Mumbai: शिवाजी नगरमध्ये 10 वी पास व्यक्ती चालवत होता क्लिनिक; पोलिसांनी केला या बनावट डॉक्टरचा पर्दाफाश, गुन्हा दाखल
पोलीस अधिकाऱ्याने सांगितले की, दुबे गावात एका डॉक्टरकडे कंपाउंडर म्हणून काम करायचा आणि तिथे तो डॉक्टरचे बरेच काम शिकला, त्यानंतर मुंबईत येऊन त्याने आपला दवाखाना सुरू केला.
मुंबईमधील (Mumbai) शिवाजी नगर परिसरात पोलिसांनी एका बेकायदा क्लिनिकवर कारवाई केली आहे. हे क्लिनिक चालवणाऱ्या बनावट डॉक्टरला पोलिसांनी अटक केली आहे. अटक करण्यात आलेला आरोपी हा केवळ 10वी पास असून त्याने दवाखाना उघडला होता. आरोपीला न्यायालयात हजर केले असता न्यायालयाने त्याची रवानगी न्यायालयीन कोठडीत केली. आरोपीने न्यायालयाला सांगितले की, त्याला हृदयाचा त्रास आहे, त्यामुळे त्याला न्यायालयीन कोठडी सुनावण्यात आली आहे.
गोवंडी येथील दुबे यांच्या क्लिनिकमध्ये बनावट डॉक्टर कार्यरत असल्याची माहिती बृहन्मुंबई महानगरपालिकेच्या (बीएमसी) अधिकाऱ्यांना मिळाली होती. त्यानंतर शिवाजी नगर पोलिसांनी बुधवारी आरोपी विश्वनाथ उदयराज दुबे याच्याविरुद्ध बनावट रुग्ण पाठवून गुन्हा दाखल केला. तपासात तो केवळ 10वी पास असल्याचे पोलिसांना समजले.
बीएमसीच्या एम ईस्ट वॉर्डचे सहाय्यक वैद्यकीय अधिकारी डॉ. निनाद ननावरे यांनी केलेल्या पोलीस तक्रारीनुसार, हा बनावट डॉक्टर रुग्णांणा तपासात असे आणि त्यांना औषधेही देत होता. आरोपीकडून डॉक्टरांनी वापरलेली इंजेक्शन आणि औषधही जप्त करण्यात आली आहे. एका पोलीस अधिकाऱ्याने सांगितले की, दुबे गावात एका डॉक्टरकडे कंपाउंडर म्हणून काम करायचा आणि तिथे तो डॉक्टरचे बरेच काम शिकला, त्यानंतर मुंबईत येऊन त्याने आपला दवाखाना सुरू केला. (हेही वाचा: Free Treatments: आता महाराष्ट्रातील सरकारी हॉस्पिटल्समध्ये मोफत होणार सर्व उपचार; राज्य सरकारचा मोठा निर्णय)
एका अधिकाऱ्याने सांगितले की, फसवणूक आणि वैद्यकीय व्यवसायी कायदा, 1961 च्या संबंधित कलमांनुसार आरोपींविरुद्ध आयपीसी कलमांतर्गत एफआयआर नोंदवण्यात आला आहे. दरम्यान, याआधी पुण्यात अशाच एका बोगस हॉस्पिटल आणि डॉक्टरचा पर्दाफाश झाला होता. हा डॉक्टर शिरुर येथे 22 बेडचे हॉस्पिटल चालवत होता. हा डॉक्टर 12 नापास आहे.