Steve Smith New Record: टीम इंडियाविरुद्ध स्टीव्ह स्मिथचे ऐतिहासिक शतक, रुट आणि पाँटिंगसह सर्वांना सोडले मागे
स्मिथचे हे त्याच्या कसोटी कारकिर्दीतील 34 वे शतक आहे, तर या मालिकेत स्मिथने सलग दुसरे शतक झळकावण्यातही यश मिळवले आहे.
India National Cricket Team vs Australian Men's Cricket Team: भारत विरुद्ध बॉक्सिंग डे कसोटी सामन्याच्या दुसऱ्या दिवशी ऑस्ट्रेलियन संघाचा स्टार खेळाडू स्टीव्ह स्मिथच्या (Steve Smith) बॅटमधून उत्कृष्ट शतक झळकावले. स्मिथचे हे त्याच्या कसोटी कारकिर्दीतील 34 वे शतक आहे, तर या मालिकेत स्मिथने सलग दुसरे शतक झळकावण्यातही यश मिळवले आहे. मेलबर्न कसोटीच्या पहिल्या दिवसाचा खेळ संपला तेव्हा स्मिथ 68 धावांवर नाबाद होता, त्यानंतर दुसऱ्या दिवसाचा खेळ सुरू होताच त्याने कर्णधार पॅट कमिन्ससोबत 7व्या विकेटसाठी शतकी भागीदारी केली. आपल्या शतकाच्या जोरावर स्मिथने अनेक महान खेळाडूंचे विक्रमही मोडीत काढले, ज्यात त्याने विशेष यादीत जो रूटला मागे टाकले आहे.
स्मिथ भारताविरुद्धच्या कसोटीत सर्वाधिक शतके झळकवणारा खेळाडू ठरला आहे
स्टीव्ह स्मिथचे त्याच्या कसोटी कारकिर्दीतील हे 34 वे शतक आहे, तर स्मिथने भारताविरुद्ध या फॉरमॅटमध्ये 11 वे शतक झळकावले आहे. या शतकासह स्टीव्ह स्मिथने जो रूटला मागे टाकले असून तो आता भारताविरुद्ध कसोटी क्रिकेटमध्ये सर्वाधिक शतके करणारा फलंदाज बनला आहे. रुटने भारताविरुद्ध कसोटीत 10 शतकी खेळी खेळली आहे. स्मिथने आता कसोटी क्रिकेटमध्ये सर्वाधिक शतके करण्याच्या बाबतीत केन विल्यमसनला मागे टाकले आहे, तर त्याने सुनील गावस्कर आणि ब्रायन लारा यांच्याशी बरोबरी केली आहे, ज्यामध्ये दोन्ही खेळाडूंनी 34-34 शतके झळकावली होती.
भारताविरुद्ध कसोटी क्रिकेटमध्ये सर्वाधिक शतकी खेळी करणारे खेळाडू
स्टीव्ह स्मिथ - 11 शतके
जो रूट - 10 शतके
रिकी पाँटिंग – 8 शतके
व्हिव्हियन रिचर्ड्स - 8 शतके
गॅरी सोबर्स – 8 शतके
स्मिथचे बॉक्सिंग डे कसोटीतील पाचवे शतक
26 डिसेंबरपासून सुरू होणारा कसोटी सामना बॉक्सिंग-डे कसोटी म्हणूनही ओळखला जातो, ज्यामध्ये स्मिथचे हे 5 वे शतक आहे आणि यासह तो ऑस्ट्रेलियाचा अनुभवी कर्णधार रिकी पाँटिंगला मागे सोडण्यात यशस्वी झाला आहे. पॉन्टिंगने बॉक्सिंग-डे कसोटी सामन्याच्या इतिहासात एकूण 4 शतकी खेळी खेळली होती. या यादीत मॅथ्यू हेडन पहिल्या क्रमांकावर आहे, ज्याच्या बॉक्सिंग-डे कसोटीत एकूण 6 शतके आहेत.