ICC Test Ranking: आयसीसी क्रमवारीत मोठी उलथापालथ, रोहित शर्मा आणि विराट कोहलीचे मोठे नुकसान; जैस्वालची 'यशस्वी' झेप

ICC Ranking: भारत आणि बांगलादेश यांच्यातील कसोटी मालिकेतील दुसरा (IND vs BAN 2nd Test 2024) सामना 27 सप्टेंबरपासून कानपूरमध्ये (Kanpur) खेळवला जाणार आहे. टीम इंडियाने मालिकेतील पहिला सामना 280 धावांनी जिंकला होता. या सामन्यात रोहित शर्मा (Rohit Sharma) किंवा विराट कोहली (Virat Kohli) दोघांनीही काही खास फलंदाजी केली नाही. आता या दोघांना आयसीसी कसोटी क्रमवारीतही याचे परिणाम भोगावे लागले आहेत. एकीकडे विराट कोहली टॉप 10 मधून बाहेर पडला आहे, तर रोहित शर्मा दहाव्या स्थानावर पोहोचला आहे. मात्र, भारतीय संघाची सलामीची फलंदाज यशस्वी जैस्वालने झेप घेतली आहे. तसेच शुभमन गिललाही थोडा फायदा झाला आहे.

जो रूट पहिल्या क्रमांकावर, केन विल्यमसन दुसऱ्या क्रमांकावर कायम

आयसीसी कसोटी क्रमवारीत अव्वल 4 मध्ये कोणताही बदल झालेला नाही. इंग्लंडचा जो रूट अजूनही पहिल्या क्रमांकावर आहे. त्याचे रेटिंग सध्या 899 आहे. न्यूझीलंडचा केन विल्यमसन दुसऱ्या स्थानावर आहे. त्याचे रेटिंग 852 आहे. न्यूझीलंडचा डॅरिल मिशेल 760 रेटिंगसह तिसऱ्या क्रमांकावर कायम आहे. स्टीव्ह स्मिथने 757 रेटिंगसह चौथ्या क्रमांकावर आपली पकड कायम ठेवली आहे. म्हणजे इथली परिस्थिती पूर्वीसारखीच आहे, काहीही बदललेले नाही.

रोहित-विराटचे मोठे नुकसान

भारतीय संघाचा कर्णधार रोहित शर्माला एका झटक्यात 5 स्थानांचे नुकसान झाले आहे. त्याचे रेटिंग आता 716 पर्यंत घसरले असून तो थेट दहाव्या स्थानावर घसरला आहे. टीम इंडियाचा माजी कर्णधार विराट कोहलीलाही याचा मोठा फटका बसला आहे. त्याला पाच स्थानांनी घसरावे लागले. तो आता 709 च्या रेटिंगसह 12 व्या क्रमांकावर पोहोचला आहे. आता पाकिस्तानचा बाबर आझम त्याच्या पुढे आहे. त्याचे रेटिंग 712 आहे आणि सध्या तो 11 व्या स्थानावर आहे. दरम्यान, शुभमन गिललाही थोडा फायदा झाला आहे. ते 701 रेटिंगसह 5 स्थानांनी झेप घेत 14 व्या क्रमांकावर पोहोचले आहेत.

हे देखील वाचा: IND vs BAN 2nd Test 2024: कानपूरमध्ये रोहित-विराटचा कसा आहे रेकॉर्ड? कोण हिट आणि कोण फ्लॉप? येथे जाणून घ्या आकडेवारी

यशस्वी जैस्वालला झाला एका स्थानाचा फायदा 

भारताची यशस्वी जैस्वाल आता एका स्थानाने पुढे सरकत पाचव्या क्रमांकावर पोहोचला आहे. त्याचे रेटिंग 751 झाले आहे. बांगलादेशविरुद्धच्या कसोटीच्या पहिल्या डावात त्याने अर्धशतक झळकावले, त्याचा फायदा त्याला मिळत आहे. तर भारताचा ऋषभ पंत 731 रेटिंगसह सहाव्या क्रमांकावर आहे. बांगलादेशविरुद्ध चेन्नई कसोटीत दुसऱ्या डावात त्याने शानदार शतक झळकावले.

मोहम्मद रिझवानलाही फायदा

उस्मान ख्वाजालाही एका स्थानाचा फायदा झाला आहे. तो आता 728 रेटिंगसह 7व्या क्रमांकावर आहे. पाकिस्तानच्या मोहम्मद रिझवानलाही एका स्थानाचा फायदा झाला आहे. तो आता 720 च्या रेटिंगसह आठव्या क्रमांकावर पोहोचला आहे. मार्नस लॅबुशेन देखील आठव्या क्रमांकावर संयुक्त आहे, कारण त्याचेही रेटिंग 720 आहे.