Miss Universe 2023: लवकरच होत आहे 'मिस युनिव्हर्स 2023' स्पर्धा; जाणून घ्या केव्हा आणि कुठे पाहू शकाल, कोण करत आहे भारताचे प्रतिनिधित्व, यंदा काय असेल खास
आयोजकांनी उघड केले आहे की, पुढील मिस युनिव्हर्सची निवड विविध कार्यक्रमांच्या मालिकेद्वारे केली जाईल, ज्यात वैयक्तिक विधाने (Personal Statements), मुलाखती आणि संध्याकाळी गाउन आणि स्विमवेअरमधील सादरीकरणे यांचा समावेश आहे
जगभरातील फॅशन आणि सौंदर्यप्रेमींचे लक्ष लागून असलेली 72 वी वार्षिक मिस युनिव्हर्स स्पर्धा (Miss Universe Pageant) अगदी जवळ आली आहे. सर्वजणच नवीन मिस युनिव्हर्सच्या मुकुटाची आतुरतेने वाट पाहत आहेत. येत्या 18 नोव्हेंबर रोजी एल साल्वाडोर येथे यंदाची ही स्पर्धा होणार असून, या जागतिक सौंदर्य स्पर्धेत 90 विविध देशांतील स्पर्धक सहभागी होत आहेत. युनायटेड स्टेट्समधील आर'बोनी गॅब्रिएल (R'Bonney Gabriel) ही मागच्या वर्षीची मिस युनिव्हर्स ठरली होती. आयोजकांनी उघड केले आहे की, पुढील मिस युनिव्हर्सची निवड विविध कार्यक्रमांच्या मालिकेद्वारे केली जाईल, ज्यात वैयक्तिक विधाने (Personal Statements), मुलाखती आणि संध्याकाळी गाउन आणि स्विमवेअरमधील सादरीकरणे यांचा समावेश आहे.
ही प्रतिष्ठित स्पर्धा टीव्ही सादरकर्ते जीनी माई जेनकिन्स (Jeannie Mai Jenkins) आणि मारिया मेनुनोस (Maria Menounos) तसेच माजी मिस युनिव्हर्स ऑलिव्हिया कल्पो (Olivia Culpo) होस्ट करतील. या इव्हेंटमध्ये 12 वेळा ग्रॅमी विजेते जॉन लीजेंड लाइव्ह संगीत सादरीकरण केले जाईल.
मिस युनिव्हर्स 2023 कुठे होणार आहे?
यावर्षीच्या मिस युनिव्हर्स स्पर्धेसाठी अल साल्वाडोरची निवड झाली आहे. हा कार्यक्रम एल साल्वाडोरची राजधानी सॅन साल्वाडोर येथील जोसे अॅडोल्फो पिनेडा अरेना येथे होणार आहे. या ठिकाणी एकावेळी 13,000 लोक स्पर्धेचा आनंद घेऊ शकतील.
मिस युनिव्हर्स 2023 कधी आणि कुठे पाहू शकाल?
ब्रह्माण्ड सुंदरीची प्राथमिक स्पर्धा 15 नोव्हेंबर रोजी रात्री 8 (EST) वाजता होणार आहे. त्यानंतर 'राष्ट्रीय वेशभूषा स्पर्धा' 16 नोव्हेंबर रोजी रात्री 9 वाजता (EST) होईल. या वर्षीचा कार्यक्रम लाइव्ह बॅशच्या सहकार्याने होत आहे, जे दोन्ही स्पर्धांचे लाईव्ह स्ट्रीमिंग करेल. टेलीमुंडो (Telemundo) यूएसमध्ये स्पॅनिश भाषेत हा कार्यक्रम प्रसारित करेल. टेलीमुंडो हे अमेरिकन स्पॅनिश-भाषेचे स्थलीय टेलिव्हिजन नेटवर्क आहे. यासह रोकु चॅनेल (Roku Channel) देखील हा कार्यक्रम प्रसारित करेल. भारतीय दर्शकांना भारतीय प्रमाणवेळेनुसार 19 नोव्हेंबर रोजी सकाळी 6:30 वाजता मिस युनिव्हर्सच्या यूट्यूब चॅनल आणि X खात्यावर स्पर्धेचा अंतिम सोहळा पाहू शकतील. (हेही वाचा: Live Fish Costume: मॉडेलने केला जिवंत माशांचा पोशाख परिधान करून रॅम्प वॉक; व्हिडिओ व्हायरल, नेटिझन्सकडून निषेध Video)
मिस युनिव्हर्स 2023 मध्ये भारताचे प्रतिनिधित्व कोण करत आहे?
श्वेता शारदा ही 72 व्या मिस युनिव्हर्स स्पर्धेत भारताचे प्रतिनिधित्व करणार आहे. श्वेता ही 22 वर्षांची असून ती 2023 ची मिस दिवा युनिव्हर्स विजेतीदेखील आहे. श्वेता मूळची चंदिगडची असून ती मॉडेल आणि नृत्यांगना आहे. ती सोळा वर्षांची असताना आईसोबत मुंबईत राहायला आली. श्वेताने इंदिरा गांधी राष्ट्रीय मुक्त विद्यापीठातून पदवीचे शिक्षण पूर्ण केले. तिने डान्स दिवाने, डान्स प्लस आणि डान्स इंडिया डान्स यासारख्या अनेक लोकप्रिय टीव्ही रिअॅलिटी शोमध्ये भाग घेतला आहे. रिअॅलिटी शोमध्ये सहभागी होण्यासोबतच तिला 'झलक दिखलाजा' मध्येही कोरिओग्राफर म्हणूनही साइन केले आहे.
मिस युनिव्हर्स 2023 मध्ये काय खास आहे?
यंदाच्या मिस युनिव्हर्स स्पर्धेला विशेष महत्त्व आहे, कारण ते प्रगती आणि सर्वसमावेशकतेच्या वचनबद्धतेला अधोरेखित करून संस्थेच्या इतिहासातील महत्त्वपूर्ण बद दर्शवणार आहे. आगामी मिस युनिव्हर्स स्पर्धेत कोलंबियातील मारिया कॅमिला एव्हेला मॉन्टेझ आणि ग्वाटेमालाच्या मिशेल कोहन, या स्पर्धेत भाग घेणाऱ्या पहिल्या माता आणि विवाहित महिला असतील.
शिवाय, नेदरलँडची रिक्की व्हॅलेरी कोले आणि पोर्तुगालची मरीना मॅचेटे मिस युनिव्हर्समध्ये भाग घेणारी दुसरी आणि तिसरी ट्रान्स महिला म्हणून, 2018 मध्ये स्पेनचे प्रतिनिधित्व करणाऱ्या अँजेला पोन्सच्या पावलावर पाऊल ठेवत इतिहास घडवतील. आणखी एक ऐतिहासिक घटना म्हणजे यंदा पहिल्यांदाच पाकिस्तानची स्पर्धक एरिका रॉबिन मिस युनिव्हर्स स्पर्धेत भाग घेईल.
दरम्यान, मिस युनिव्हर्स ही दुसरी सर्वात जुनी आंतरराष्ट्रीय सौंदर्य स्पर्धा आहे, जी जून 1952 मध्ये सुरु झाली होती. फिनलंडची आर्मी कुसेला ही पहिली मिस युनिव्हर्स ठरली होती. भारताची पहिली मिस युनिव्हर्स सुष्मिता सेन आहे जिने 1994 मध्ये खिताब जिंकला, त्यानंतर 2000 मध्ये लारा दत्ता आणि 2021 मध्ये हरनाज संधू ब्रह्माण्ड सुंदरी ठरल्या.