्गत उमरेड उत्तर वनविभागाच्या अंतर्गत येणाऱ्या मकरधोकडा उप वनपरिक्षेत्रातील उदसा वन बिटमध्ये उमरेड शहराला लागून असलेल्या वेकोली संकुलाला लागून एक नाला आहे. या संकुलात सिमेंटच्या विटा तयार केल्या जातात. हा कारखाना राजेश भोंडे आणि मीनल झाडे यांचा असल्याचे सांगण्यात येत आहे. (हेही वाचा - कळवा मध्ये गॅस एजंसी मध्ये घरगुती एलपीजी सिलेंडरचे स्फोट; 4 जण भीषण जखमी)

या कारखान्यात मध्य प्रदेशातील छिंदवाडा जिल्ह्यातील कामगार काम करतात. 13 मार्च रोजी हॉटेल मालक मारुती कद्रेवार यांना उमरेड वेकोलिच्या बाजूला असलेल्या नाल्यात मृत अवस्थेत वाघ दिसला. त्यांनी ही माहिती उमरेड वनविभागाला दिली. त्यानंतर वनविभागाच्या अधिकाऱ्यांनी घटनास्थळी धाव घेतली.

दरम्यान, वनविभागाने मृत वाघाचे पशुवैद्यकीय पथकाने नमुने घेऊन तपासणीसाठी नागपूर येथील प्रयोगशाळेत पाठवले. 14 मार्च रोजी श्वानपथाच्या मदतीने घटनास्थळाची तपासणी करण्यात आली. यामध्ये विद्युत तारा, ग्रीफ, सॉकेट, मृत रानडुकरांचे अवशेष आढळून आले. 15 मार्च रोजी प्राप्त झालेल्या पोस्टमार्टम अहवालात वाघाचा मृत्यू विद्युत प्रवाहामुळे झाल्याची पुष्टी झाली.

गुप्त माहितीच्या आधारे वीटभट्टीवर काम करणाऱ्या कामगारांनी जंगली प्राण्यांची शिकार करण्यासाठी रात्रीच्या वेळी विद्युत तारा बसवल्याचा प्रकार समोर आला. आतापर्यंत आरोपींनी अनेक रानडुकरांची अशा पद्धतीने शिकार केल्याचीही माहिती समोर आली आहे. या आधारे वीटभट्टी मालक राजू भेंडे व मीनल झाडे व दिवाणजी नवनीत श्यामकुंवर यांना चौकशीसाठी ताब्यात घेण्यात आले. त्यानंतर वनविभागाला आरोपीची माहिती मिळाली.

वनविभागाचे पथक मध्य प्रदेशातील छिंदवाडा जिल्ह्यातील रामपूरभाटा गावात गेले. या ठिकाणाहून पोलिसांनी भैयालाल जंगलू दारासिम्हा, मनकलाल प्रेमलाल दारासिम्हा, आणि दिलीप सुक्कन चिन्नू यांना ताब्यात घेतले आणि उमरेड येथे आणले. येथे वनविभागाच्या पथकाने कडक चौकशी केली असता तिघांनीही गुन्ह्याची कबुली दिली. सोमवारी आरोपींना उमरेड जेएमएफसी न्यायालयात हजर केले जाणार आहे.

(The above story first appeared on LatestLY on Mar 21, 2022 10:03 AM IST. For more news and updates on politics, world, sports, entertainment and lifestyle, log on to our website latestly.com).