NCP Candidate 3rd List: राष्ट्रवादी काँग्रेसची तिसरी यादी जाहीर; अजित पवारांनी कोणाला दिली संधी? जाणून घ्या
या यादीत माजी मंत्री नवाब मलिक यांचे नाव गहाळ आहे. राष्ट्रवादीने निफाड मतदारसंघातून दिलीप बनकर यांना उमेदवारी दिली असून गेवराईतून विजयसिंह पंडित, फलटणमधून सचिन पाटील आणि पारनेरमधून काशिनाथ दाते यांना उमेदवारी दिली आहे.
NCP Candidate 3rd List: उपमुख्यमंत्री अजित पवार (Ajit Pawar) यांच्या नेतृत्वाखालील राष्ट्रवादी काँग्रेसने रविवारी महाराष्ट्र विधानसभा निवडणुकीसाठी (Maharashtra Assembly Elections 2024) 4 उमेदवारांची तिसरी यादी जाहीर केली. या यादीत माजी मंत्री नवाब मलिक (Nawab Malik) यांचे नाव गहाळ आहे. राष्ट्रवादीने निफाड मतदारसंघातून दिलीप बनकर यांना उमेदवारी दिली असून गेवराईतून विजयसिंह पंडित, फलटणमधून सचिन पाटील आणि पारनेरमधून काशिनाथ दाते यांना उमेदवारी दिली आहे. राष्ट्रवादीने आतापर्यंत 49 उमेदवार जाहीर केले असून 20 नोव्हेंबरला होणाऱ्या विधानसभा निवडणुकीसाठी पक्षाला एकूण 55 ते 56 जागा मिळण्याची शक्यता आहे.
राष्ट्रवादी काँग्रेसने पहिल्या यादीत 38 उमेदवारांच्या नावाची घोषणा केली होती. या यादीत उपमुख्यमंत्री अजित पवार बारामतीतून लढणार असल्याचं स्पष्ट झालं आहे. दरम्यान, राष्ट्रवादी काँग्रेसची तिसरी यादी जाहीर करणारे राज्य युनिटचे प्रमुख सुनील तटकरे यांनी सांगितले की, नवाब मलिक हे पक्षाचे ज्येष्ठ नेते आणि आमचे सहकारी आहेत. आम्ही त्यांना भेटून चर्चा करू. उमेदवारी दाखल करण्यासाठी अजून तीन दिवस आहेत. तथापी, राष्ट्रवादी काँग्रेसने नवाब मलिक यांची कन्या सना मलिक यांना अणुशक्ती नगरमधून उमेदवारी दिली आहे. (हेही वाचा -BJP Second List Of Candidates: महाराष्ट्र विधानसभा निवडणुकीसाठी भाजपची 22 उमेदवारांची दुसरी यादी जाहीर; कोणाला मिळाली संधी? वाचा)
मुंबई भाजप युनिट आशिष शेलार यांनी नवाब मलिक यांना पक्ष पाठिंबा देणार नाही, असे वक्तव्य केलं होतं. आम्ही नवाब मलिकच्या विरोधात आहोत. उमेदवारी जाहीर करायची की नाही, हे त्यांच्या पक्षाचे नेते ठरवतील. पण दाऊदशी संबंध असल्याचा आरोप असलेल्या नवाब मलिक यांच्यासाठी भाजपचे कार्यकर्ते काम करणार नाहीत. आम्ही आमच्या निर्णयावर ठाम आहोत, असं आशिष शेलार यांनी म्हटलं होतं. (हेही वाचा - विधानसभा निवडणूक 2024: शिवसेना (UBT) 15 आणि काँग्रेसच्या 23 उमेदवारांची दुसरी यादी जाहीर, पाहा यादी)
दरम्यान, फलटण मतदारसंघात राष्ट्रवादी काँग्रेस आणि भाजपमध्ये चुरशीची वाटाघाटी झाल्यामुळे दोघांनीही या जागेवर आपले दावे केले होते. मात्र, केंद्रीय गृहमंत्री अमित शहा यांच्या मध्यस्थीने राष्ट्रवादीने आपल्या कोट्यातील फलटणची जागा मिळवून सचिन पाटील यांना उमेदवारी दिली आहे. याशिवाय, पारनेरमधून राष्ट्रवादी काँग्रेसने काशिनाथ दाते यांना उमेदवारी दिली आहे, जिथे त्यांचा सामना राष्ट्रवादी-सपा उमेदवार आणि शरद पवार गटाचे खासदार नीलेश लंके यांच्या पत्नी राणी लंके यांच्याविरोधात होणार आहे.