QuickLY
Socially
मुंबईच्या (Mumbai) गोराई (Gorai) येथील विपश्यना पॅगोडाजवळील शतकानुशतके जुने मंदिर पाडण्यात आल्याची धक्कादायक बाब समोर आली आहे. मंदिरासह शेजारील पवित्र पिंपळाचे झाडही तोडण्यात आले आहे. या प्रकरणी गोराई पोलीस ठाण्यात प्रथम माहिती अहवाल (FIR) दाखल करण्यात आला आहे. महाराष्ट्र नवनिर्माण सेनेचे कार्यकर्ता हरीश सुतार यांनी 18 मे रोजी याबाबत तक्रार दाखल केली होती. आरोपींचा अद्याप शोध लागला नसल्याने त्यांची ओळख पटलेली नाही.
एफआयआरनुसार, काही वर्षांपूर्वी एस्सेल वर्ल्ड या मनोरंजन पार्कने आपली जमीन विपश्यना पॅगोडा संस्थेच्या विश्वस्तांना दिली होती. 14 मे रोजी पॅगोडा संस्थेने 'स्वयंभू जागृत देवस्थानम श्री वांगना देवी मंदिर' हे प्राचीन मंदिर पाडले, ज्याची गावातील आणि परिसरातील सुमारे 1,000 भक्त नियमितपणे पूजा करत होते.
याशिवाय संस्थेच्या विश्वस्तांनी मंदिराजवळील पवित्र पिंपळाचे झाडही तोडले. तक्रारदाराच्या म्हणण्यानुसार, 2019 मध्ये, विश्वस्तांनी मंदिरात पूजा करण्यास मनाई केली आणि भाविकांना मंदिरात प्रवेश करण्यापासून रोखण्यासाठी खाजगी सुरक्षा रक्षक नेमले. मात्र, पोलिसांच्या हस्तक्षेपानंतर भाविकांना गुरुपौर्णिमेच्या दिवशी पूजा करण्याची परवानगी देण्यात आली. त्यानंतर पोलीस, विपश्यना पॅगोडाचे विश्वस्त, एस्सेल वर्ल्डचे विश्वस्त आणि भाविक यांचा समावेश असलेली बैठक झाली, ज्यामध्ये मंदिर कोणत्याही परिस्थितीत पाडू नये, असा निर्णय घेण्यात आला. (हेही वाचा: Nandi Idol 'Drinking' Milk Video: उत्तर प्रदेश येथील मंदिरात नंदी दुध पीत असल्याचा दावा; 'चमत्कार' पाहण्यासाठी भाविकांची मोठी गर्दी)
या निर्णयानंतरही शासनाची परवानगी न घेता मंदिर पाडण्यात आल्याने कोळी समाजाच्या आणि इतर हिंदू भाविकांच्या भावना दुखावल्या गेल्या. त्यामुळे तक्रार दाखल करण्यात आली. सुतार म्हणाले, ‘विश्वस्तांनी बीएमसीला एक इमारत आराखडा सादर केला ज्यामध्ये मंदिराच्या उपस्थितीचा उल्लेख करण्यात आला नाही.’ एस्सेलवर्ल्डचे असिस्टंट जनरल मॅनेजर, पीआर आणि ऑपरेशन्स, अजित लोटणकर म्हणाले, ‘आम्ही ऐकले आहे की, ग्लोबल विपश्यना पॅगोडाच्या ट्रस्टींनी जागेवर नवीन इमारत बांधण्यासाठी मंदिर पाडले. मुंबई मेट्रोपॉलिटन रिजन डेव्हलपमेंट अॅथॉरिटी (एमएमआरडीए) च्या नकाशावर मंदिराची रचना दर्शवली असली तरी, विश्वस्तांनी बीएमसीला सादर केलेल्या नकाशामध्ये ती समाविष्ट केलेली नाही.’
