Deaths Due to Heart Disease: मुंबईत 2022 मध्ये दर चौथा मृत्यू हा हृदयविकारामुळे; BMC ने जाहीर केली धक्कादायक आकडेवारी
जागतिक हृदय दिनानिमित्त हा डेटा जाहीर करण्यात आला, ज्यात म्हटले आहे की, बीएमसीच्या जन्म आणि मृत्यू नोंदणीच्या आकडेवारीनुसार 2022 मध्ये मुंबई महानगर क्षेत्रात नोंदलेल्या मृत्यूंपैकी 25 टक्के मृत्यू हे हृदयविकार आणि उच्च रक्तदाबामुळे झाले आहेत.
आजकाल अनेक लोक हृदयाशी संबंधित आजारांनी (Cardiovascular Diseases) त्रस्त आहेत. या आजारांमुळे अनेकांचा मृत्यू झाला आहे. हृदयरोगाबाबत लोकांमध्ये वेळीच जागरुकता आली नाही, तर येणाऱ्या काळात या आजाराने ग्रस्त लोक आणि मृत्यूची संख्या आणखी वाढू शकते असे तज्ज्ञांचे मत आहे. मुंबईच्या नागरी आरोग्य विभागाने (BMC) दिलेल्या माहितीनुसार, 2022 मध्ये शहरातील प्रत्येक चौथा मृत्यू हा हृदय व रक्तवाहिन्यासंबंधी रोगांमुळे झाला. बीएमसीने शुक्रवारी याबाबत आकडेवारी जाहीर केली.
जागतिक हृदय दिनानिमित्त हा डेटा जाहीर करण्यात आला, ज्यात म्हटले आहे की, बीएमसीच्या जन्म आणि मृत्यू नोंदणीच्या आकडेवारीनुसार 2022 मध्ये मुंबई महानगर क्षेत्रात नोंदलेल्या मृत्यूंपैकी 25 टक्के मृत्यू हे हृदयविकार आणि उच्च रक्तदाबामुळे झाले आहेत. याबाबत TOI ने अहवाल दिला आहे. आकडेवारीनुसार, 2022 मध्ये शहरात 94,500 मृत्यूची नोंद झाली आहे.
शहरात, हृदयविकाराच्या समस्या हा मृत्यूचा एक मुख्य घटक आहे. बीएमसीच्या आकडेवारीनुसार, 2022 मध्ये दर तासाला जवळजवळ तीन मुंबईकर हृदयाशी संबंधित समस्यांमुळे मरण पावले. शहराच्या अधिकाऱ्याच्या मते, 2022 मध्ये शहरातील 23,000 हृदय व रक्तवाहिन्यासंबंधी मृत्यूंपैकी सुमारे 17,000 इस्केमिक हृदयरोग किंवा हृदयविकारामुळे झाले.
शहराच्या आरोग्य विभागाच्या आकडेवारीनुसार, मुंबईत 2022 मध्ये दररोज 26 हृदयविकाराच्या झटक्याने मृत्यू झाल्याची नोंद झाली आहे, जी 2020 च्या तुलनेत 68 टक्क्यांनी वाढली आहे. आरटीआयच्या आकडेवारीनुसार, हृदयविकाराचा झटका आणि कर्करोगाच्या मृत्यूच्या वाढीमुळे शहरातील ‘कोविड इफेक्ट’ मध्ये लक्षणीय घट झाली आहे. अहवालानुसार, कोविड-19 ने 2020 मध्ये 10,289 आणि 2021 मध्ये 11,105 लोकांचा बळी घेतला. 2022 मध्ये मुंबईत 1,891 मृत्यू झाले होते. (हेही वाचा: Anti-TB Medicines: भारतामध्ये निर्माण झाला टीबीविरोधी औषधांचा तुटवडा? सोशल मिडियावर दावा, जाणून घ्या सत्य)
आता मुंबईतील रहिवाशांना आरोग्यदायी सवयी अंगीकारण्याचे आवाहन बीएमसीच्या कार्यकारी आरोग्य अधिकारी डॉ. दक्षा शाह यांनी केले आहे. नागरी आरोग्याच्या आकडेवारीनुसार, अति प्रमाणात मिठाचे सेवन हे उच्च रक्तदाब आणि परिणामी हृदयविकाराचे एक कारण असू शकते. राष्ट्रीय सरासरी 8 ग्रॅमच्या तुलनेत मुंबईकर दररोज सरासरी 8.6 ग्रॅम मीठ खातात. डब्ल्यूएचओ दररोज 5 ग्रॅमपेक्षा जास्त मीठ खाण्याची शिफारस करतो.