QuickLY
Socially
Gorakhpur: मुख्यमंत्री योगी आदित्यनाथ (Chief Minister Yogi Adityanath) आणि गोरखनाथ मंदिर (Gorakhnath Temple) बॉम्बने उडवण्याची धमकी मिळताच एकच खळबळ उडाली आहे. लखनौमधील चारबाग रेल्वे स्थानक आणि बसस्थानक उडवण्याच्या धमक्या मिळाल्यानंतर येथे दक्षता वाढवण्यात आली होती. लेडी डॉन नावाच्या आयडीवरून केलेल्या ट्विटमध्ये लखनऊ विधानसभा आणि मेरठमध्येही बॉम्बस्फोट होण्याची धमकी देण्यात आली आहे. या ट्विटनंतर पोलिसांनी गोरखनाथ मंदिराची सुरक्षा वाढवली आहे. एसएसपीच्या आदेशावरून कँट पोलिसांनी अज्ञाताविरुद्ध धमकावल्याप्रकरणी आणि माहिती तंत्रज्ञान कायद्यान्वये गुन्हा दाखल केला आहे.
लखनौ आयुक्तालयाच्या नियंत्रण कक्षाने जीआरपी अधिकाऱ्यांना फोन आल्याची माहिती दिली. ज्यामध्ये चारबाग स्टेशन बॉम्बने उडवून देण्याची धमकी देण्यात आली होती. लखनौ आयुक्तालय नियंत्रण कक्षाकडून माहिती मिळताच जीआरपी आणि आरपीएफचे जवान घटनास्थळी पोहोचले. श्वान पथक आणि बॉम्ब निकामी पथकाने चारबाग स्थानकाच्या सर्व फलाटांची आणि परिसराची तपासणी केली. जीआरपीनेही गाड्या तपासल्या. एसपी रेल्वे सौमित्र यादव यांनी सांगितले की, या माहितीनंतर आधीच दक्षता वाढवण्यात आली आहे. सर्व संशयितांवर नजर ठेवण्यात येत आहे. त्याचवेळी चारबाग बसस्थानकावरील नाका पोलिसांनी आणि कैसरबाग बसस्थानकातील वजीरगंज पोलिसांनी तपास सुरू केला आहे. (वाचा - PM Modi Inaugurates Statue Of Equality: पंतप्रधान नरेंद्र मोदींंच्या हस्ते समाजसुधारक रामानुजाचार्य यांच्या 216 फूट उंच पुतळ्याचे अनावरण, मूर्ती म्हणजे त्यांच्या ज्ञानाचे, अलिप्ततेचे आणि आदर्शांचे प्रतीक म्हणत दिली प्रतिक्रिया)
शुक्रवारी रात्री लेडी डॉन नावाच्या आयडीवरून तीन ट्विट करण्यात आले. याआधी उत्तर प्रदेश विधानसभा, रेल्वे स्थानक आणि बसस्थानकावर बॉम्ब पेरण्याबाबत लिहिले होते. योगी आदित्यनाथ यांचीही हत्या होणार असल्याचे सांगण्यात आले. तासाभरानंतर योगी आदित्यनाथ यांना जीवे मारण्याची धमकी देण्यात आली. काही वेळाने पुन्हा ट्विट करण्यात आले आणि लिहिले की, सुलेमान भाई यांनी गोरखनाथ मठात बॉम्ब ठेवला आहे. मेरठमध्ये दहा ठिकाणी बॉम्बस्फोट होणार आहेत. एसएसपी डॉ. विपिन टाडा यांनी सांगितले की, माहितीनंतर गोरखनाथ मंदिरात तपासणी करण्यात आली. काहीही आक्षेपार्ह आढळले नाही. पोलीस तपास करत आहेत.
यापूर्वीही मिळाल्या आहेत धमक्या -
उत्तर प्रदेशच्या मुख्यमंत्र्यांना जीवे मारण्याची धमकी मिळण्याची ही पहिलीच वेळ नाही. गेल्या वर्षी मे, सप्टेंबर आणि डिसेंबरमध्ये मुख्यमंत्री योगी आदित्यनाथ यांना जीवे मारण्याची धमकी देणारे कॉल डायल-112 वर आले होते. 29 एप्रिल 2021 रोजी देखील यूपी पोलीस कंट्रोल रूम 112 च्या व्हॉट्सअॅप नंबरवर एका अनोळखी नंबरवरून एक मेसेज आला होता. मेसेजमध्ये सीएम योगी यांना पाचव्या दिवशी जीवे मारण्याची धमकी देण्यात आली होती. मेसेजमध्ये धमकी देणाऱ्याने म्हटले आहे की, चार दिवसांत माझ्याशी जे काही करता येईल ते करा.
