Mira-Bhayandar Road Rage: कारने दुचाकीला दिली जोरदार धडक, तरुणाचा मृत्यू; आरोपीवर गुन्हा दाखल

Mira-Bhayandar Road Rage:  मीरा-भाईंदर रस्त्यावर रोड रेज हल्ल्याचा धक्कादायक प्रकार घडला आहे. इंडिका कारने मुद्दाम मोटारसायकलला धडक दिल्याने तरुणाचा मृत्यू झाला आहे. या प्रकरणात कार चालकाला अटक करण्यात आली आहे. ही घटना 29 जुलै रोजी घडली आणि दुचाकीवर तरंग प्रमोद सिंग असे नाव असलेल्या रायडरचा 10 ऑगस्ट रोजी जेजे रुग्णालयात उपचार सुरू असताना मृत्यू झाला. कार चालक ड्वेन अँथनी डिसोझा याच्याविरुद्ध खुनाचा  आरोप करण्यात आला आहे. भारतीय दंड संहितेच्या कलम 307 (हत्येचा प्रयत्न) अंतर्गत गुन्हा दाखल करण्यात आला होता.

पोलिसांनी दिलेल्या माहितीनुसार, मृतक आणि त्याचा मित्र मुकेश अनिल सोनी हे दोघे काशिमीराहून भाईंदर पश्चिमेकडील त्यांच्या घराकडे परतत असताना मीरा रोड येथील एसके स्टोन सिग्नलजवळ ओव्हरटेक करत असताना कारने त्यांच्या दुचाकीला धडक दिली, त्यामुळे चालकाचे नियंत्रण सुटले. दुचाकावर असलेले दोघे ही रस्त्यावर पडले.

मात्र, कारचालक वेगात निघून गेला. दोघांनी एक दगड उचलला, मोबाईलवर नंबर प्लेटचे फोटो  क्लिक केले आणि गाडीचा पाठलाग सुरू केला. उत्तन रस्त्यावरील राय गावापर्यंत पाठलाग सुरू असताना सोनी यांनी गाडीवर दगडफेक केली. त्यानंतर दोघंही पुन्हा आपल्या घराकडे जाण्यासाठी परतले. मात्र, कार चालकाने पुन्हा पाठीमागे येऊन मुद्दाम त्यांच्यात धडक दिल्याने दोन्ही दुचाकीस्वार गंभीर जखमी झाले. सोनी किरकोळ जखमी होऊन बचावला, तर एकाला डोक्याला गंभीर दुखापत झालेल्या तरंग नावाच्या मुलाचा नंतर मृत्यू झाला. मृत हा प्रॉपर्टी डीलर होता. या घटनेत पोलीसांनी आरोपीला अटक केले आहे. त्याच्यावर गुन्हा दाखल करण्यात आला आहे.