Odisha Coromandel Express Accident: बालासोरच्या बहनगा स्टेशनजवळ कोरोमंडल एक्सप्रेसला मोठा अपघात; अनेक डबे रुळावरून घसरले

हावडाहून चेन्नईला जाणाऱ्या कोरोमंडल एक्स्प्रेसला अपघात झाल्याची माहिती मिळत आहे. ओडिशातील बालासोरपासून सुमारे 40 किमी अंतरावर या ट्रेनला अपघात झाल्याचे सांगण्यात येत आहे. ही ट्रेन चेन्नई सेंट्रल ते कोलकात्याच्या शालीमार रेल्वे स्थानकापर्यंत धावते. ही ट्रेन शुक्रवारी संध्याकाळी ओडिशातील बालासोरच्या बहनगा स्टेशनजवळ रुळावरून घसरल्याची माहिती मिळत आहे. शोध आणि बचाव कार्यासाठी पथके घटनास्थळी रवाना झाली आहेत. जिल्हाधिकारी, बालासोर यांनाही सर्व आवश्यक व्यवस्था करण्यासाठी घटनास्थळी पोहोचण्याचे निर्देश देण्यात आले आहेत. मिळालेल्या माहितीनुसार, ओडिशातील बालासोरपासून 40 किमी अंतरावर मालगाडीला ही ट्रेन धडकली. मालगाडीला धडक दिल्यानंतर 3 स्लीपर कोच सोडून, बाकीचे डबे रुळावरून घसरले. प्राथमिक माहितीत या डब्यांची संख्या 18 असल्याचे सांगण्यात येत आहे.

या दुर्घटनेत किती नुकसान झाले याबाबत सध्या कोणतीही अधिकृत माहिती समोर आलेली नसून अनेकांचा बळी गेल्याची भीती व्यक्त करण्यात येत आहे. ही घटना कशी घडली याबाबतही कोणतीही अधिकृत माहिती समोर आली नाही, मात्र दोन्ही गाड्या एकाच मार्गावर आल्याने हा भीषण अपघात झाल्याचे सांगण्यात येत आहे. सिग्नल बिघडल्याने दोन्ही गाड्या एकाच रुळावर येऊन धडकल्याची माहिती आहे. (हेही वाचा: मणिपूर हिंसाचारात आतापर्यंत 98 ठार, तर 310 जखमी; जाळपोळीच्या 4,000 हून अधिक घटनांची नोंद)

('सोशली' (SocialLY) हे आपल्यासाठी ट्विटर, इन्स्टाग्राम आणि यूट्यूब अशा सोशल मीडिया जगातील ताज्या ब्रेकिंग न्यूज, व्हायरल ट्रेंड व माहिती घेऊन येते. वृत्तात एम्बेड केलेली पोस्ट यूजर्सच्या सोशल मीडिया अकाऊंटमधून थेट एम्बेड करण्यात आली आहे. लेटेस्टलीच्या कर्मचाऱ्याने अथवा लेखकाने त्याचे संपादन किंवा त्यात सुधारणा केलेली नाही. सदर पोस्टमधील वस्तुस्थिती, प्रतिक्रियामधून लेटेस्टलीची मते प्रतिबिंबित होत नाहीत. तसेच या मजकूराची जबाबदारी अथवा उत्तरदायीत्व लेटेस्टली स्वीकारत नाही.)