Palghar Shocker: पालघरच्या मोखाडा येथे नवजात बाळाचा मृत्यू; रुग्णवाहिका न मिळाल्याने वडिलांनी मुलाचा मृतदेह पिशवीत घालून केला 80 किमीचा प्रवास

सरकारला ग्रामीण आरोग्यसेवेबाबत अजून लक्ष देण्याची गरज अधोरेखित करणारी एक धक्कादायक बाब पालघर (Palghar) जिल्ह्यातून समोर आली आहे. पालघर जिल्ह्यातील मोखाडा (Mokhada) येथे एका गर्भवती महिलेला वेळेवर रुग्णवाहिका सेवा नाकारण्यात आल्याने एका नवजात बाळाचा दुर्दैवी मृत्यू झाला. वाहतुकीच्या अभावामुळे आणि हलाखीच्या आर्थिक परिस्थितीमुळे शोकाकुल वडिलांना आपल्या मृत बाळाचा मृतदेह प्लास्टिकच्या पिशवीत 80 किलोमीटर सार्वजनिक बसमधून घेऊन जावे लागले. सुदैवाने आईला शस्त्रक्रियेसाठी तातडीने नेण्यात आल्याने तिचा जीव वाचला.

जर आपत्कालीन वैद्यकीय वाहतूक त्वरित पोहोचली असती तर त्यांच्या बाळाला वाचवता आले असते असा कुटुंबाचा ठाम विश्वास आहे. या धक्कादायक घटनेमुळे व्यापक संताप व्यक्त होत आहे आणि आरोग्य अधिकाऱ्यांकडून त्वरित जबाबदारी घेण्याची मागणी होत आहे. अहवालानुसार, जोगलवाडी गावातील 26 वर्षीय अविता सखाराम कवर यांना पहाटे 3 वाजण्याच्या सुमारास प्रसूती वेदना सुरू झाल्या. तिच्या कुटुंबाने ताबडतोब 108 आपत्कालीन रुग्णवाहिका सेवेला फोन केला, परंतु त्यांना सांगण्यात आले की, कोणतीही रुग्णवाहिका उपलब्ध नाही.

पुन्हा सकाळी 8 वाजता कॉल करण्यात आला. अनेक वेळा मदत मागितल्यानंतरही, दुपारपर्यंत कोणतीही मदत मिळाली नाही. दुसरा कोणताही पर्याय नसल्याने, कुटुंबाने तिला खोडाळा प्राथमिक आरोग्य केंद्रात नेण्यासाठी खाजगी वाहनाची व्यवस्था केली. तिथे डॉक्टरांनी तिला मोखाडा ग्रामीण रुग्णालयात हलवण्याची आवश्यकता असल्याचे सांगितले. स्थानिक आरोग्य उपकेंद्राकडून विनंती केल्यानंतरही रुग्णवाहिका उपलब्ध झाली नाही. अखेर, संध्याकाळी 6 वाजेपर्यंत, प्रसूती वेदना सुरू झाल्यानंतर तब्बल 15 तासांनी, अविताला मोखाडा ग्रामीण रुग्णालयात दाखल करण्यात आले. (हेही वाचा: Ahmedabad Plane Crash: अहमदाबाद विमान दुर्घटनेत महाराष्ट्रातील 16 लोकांचा मृत्यू; मुंबईतील अनेक क्रू मेंबर्सचा समावेश- Reports)

मात्र तिथे मोखाडा रुग्णालयातील डॉक्टरांनी सांगितले की, बाळ गर्भाशयातच मरण पावले. त्यानंतर अविताला तातडीने शस्त्रक्रियेसाठी नाशिक जिल्हा रुग्णालयात पाठवण्यात आले, जिथे डॉक्टरांनी तिचा जीव वाचवला. प्रसूतीनंतर, मृत नवजात बाळाला कुटुंबाकडे सोपवण्यात आले. धक्कादायक म्हणजे, रुग्णालयाने कोणतीही वाहतूक व्यवस्था केली नाही. वडील सखाराम कवर यांच्याकडे खाजगी वाहन भाड्याने घेण्यासाठी किंवा रुग्णवाहिकेची व्यवस्था करण्यासाठी पैसे नसल्यामुळे, त्यांनी आपल्या बाळाचा लहानसा मृतदेह प्लास्टिकच्या पिशवीत ठेवला आणि 80-90 किलोमीटरचा प्रवास सार्वजनिक बसने केला. त्यानंतर बळावर अंत्यसंस्कार करण्यात आले.

(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)