IND vs SA 2nd Test: दक्षिण आफ्रिका 55 धावांवर ऑल आऊट, भारतीय गोलंदाजांनी मोडला 27 वर्ष जुना विक्रम
याआधी दोघांमधील कसोटीतील सर्वात कमी धावसंख्या भारताने 1996 मध्ये केली होती, आता 27 वर्षांनंतर ही धावसंख्या त्यापेक्षा कमी झाली आहे.
Team India New Record: केपटाऊन कसोटीत दक्षिण आफ्रिकेचा (IND vs SA) संघ पहिल्या डावात अवघ्या 55 धावांत ऑलआऊट झाला, ही कसोटीतील दोघांमधील सर्वात कमी धावसंख्या आहे. भारताचा वेगवान गोलंदाज मोहम्मद सिराजने (Mohammad Siraj एकहाती 6 बळी घेत दक्षिण आफ्रिकेच्या फलंदाजीचे कंबरडे मोडले. याआधी दोघांमधील कसोटीतील सर्वात कमी धावसंख्या भारताने 1996 मध्ये केली होती, आता 27 वर्षांनंतर ही धावसंख्या त्यापेक्षा कमी झाली आहे. आपली शेवटची कसोटी खेळत असलेला दक्षिण आफ्रिकेचा कर्णधार डीन एल्गरने नाणेफेक जिंकून प्रथम फलंदाजी करण्याचा निर्णय घेतला. न्यूलँड्स क्रिकेट मैदानाची खेळपट्टी गवताळ होती, ज्याचा भारतीय वेगवान गोलंदाजांनी पुरेपूर फायदा घेतला. सिराजने एडन मार्करामच्या विकेटने सुरुवात केली आणि मार्को जॅनसेनला शून्यावर बाद करत त्याची सहावी विकेट घेतली. कर्णधार डीन एल्गरलाही सिराजने बोल्ड केले.
पहिल्या डावात दक्षिण आफ्रिकेची फलंदाजी कोलमडली. यष्टिरक्षक काइल व्हेरेनने पहिल्या डावात त्यांच्यासाठी सर्वाधिक 15 धावांची खेळी खेळली. त्याशिवाय डेव्हिड बेडिंगहॅमने 12 धावा केल्या, हे दोघे वगळता इतर कोणत्याही फलंदाजाला दुहेरी आकडाही गाठता आला नाही. ही दक्षिण आफ्रिकेची भारताविरुद्धची आतापर्यंतची सर्वात कमी कसोटी धावसंख्या आहे, याआधी त्यांची सर्वात कमी धावसंख्या 79 धावा होती जी त्यांनी 2015 मध्ये केली होती. (हे देखील वाचा: Mohammad Siraj ला विकेट मिळताच Virat Kohli आणि Rohit Sharma झाले खूश, एकमेकांना मारली मिठी, पाहा व्हिडिओ)
दक्षिण आफ्रिकेचा क्रिकेट संघ 55 धावांवर ऑलआऊट झाला, याआधी दोघांमधील कसोटी सामन्यातील एका डावातील सर्वात कमी धावसंख्या 66 धावा होती जी भारताने 1996 मध्ये डरबनमध्ये केली होती. दक्षिण आफ्रिकेची सर्वात कमी धावसंख्या 79 होती, जी त्यांनी 2015 मध्ये नागपुरात केली होती. केपटाऊनमधील 55 धावांची ही खेळी आता दोघांमधील कसोटीतील सर्वात कमी धावांची खेळी ठरली आहे.