Dr. Babasaheb Ambedkar Jayanti 2025 School Holiday: डॉ. बाबासाहेब आंबेडकर जयंतीनिमित्त, उद्या 14 एप्रिल रोजी शाळा-कॉलेजेसना सुट्टी असणार की नाही? घ्या जाणून

उद्या, 14 एप्रिल रोजी देशभरात डॉ. बाबासाहेब आंबेडकर जयंती (Dr. Babasaheb Ambedkar Jayanti 2025) साजरी होत आहे. महाराष्ट्रात आंबेडकर जयंती मोठ्या उत्साहाने आणि आदराने साजरी होते. या दिवसाचे औचित्य साधत यंदा शाळांना सुट्टी असेल. महाराष्ट्र सरकारच्या शैक्षणिक दिनदर्शिकेनुसार, 14 एप्रिल 2025 रोजी आंबेडकर जयंतीनिमित्त शाळांना सुट्टी जाहीर करण्यात आली आहे. याचा अर्थ, सरकारी शाळा, खासगी शाळा आणि काही ज्युनियर कॉलेजेस बंद राहतील. काही खासगी शाळा पूर्ण सुट्टीऐवजी बाबासाहेबांच्या जीवनावर आधारित कार्यक्रम आयोजित करू शकतात, जसे की निबंध लेखन, वक्तृत्व स्पर्धा किंवा सांस्कृतिक सादरीकरण. अशा शाळांमध्ये विद्यार्थ्यांना उपस्थित राहावे लागू शकते, त्यामुळे पालकांनी आपल्या शाळेशी संपर्क साधून सुट्टीची खात्री करावी.

ही सुट्टी विद्यार्थ्यांना बाबासाहेबांचे विचार समजून घेण्यासाठी आणि सामाजिक कार्यात सहभागी होण्यासाठी प्रोत्साहन देते. डॉ. भीमराव आंबेडकर जयंती हा दिवस भारतीय संविधानाचे शिल्पकार आणि सामाजिक न्यायाचे प्रणेते म्हणून ओळखले जाणारे, डॉ. बी.आर. आंबेडकर यांचा जन्मदिन असल्याने, देशासाठी त्यांच्या योगदानाचा सन्मान करण्यासाठी भारतातील बहुतेक शाळांमध्ये ही सुट्टी पाळली जाईल. आंबेडकर जयंतीसोबतच, भारतातील अनेक प्रदेश- आसाम, केरळ आणि तामिळनाडू राज्ये त्यांचे नवीन वर्ष साजरे करतील. म्हणूनही या प्रदेशांमध्ये, 14 एप्रिल रोजी आंबेडकर जयंतीव्यतिरिक्त सुट्टी असेल.

महाराष्ट्रात बाबासाहेबांचा प्रभाव इतका खोल आहे की, आंबेडकर जयंती ही केवळ सुट्टी नसून एक सामाजिक चळवळ आहे. या दिवशी विद्यार्थी आणि तरुण समता, शिक्षण आणि बंधुता यांचे महत्त्व समजावून घेतात. बाबासाहेबांनी शिक्षणाला ‘आत्मविकासाचे साधन’ म्हटले होते, आणि त्यांच्या या विचाराने लाखो विद्यार्थ्यांना प्रेरणा मिळाली आहे. या दिवशी शाळा बंद असल्या तरी अनेक विद्यार्थी आपल्या गावात किंवा शहरात आयोजित सामुदायिक कार्यक्रमांमध्ये भाग घेतात. हा दिवस आपल्याला सामाजिक एकतेची आणि सर्वांना समान संधी देण्याची गरज अधोरेखित करतो. (हेही वाचा: Dr. Babasaheb Ambedkar Jayanti 2025 Bank Holiday: उद्या 14 एप्रिल रोजी डॉ. बाबासाहेब आंबेडकर जयंतीनिमित्त बँका सुरू असणार की बंद; घ्या जाणून)

या दिवशी अनेक शाळा आणि महाविद्यालये विद्यार्थ्यांसाठी निबंध स्पर्धा, वक्तृत्व स्पर्धा आणि चर्चासत्रे आयोजित करतात. यामुळे नव्या पिढीला बाबासाहेबांचे विचार समजतात आणि त्यांचा आदर वाढतो. दरम्यान, या दिवशी मुंबईतील चैत्यभूमी आणि नागपूरमधील दीक्षाभूमी येथे लाखो अनुयायी जमून बाबासाहेबांना अभिवादन करतात. या ठिकाणी मिरवणुका, प्रार्थना सभा आणि सांस्कृतिक कार्यक्रम आयोजित केले जातात. बाबासाहेबांच्या पुतळ्यांना हार घालून, त्यांच्या विचारांवर चर्चा आयोजित करून आणि त्यांच्या पुस्तकांचे वाचन करून हा दिवस साजरा केला जातो.

(The above story first appeared on LatestLY on Apr 13, 2025 10:55 AM IST. For more news and updates on politics, world, sports, entertainment and lifestyle, log on to our website latestly.com).