Virat Kohli Milestone: विराट कोहलीचे 76 वे आंतरराष्ट्रीय शतक; 500व्या आंतरराष्ट्रीय सामन्यात सचिन तेंडुलकरला मागे टाकत अनेक विक्रम मोडले
कोहलीचे हे भारताबाहेर 5 वर्षांनंतरचे शतक होते. या शतकासह कोहलीने अनेक विक्रम केले. त्याने आपल्या 500व्या सामन्यात सचिन तेंडुलकरला मागे टाकले.
IND vs WI 2nd Test 2023: टीम इंडियाचा स्टार फलंदाज विराट कोहलीने (Virat Kohli) वेस्ट इंडिजविरुद्ध मोठा धमाका केला आहे. शुक्रवारी क्वीन्स पार्क ओव्हलवर शानदार फलंदाजी करताना त्याने आपल्या कसोटी कारकिर्दीतील 29 वे शतक झळकावले. कोहलीचे हे भारताबाहेर 5 वर्षांनंतरचे शतक होते. या शतकासह कोहलीने अनेक विक्रम केले. त्याने आपल्या 500व्या सामन्यात सचिन तेंडुलकरला मागे टाकले. 500व्या सामन्यापर्यंत सचिन तेंडुलकरने त्याच्या आंतरराष्ट्रीय कारकिर्दीत 75 शतके ठोकली होती. कोहलीने 76 वे शतक झळकावून त्याला मागे सोडले. तथापि, आंतरराष्ट्रीय कारकिर्दीतील (कसोटी, एकदिवसीय, टी-20) सर्वाधिक शतकांच्या बाबतीत सचिन तेंडुलकर 100 शतकांसह अव्वल आहे. विराट कोहली 76 शतकांसह दुसऱ्या स्थानावर आहे.
विंडीजविरुद्ध सर्वाधिक शतके करणारा तिसरा खेळाडू
यासह कोहलीने एबी डिव्हिलियर्सचा विक्रमही मोडला. वेस्ट इंडिजविरुद्ध सर्वाधिक आंतरराष्ट्रीय शतके करणारा तो तिसरा खेळाडू ठरला. भारताचे दिग्गज सुनील गावस्कर या बाबतीत आघाडीवर आहेत. गावसकर यांनी विंडीजविरुद्ध 13 शतके झळकावली. या बाबतीत दक्षिण आफ्रिकेचा अनुभवी जॅक कॅलिस 12 शतकांसह दुसऱ्या स्थानावर आहे. कोहलीने विंडीजविरुद्ध 12वे शतक झळकावून त्यांची बरोबरी केली. एबी डिव्हिलियर्सने आपल्या कारकिर्दीत वेस्ट इंडिजविरुद्ध 11 शतके झळकावली होती.
सर डॉन ब्रॅडमन यांची केली बरोबरी
कोहलीने मार्चमध्ये ऑस्ट्रेलियाविरुद्ध शेवटचे कसोटी शतक झळकावले होते. अहमदाबादमध्ये खेळल्या गेलेल्या दुसऱ्या कसोटी सामन्यात त्याने 186 धावा केल्या. कसोटी शतकांच्या बाबतीत कोहलीने ऑस्ट्रेलियाचे दिग्गज सर डोनाल्ड ब्रॅडमन यांची बरोबरी केली आहे. ब्रॅडमन यांनी 29 शतके झळकावली. शेवटच्या कसोटीत 76 धावांवर बाद झालेल्या कोहलीने या सामन्यात आपल्या चाहत्यांना आनंद दिला. (हे देखील वाचा: Rohit Sharma Record: 'हिट'मॅनने तोडला सुनील गावस्कर आणि गौतम गंभीरचा जुना विक्रम, नावावर केली 'ही' खास कामगिरी)
भारताबाहेर 5 वर्षांनी शतक
2018 मध्ये परदेशात चार शतके झळकावल्यानंतर कोहलीला पाच वर्षे वाट पाहावी लागली आणि तेव्हापासून हे त्याचे भारताबाहेरचे कसोटीतील पहिले शतक आहे. डिसेंबर 2018 मध्ये पर्थमध्ये ऑस्ट्रेलियाविरुद्ध त्याने भारताबाहेर शेवटचे शतक झळकावले होते. कॅरेबियन बेटांवर कोहलीचे दुसरे शतक आहे. यापूर्वी 2016 मध्ये नॉर्थ साऊंड येथे त्याचे पहिले शतक दुहेरी शतकात रूपांतरित झाले होते.
सक्रिय क्रिकेटपटूंमध्ये सर्वाधिक कसोटी शतके
स्टीव्ह स्मिथ 32
जो रूट 30
विराट कोहली 29
केन विल्यमसन 28
डेव्हिड वॉर्नर 25