Western Line Local New Timetable: लोकलचे वेळापत्रक बदलले; पश्चिम रेल्वे क्षेत्रात प्रवासाला निघण्यापूर्वी तपासा नव्या वेळा

पश्चिम रेल्वे क्षेत्र: मुंबईच्या जीवनवाहिनी मानल्या जाणाऱ्या पश्चिम रेल्वेवर उपनगरीय लोकलचे सुधारित वेळापत्रक १ सप्टेंबरपासून अधिकृतपणे लागू करण्यात आले आहे. प्रवाशांची वाढती गर्दी आणि प्रवासाची मागणी लक्षात घेऊन रेल्वे प्रशासनाने परिचालन रचनेत महत्त्वाचे बदल केले आहेत. या नवीन वेळापत्रकानुसार दैनंदिन धावणाऱ्या एकूण १,४१४ लोकल फेऱ्यांची संख्या कायम राखण्यात आली असली, तरी सहा नव्या फेऱ्या सुरू करणे, काही फेऱ्यांचे विलीनीकरण करणे आणि महत्त्वाच्या मार्गांचा विस्तार करणे असे निर्णय घेण्यात आले आहेत.

सहा नव्या फेऱ्या सुरू, सहा फेऱ्या रद्द

सुधारित वेळापत्रकांतर्गत पश्चिम रेल्वेने अप मार्गावर दोन आणि डाऊन मार्गावर चार अशा एकूण सहा नवीन धीम्या लोकल फेऱ्या सुरू केल्या आहेत. यामध्ये सकाळी ७.४६ वाजता भाईंदर-विरार, सकाळी ११.५८ वाजता वांद्रे-चर्चगेट, रात्री १०.१४ वाजता बोरिवली-भाईंदर, रात्री १०.५१ वाजता बोरिवली-विरार, रात्री ११.५१ वाजता विरार-बोरिवली आणि मध्यरात्री १२.२८ वाजता बोरिवली-भाईंदर या फेऱ्यांचा समावेश आहे.

दुसऱ्या बाजूला कमी प्रवासी संख्या किंवा तांत्रिक नियोजनाचा भाग म्हणून सहा जुन्या लोकल फेऱ्या रद्द करण्यात आल्या आहेत. यामुळे रात्री उशिरा प्रवास करणाऱ्या विरार, नालासोपारा आणि भाईंदर परिसरातील प्रवाशांना दिलासा मिळाला आहे.

एसी लोकलच्या फेऱ्यांमध्ये वाढ

वातानुकूलित (AC) लोकलला प्रवाशांकडून मिळणारा वाढता प्रतिसाद लक्षात घेता दोन नियमित नॉन-एसी फेऱ्यांचे रूपांतर एसी सेवेत करण्यात आले आहे. सायंकाळी गर्दीच्या वेळी ५.२८ वाजता चर्चगेटवरून सुटणारी बोरिवली लोकल आणि बोरिवलीवरून सायंकाळी ६.२४ वाजता सुटणारी चर्चगेट लोकल आता एसी जलद लोकल म्हणून धावत आहेत. या बदलामुळे पश्चिम रेल्वेवरील सोमवार ते शुक्रवारदरम्यान धावणाऱ्या एसी लोकल फेऱ्यांची संख्या १४५ वरून १४७ झाली आहे. शनिवार आणि रविवारी ११६ एसी फेऱ्या सुरू राहतील.

थेट दादर-डहाणू लोकल आणि मार्गांचा विस्तार

डहाणू आणि विरार दरम्यान प्रवास करणाऱ्या प्रवाशांचा त्रास कमी करण्यासाठी रेल्वे प्रशासनाने महत्त्वाचा निर्णय घेतला आहे. यापूर्वी प्रवाशांना विरार स्थानकात उतरून गाडी बदलावी लागत होती. आता सायंकाळी ५.२२ वाजता दादरहून थेट डहाणू रोडसाठी लोकल धावत असून ती सायंकाळी ७.३० वाजता डहाणूला पोहोचते.

तसेच सकाळी गर्दीच्या वेळी विरारहून सुटणारी ८.२३ ची दादर लोकल आता थेट चर्चगेटपर्यंत धावत आहे. सकाळी ९.५२ वाजता चर्चगेटवरून सुटणारी गाडी नालासोपारापर्यंत विस्तारित करण्यात आली आहे.

दोन जलद विरार लोकलचा बोरिवली थांबा रद्द

सायंकाळी पीक अवर्समध्ये चर्चगेट ते विरार दरम्यान धावणाऱ्या जलद गाड्यांमध्ये बोरिवलीच्या प्रवाशांमुळे होणारी गर्दी आणि वादाचे प्रसंग टाळण्यासाठी दोन फेऱ्यांचा बोरिवली थांबा रद्द करण्यात आला आहे. चर्चगेटहून सायंकाळी ६.२२ वाजता सुटणारी एसी लोकल आणि सायंकाळी ७.०५ वाजता सुटणारी जलद लोकल आता थेट अंधेरीनंतर भाईंदरच्या दिशेने धावतील. या निर्णयामुळे विरार-नालासोपारा पट्ट्यातील प्रवाशांचा वेळ वाचणार असला तरी बोरिवलीच्या प्रवाशांना पर्यायी गाड्यांचा वापर करावा लागणार आहे.