Happy International Yoga Day 2025

International Yoga Day 2025 Wishes in Marathi: दरवर्षी 21 जून रोजी आंतरराष्ट्रीय योग दिन (International Yoga Day 2025) साजरा होतो. हा दिवस भारताच्या प्राचीन परंपरेचा एक अमूल्य ठेवा जगभरात पोहोचवण्याचा उत्सव आहे. यंदा, 2025 मधील हा 11 वा योग दिन असून, यंदाची थीम आहे, ‘योगा फॉर वन अर्थ, वन हेल्थ’. ही थीम व्यक्तीच्या आरोग्यासोबतच पर्यावरणाच्या संतुलनावर भर देते. पंतप्रधान नरेंद्र मोदी यांच्या पुढाकाराने 2014 मध्ये संयुक्त राष्ट्रांनी हा दिन जाहीर केला, आणि तेव्हापासून हा जगभरात उत्साहाने साजरा होतो. योग हा केवळ शारीरिक व्यायाम नसून, मन, शरीर आणि आत्म्याचा मेळ घालणारी एक समग्र जीवनपद्धती आहे.

योग हा संस्कृत शब्द ‘युज’ पासून आला आहे, ज्याचा अर्थ आहे ‘जोडणे’ किंवा ‘एकत्र येणे’. हा शब्द शरीर आणि चेतनेच्या मिलनाचे प्रतीक आहे. योगाच्या नियमित सरावाने तणाव कमी होतो, शारीरिक लवचिकता वाढते, आणि मानसिक शांती मिळते. यंदाची थीम पर्यावरण आणि आरोग्य यांच्यातील परस्परसंबंध अधोरेखित करते. योगामुळे आपण केवळ स्वतःच्या आरोग्याची काळजी घेत नाही, तर पर्यावरणाबद्दल जागरूक होऊन त्याचे संरक्षणही करतो.

यंदाच्या योग दिनानिमित्त खास Messages, Images, Whatsapp Status, Wishes द्वारे द्या शुभेच्छा

यावर्षी योग दिनानिमित्त भारतात 10 विशेष कार्यक्रमांचे आयोजन होणार आहे, ज्यात ‘योग संगम’ हा प्रमुख उपक्रम आहे. या अंतर्गत देशभरात 1,00,000 हून अधिक ठिकाणी सामूहिक योग सत्रे आयोजित केली जातील. विशेष म्हणजे, आंध्र प्रदेशातील विशाखापट्टणम येथे 5 लाखांहून अधिक लोक एकत्र येऊन सामान्य योग प्रोटोकॉल (Common Yoga Protocol) सत्रात सहभागी होतील. हा कार्यक्रम देशातील सर्वात मोठ्या योग प्रदर्शनांपैकी एक असेल. (हेही वाचा: International Yoga Day 2025: जाणून घ्या 21 जून रोजी योग दिन का साजरा केला जातो, या दिवसाचा इतिहास, यंदाची थीम आणि महत्त्व)

आंतरराष्ट्रीय योग दिनाची सुरुवात 2015 मध्ये झाली, त्यानंतर आता जगभरात योगाची लोकप्रियता वाढत आहे. संयुक्त राष्ट्रांच्या मुख्यालयात 2023 मध्ये झालेल्या योग दिनाच्या कार्यक्रमाने सर्वाधिक राष्ट्रीयतांच्या सहभागाचा गिनीज विश्वविक्रम नोंदवला. कोविड-19 महामारीच्या काळातही योगाने लोकांना मानसिक आणि शारीरिकदृष्ट्या सक्षम राहण्यास मदत केली. यंदा, योगाच्या या वैश्विक उत्सवात सहभागी होऊन आपण स्वतःच्या आणि पृथ्वीच्या आरोग्यासाठी एक पाऊल पुढे टाकू शकतो. 21 जून 2025 रोजी, योगाच्या या महान परंपरेचा सन्मान करूया आणि ती आपल्या जीवनाचा अविभाज्य भाग बनवूया.