Snake Bite: ज्योतिषाच्या सांगण्यावरून सापासमोर ठेवली जीभ; नागराजने दंश केल्यानंतर गमावली वाणी, Tamil Nadu मधील धक्कादायक घटना

तामिळनाडूमध्ये एक विचित्र घटना समोर आली आहे. या ठिकाणी सापाने एका व्यक्तीच्या जिभेवर चावा घेतला. साप चावल्यानंतर डॉक्टरांनी कसा तरी त्या माणसाचा जीव वाचवला, पण यामध्ये त्याने आपली वाणी गमावली आहे. आता ही व्यक्ती बोलू शकणार नाही. व्यक्तीचा जीव वाचवण्यासाठी त्याची जीभ कापावी लागली. तामिळनाडूतील इरोडमध्ये एका शेतकऱ्यासोबत ही घटना घडली आहे. कोपिचेट्टीपलायम येथील 54 वर्षीय राजा असे पीडितेचे नाव आहे. या शेतकऱ्याला सर्पदंशाचे स्वप्न पडले होते, त्यामुळे तो घाबरला होता. यादरम्यान त्याने एका ज्योतिषाशी संपर्क साधला आणि उपाय विचारला. ज्योतिषाने राजाला सर्प मंदिरात जाण्याचा आणि वाईट स्वप्नांच्या उपचारासाठी काही विधी करण्याचा सल्ला दिला. सांगितल्याप्रमाणे, शेतकऱ्याने मंदिरात जाऊन धार्मिक विधी केले आणि शेवटी, राजाने सापासमोर तीनदा जीभ बाहेर काढली. दरम्यान, विषारी सापाने त्याच्या जिभेचा चावा घेतला.