Rupali Chakankar Viral Video: 'रुपाली चाकणकर व्हायरल व्हिडिओ'च्या नावाखाली सायबर गंडा, बँक खाते रिकामे होण्याची भीती
सोशल मीडियावर सध्या 'रुपाली चाकणकर व्हायरल व्हिडिओ' अशा दाव्यांसह काही लिंक्स वेगाने पसरवल्या जात आहेत. सायबर तज्ज्ञांच्या मते, हा एक पूर्वनियोजित सायबर कट असून या लिंक्सवर क्लिक केल्यास युजर्सचे बँक खाते पूर्णपणे रिकामे होऊ शकते.
राज्यातील राजकीय आणि सामाजिक घडामोडींच्या पार्श्वभूमीवर सायबर गुन्हेगारांनी युजर्सची दिशाभूल करण्याचा एक नवीन आणि धोकादायक मार्ग शोधला आहे. सोशल मीडिया प्लॅटफॉर्म्स आणि व्हॉट्सॲपवर "रुपाली चाकणकर व्हायरल व्हिडिओ" अशा आकर्षक आणि वादग्रस्त टायटल्ससह काही संशयास्पद लिंक्स मोठ्या प्रमाणावर फिरत आहेत. सायबर सुरक्षा तज्ज्ञांनी याविषयी तीव्र इशारा दिला असून, अशा कोणत्याही लिंकवर क्लिक करणे म्हणजे स्वतःहून सायबर चोरट्यांच्या जाळ्यात अडकण्यासारखे आहे, ज्यामुळे तुमचे बँक खाते काही क्षणांत रिकामे होऊ शकते.
हे सायबर रॅकेट पूर्णपणे युजर्सच्या उत्सुकतेचा गैरफायदा घेऊन चालवले जाते. जेव्हा एखादा युजर फेसबुक, एक्स (ट्विटर) किंवा व्हॉट्सॲपवर आलेली ही लिंक पाहतो, तेव्हा तो उत्सुकतेपोटी त्यावर क्लिक करतो. लिंकवर क्लिक करताच युजरला मूळ व्हिडिओ न दाखवता एका त्रयस्थ (Third-party) आणि असुरक्षित वेबपेजवर नेले जाते. तिथे व्हिडिओ पाहण्यासाठी किंवा डाउनलोड करण्यासाठी विशिष्ट 'ॲप' इन्स्टॉल करण्याची किंवा वय पडताळणीच्या नावाखाली वैयक्तिक माहिती भरण्याची अट ठेवली जाते.
बँक खाते रिकामे होण्याचा मोठा धोका
सायबर पोलिसांच्या माहितीनुसार, अशा लिंक्सद्वारे युजर्सच्या मोबाईल किंवा कॉम्प्युटरमध्ये अत्यंत घातक 'मॅलवेअर' (Malware) किंवा 'ट्रोजन' नावाचा व्हायरस चोरून डाऊनलोड केला जातो. हा व्हायरस डिव्हाइसमध्ये सक्रिय होताच बँक खात्याशी संबंधित संवेदनशील माहिती जसे की नेट बँकिंगचा पासवर्ड, क्रेडिट-डेबिट कार्डचे तपशील आणि युझर आयडी चोरून हॅकर्सच्या सर्व्हरवर पाठवतो. धक्कादायक बाब म्हणजे, युजरला समजण्याच्या आतच त्याच्या मोबाईलवर येणारे बँकिंग ओटीपी (OTP) देखील हॅकर्स सहज ट्रॅक करतात आणि खात्यातील सर्व पैसे काढून घेतात.
फिशिंग पेजेस आणि सबस्क्रिप्शनचा भुर्दंड
या स्कॅममध्ये केवळ व्हायरसच नाही, तर हुबेहूब बँकिंग किंवा पेमेंट गेटवेसारखे दिसणारे 'फिशिंग पेजेस' (Phishing Pages) वापरले जात आहेत. व्हिडिओ अनलॉक करण्यासाठी केवळ २ किंवा ५ रुपये भरण्यास सांगितले जाते. युजर जेव्हा ही छोटी रक्कम भरण्यासाठी यूपीआय (UPI) किंवा कार्डचे डिटेल्स टाकतो, तेव्हा त्याची गोपनीय आर्थिक माहिती चोरीला जाते. यानंतर युजरच्या खात्यातून परस्पर मोठ्या रकमा आंतरराष्ट्रीय व्यवहारांद्वारे वळवल्या जातात.